31-сонли ДМТТда “Хайр, боғча – салом, мактаб!” номли тадбир ўтказилди
Ёш авлод тарбияси – жамият тараққиётининг асосий пойдевори саналади. Болаларнинг илк қадамлари, таълимга бўлган муҳаббати ва келажакка ишончи мактабгача таълим муассасаларида шаклланади. Амударё туманининг Тўлқин овули ҳудудида жойлашган 31-сонли давлат мактабгача таълим ташкилоти ҳам ана шу эзгу мақсадларга хизмат қилмоқда.
Яқинда ушбу муассасада болажонларни мактабга кузатиш муносабати билан “Хайр, боғча – салом, мактаб!” номли байрам тадбири ташкил этилди. Жорий йилда мазкур муассасанинг 38 нафар тарбияланувчиси мактаб остонасига қадам қўйиш арафасида турибди. Уларнинг кўзларидаги самимий ҳаяжон, янги таълим маскани сари интилиш байрамона тадбирда яққол акс этди. Тадбир доирасида болажонлар Тўлқин овулидаги 33-сонли умумтаълим мактаби ҳамда устозлари билан таништирилди.
Тадбирнинг адабий-бадиий қисми овулдаги аҳоли дам олиш масканларидан бирида давом эттирилди. Унда муассаса директори Ҳуррият Тўқлибоева, тарбиячилар, болажонлар ҳамда уларнинг оналари ва бувилари фаол иштирок этди. Тадбир Ўзбекистон ва Қорақалпоғистон Республикаларининг давлат мадҳиялари билан бошланди.
Шундан сўнг кўп йиллик тажрибага эга устоз-тарбиячи Турсуной Раметова сўзга чиқиб, барча тарбияланувчиларга келгуси мактаб ҳаётида муваффақиятларга тилакдошлик билдирди. Шунингдек, болаларни мактабда ҳам ана шундай билимга чанқоқлик билан ўқишга чорлади.
Сўзга чиққанлар томонидан мактабгача таълим тизимида олиб борилаётган ислоҳотлар, боғчаларда болаларни ҳар томонлама ривожлантириш учун яратилган шароитлар ҳақида сўз юритилди. Таъкидланганидек, боғчада яхши тарбия олган бола мактаб таълимини ўзлаштиришда зийраклиги ва фаоллиги билан бошқа тенгдошларидан ажралиб туради.
Маълумот ўрнида қайд этиш жоизки, бугунги кунда 31-сонли мактабгача таълим ташкилотида 36 нафар ишчи ва ходим фаолият юритмоқда. Улардан 15 нафари тарбиячи-педагоглар бўлиб, 13 нафари олий маълумотли мутахассислардир. Шунингдек, муассасада уч нафар 1-тоифали ва икки нафар 2-тоифали тарбиячи фаолият олиб бормоқда. Ёрдамчи тарбиячилар эса мунтазам касбий ўқувларда қатнашиб, болалар қалбидан муносиб ўрин эгаллашган. Ҳозирда муассасада 5 та гуруҳда жами 150 нафар бола таълим-талим-тарбия олмоқда.
Болажонларнинг ижодий чиқишлари тадбирнинг ҳаяжонли қисмига айланди. Улар она Ватан, мактаб, боғча ва болалик ҳақидаги шеърларни ўзбек, рус ва инглиз тилларида ифодали тарзда ёддан ўқишди. Шўх қўшиқлар садоси остида рақслар ижро этиб, иштирокчиларга кўтаринки кайфият улашди.
Шунингдек, болаларнинг оналари ва бувилари ҳам сўзга чиқиб, тарбиячилар меҳнатини юксак баҳоладилар ҳамда самимий миннатдорлик изҳор этдилар. Ота-оналар фарзандларининг келгуси таълим босқичларида ҳам фидоий устозлар қўл остида яхши натижаларга эришишига тилакдошлик билдирдилар.
Тадбир нафақат кичкинтойлар, балки уларнинг ота-оналари учун ҳам унутилмас хотира сифатида ёдда қолди.
Равила Чўтбоева, 31-сонли мактабгача таълим ташкилоти директори ўринбосари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
