MAQSADIMIZ –AMUDARYo TUMANI NOMINI DUNYoGA TANITISh

Amudaryo tumani Sport maktabining hududlarda 3ta bazasi mavjud boʻlib, barcha sport inshootlari hozirgi zamon talablariga muvofiq jihozlangan.

1-asosiy baza – Markaziy oʻyingoh Mangʻit shahrining Olmazor mahallasida joylashgan. Bu yerda futbol stadioni, 3000-oʻringa moʻljallangan tribuna, sport zal, voleybol, basketbol maydonchalari, suzish basseyni mavjud.

2-baza esa Mangʻit shahrining Doʻstlik mahallasi hududida joylashgan. Mazkur sport bazasida 100x70 oʻlchamdagi futbol stadioni, 850-oʻringa moʻljallangan tribuna, 2ta kurash va stol tennis zali, 1ta badiiy gimnastika zali mavjud.

Mangʻit shahrining Chordara mahallasi hududida joylashgan 3-sport bazasida 12x24 oʻlchamdagi kurash va boks sporti zamonaviy sport zali, stol tennis zali mavjud.

Ayni paytda sport maktabida jami 19ta sport turlari boʻyicha mashgʻulotlar oʻtkazish yoʻlga qoʻyilgan.

Shuningdek, paralimpiya sport turlaridan taekvando, para stol tennisi, para dzyudo turlari boʻyicha ham qiziquvchilar uchun zarur sharoitlar yaratilgan. Jami 141ta guruhda 1304 nafar sportsevar yoshlar oʻzlari qiziqqan yoʻnalishlar boʻyicha mashgʻulotlarda shugʻullanishadi. Ulardan 337 nafari qiz bolalarni tashkil etadi. 62 nafar sport murabbiylarining 18 nafari ayol-qizlar boʻlib, oliy maʼlumotli murabbiylar 36 nafar, oʻrta maxsus maʼlumotga ega murabbiylar esa 26 nafar boʻlib, ularning barchasi oʻz ishining ustalaridir.

Sportchilardan 2 nafari sport ustasi, 17 nafari  sport ustaligiga nomzod, jami 630 nafar sportchilarimiz esa 1-, 2-, 3-toifalarga ega. 12 nafar sportchi Oʻzbekiston terma jamoasi asosiy tarkibiga, 2 nafar sportchi esa zaxira tarkibga qabul qilindilar.

Sport maktabining 3ta bazasidan tashqari, umumtaʼlim maktablarida ham uch tomonlama shartnoma asosida sport maktabining tajribali 16 nafar trenerlari tomonidan sport toʻgaraklarida mashgʻulotlar oʻtkaziladi.

Sport maktabida 2023-yil davomida barcha sport turlari boʻyicha 37-marta sport musobaqalari oʻtkazildi. Ushbu musobaqalarda 834 nafar shugʻullanuvchilar qatnashdi, shulardan 317 nafari qiz bolalardir. Sportchilarimiz 2023-yil davomida Oʻzbekiston chempionati va kuboklarida 6ta oltin, 12ta kumush, 33ta bronza medal, Jahon kubogi musobaqalarida 2ta kumush va 2ta bronza, Xalqaro turnirlarda 2ta oltin, 3ta kumush, 1ta bronza medallarini qoʻlga kiritdilar.           

Maqsadimiz esa bitta – tumanimiz nomini dunyoga tanitish, Oʻzbekiston bayrogʻini boshimiz uzra baland koʻtarish. Amudaryolik sportchilar yangi 2024-yilga ana shunday ezgu, ulugʻvor niyatlar bilan qadam qoʻymoqda.

Ch.TAJIMURADOV, tuman Sport maktabi direktori.