Oʻquv-seminarda umumtaʼlim maktablarini attestatsiyadan oʻtkazishning yangi tartiblari haqida maʼlumot berildi

Soʻngi yillarda mamlakatimizda maktab taʼlimini rivojlantirish va maktab taʼlimi muassasalarining xalqaro standartlariga javob beradigan zamonaviy modellarini barpo etish maqsadida sohaga doir qonunchilik tizimi takomillashtirilib, qator ishlar amalga oshirildi. Amaldagi qonunchilikka koʻra, umumtaʼlim maktablarini attestatsiya va davlat akkreditatsiyasidan oʻtkazishning yangi tartibi belgilandi.

Amudaryo tumani Maktabgacha va maktab taʼlimi boʻlimi tomonidan “Umumiy oʻrta taʼlim tashkilotlarini attestatsiya va davlat akkreditatsiyasidan oʻtkazishning yangi tartibi” mavzusida oʻquv-seminar tashkil etildi. Seminarga tumandagi barcha umumtaʼlim maktablarining oʻquv ishlari boʻyicha dirertor oʻrinbosarlari va maktablar faoliyatini muvofiqlashtirish boʻlimi mutaxassislari taklif qilindi.

Tadbirni tuman Maktabgacha va maktab taʼlimi boʻlimining Maktablar faoliyatini muvofiqlashtirish shoʻʼbasi rahbari Ibrahim Radjapov ochdi va seminarda belgilangan mavzular bugungi kunda taʼlim sifatini oshirishda dolzarbligini taʼkidlab oʻtdi.

Shundan keyin Maktablar faoliyatini muvofiqlashtirish shoʻʼbasi metodisti Rayhon Yakubova umumtaʼlim maktablarini attestatsiya va davlat akkreditatsiyasidan oʻtkazishning yangi tartiblari va bu jarayonning taʼlim sifatini oshirish hamda maktab reytingini belgilashdagi ahamiyati toʻgʻrisida maʼruza qildi.

Tegishli hujjatlar bilan maktablarni majburiy attestatsiyadan oʻtkazish davriyligi 5-yildan 11-yilgacha uzaytirildi va oʻz taʼlim sifatini bilish istagida boʻlgan maktablarga ixtiyoriy ravishda muddatdan oldin shartnoma asosida attestatsiyadan oʻtishga ruxsat berildi. Shuningdek, umutaʼlim maktablarini attestatsiyadan oʻtkazish jarayoni soddalashtirilib, 63 ta mezondan 13 ta mezonga qisqartirildi. Attestatsiya jarayonlariga jalb qilingan ekspertlarga vazirlik jamgʻarmasi mablagʻlari hisobidan ish haqi toʻlanishi belgilandi.

Bundan tashqari, attestatsiyadan oʻtkazish jarayonlari qisqartirilishi natijasida attestatsiyadan oʻtish toʻgʻrisidagi arizaga ilova qilinadigan hujjatlar soni ham qisqartirildi. Attestatsiyaning asosiy printsiplari esa mustaqillik, xolislik, oshkoralik, shaffoflik, davriylik majburiylik qilib belgilandi.

Attestatsiya Nizomda belgilangan talablar asosida Vazirlik tomonidan tashkil etiladi. Attestatsiya taʼlim tashkilotlarining faoliyatini ichki va tashqi baholashdan iborat bosqichda oʻtkaziladi. Umumiy oʻrta maktablarning faoliyati 6 ta soha, 13 ta mezon va 48 ta koʻrsatkich orqali amalga oshirilib, 1000 ballik tizimida baholanadi. Shu bilan birga, bitiruvchi sinf oʻquvchilaridan olinadigan nazorat ishlari alohida 100 ballik tizimda baholandi.

Umumiy oʻrta taʼlim maktabi faoliyatini ichki baholash jarayonida barcha sinf oʻquvchilaridan nazorat ishi olinadi. Ichki baholash jarayonlari umumiy oʻrta taʼlim maktabi rahbariyati tomonidan har yili oʻtkazilib, platformaga kiritib boriladi.

Seminar qizgʻin muhokamalarga boy boʻldi. Tadbir davomida 28-sonli maktab direktorining oʻquv ishlari boʻyicha oʻrinbosari Bahodir Yuldashev va 62-sonli maktab direktorining maʼnaviy-marifiy ishlar boʻyicha oʻrinbosari Zokir Atayevlar mavzuga doir fikr-mulohazalarini bildirishdi.

Seminar ishtirokchilarining barcha savollariga mutaxassislar tomonidan toʻliq javob berildi.

Rayhon Yakubova, tuman Maktabgacha va maktab taʼlimi boʻlimining Maktablar faoliyatini muvofiqlashtirish shoʻʼbasi metodisti