69-sonli maktabda Afgʻon urushi faxriylari bilan uchrashuv va “Zakovat” intelektual oʻyinining final bosqichi oʻtkazildi

Taʼlim maskanlarida Xotira va qadrlash kuniga bagʻishlab oʻtkazilayotgan uchrashuvlar, madaniy-maʼrifiy tadbirlar davom etmoqda. 8-may kuni Amudaryo tumanidagi 69-sonli umumtaʼlim maktabida ham sana munosabati bilan bayram tadbiri va iqtidorli oʻquvchilar oʻrtasida “Zakovat” intelektual oʻyinining final bosqichi boʻlib oʻtdi.

Tadbirda Afgʻoniston urushi faxriylari, Ayoqchi mahallasida joylashgan davlat xavfsizlik xizmati chegara qoʻshinlariga qarashli harbiy qism masʼullari, mahalla faollari, maktab oʻqituvchi va oʻquvchilari ishtirok etdi.

Tadbirni Ayoqchi MFY raisi Olloyor Qalandarov ochib berdi. Mazkur mahallada joylashgan davlat xavfsizlik xizmati chegara qoʻshinlariga qarashli harbiy qism xodimi Abbos Rustamov Afgʻon urushi faxriylarini, maktab jamoasi va barcha oʻqituvchilarni Xotira va qadrlash kuni bilan tabriklab, yurtimizda tinchlik va osoyishtalik bardavom boʻlishi uchun barcha harbiy xizmatchilar, shu jumladan chegarachilar ham tunu kun oʻz postlarida hushyor turganini taʼkidlab oʻtdi.

Davlat xavfsizlik xizmati masʼul xodimi ham urushning insoniyat uchun naqadar ayanchli oqibatlarga olib kelishini, Ikkinchi jahon urushida xalqimiz koʻrgan yoʻqotishlar mislsiz boʻlgani, bu mashʼum kunlar hamda urushda jon fido qilgan, muhnat frontida ter toʻkkan ota-bobolarimiz va momolarimiz xotirasi hamisha avlodlar yodida boʻlishini taʼkidladi.

Tadbir davomida Afgʻon urushi faxriylari Poʻlat Qutimov, Haytimmat Jumatov, Qoʻziboy Davletov, Bozorboy Vapoyev, Ozodlar Oʻrazmetovlar urush haqidagi tasurotlarini oʻquvchilarga soʻzlab berishdi. Aytish joizki, 1979-1989-yillardagi Afgʻoniston urushi, Sovet Ittifoqining Afgʻonistonga qoʻshin kiritishi va u yerda toʻqqiz yil davom etgan harbiy amaliyotlar necha-necha zabardast yigitlarni hayotdan barvaqt olib ketgan. Urush faxriylari yoshlarni tinchlik va osoyishtalikni koʻz qorachigʻiday asrashga daʼvat etdilar.

Tadbirda maktabning yuqori sinf qizlari ijrosida kuy-qoʻshiq va raqslar ijro qilindi. Oʻgʻil bollar ishtirokida esa harbiy jang sanʼati namunalari namoyish qilinib, sahna koʻrinishlarini taqdim etildi. Tadbir yakunida mahalla fuqarolar yigʻini raisi va maktab maʼmuriyati tomondan Afgʻoniston urushi faxriylariga esdalik sovgʻalari topshirildi.

Tadbir yakunlangandan keyin maktab oʻquvchilari ishtirokida “Zakovat” intellektual oʻyini oʻtkazildi. Shu paytgacha oʻtkazilgan saralash va dastlabki tur oʻyinlarida gʻolib boʻlgan 4 ta jamoa – 8-d, 9-a, 10-b va 11-b sinflar jamoalari maktabning kimyo fani oʻqituvchisi Xosiyat Oʻrozboyeva rahbarligida intelektual oʻyinning final bosqichida oʻzaro bellashdilar.

Ushbu intellektual oʻyin oʻquvchilarga nafaqat bilimlarini sinovdan oʻtkazish, balki ularning dunyoqarashini kengaytirish va jamoaviy ishlash koʻnikmalarini rivojlantirish uchun ham ajoyib imkoniyat yaratdi. Turli fanlarga oid mantiqiy savollar boʻyicha kechgan bahs-munozaralar, maslahatlashuvlar va javoblar berish jarayonida koʻrsatilgan birdamlik hamda oʻyin davomidagi koʻtarinki ruh ularning intellektual salohiyatini va jamoaviy ishlash qobiliyati qanchalik yuqori darajada ekanini namoyon etdi.

Oʻquvchilarni intellektual oʻyinning final bosqichiga tayyorlashda maktab direktorining maʼnaviy-maʼrifiy ishlar boʻyicha oʻrinbosari Dilshod Baltayev, biologiya fani oʻqituvchisi Munavvar Matjanova, ona tili adabiyot fani oʻqituvchisi Saida Najamatdinova, geografiya fani oʻqituvchisi Barno Rajapovalar faol qatnashdilar.

Murosasiz bellashuvlar yakuniga koʻra “Zakovat”ning maktab boʻyicha final bosqichida 1-oʻrinni 8-d va 9-a sinflar jamoalari, 2-oʻrinni 10-b hamda uchinchi oʻrinni 11-b sinf jamoalari egalladi.