Ikkinchi jahon urushi yillarida ajdodlarimiz koʻrsatgan matonat va jasorat hech qachon unutilmaydi!

Ikkinchi jahon urushi insoniyat tarixidagi eng qonli va vayronkor urushlardan biri boʻlib, uning oqibatlari hatto bugungi kungacha odamlar hayotida sezilmoqda. Oʻsha mashʼum urush sababli kimdir otasiz, kimdir onasiz qoldi, yana kimdir yaqinlaridan ayrildi. Deyarli butun xalq ogʻir mehnat va qiyinchilikda kun kechirdi. Ota-bobolarimiz tortgan azob-uqubatlar, ularning boshiga tushgan yoʻqotishlar bugun ham avlodlar xotirasidan oʻchmadi, afsus va nadomat bilan tilga olinadi. Zero, yurt tinchligi, ozodligi va ravnaqi yoʻlida ajdodlarimiz koʻrsatgan matonat va jasorat hech qachon unutilmaydi.

Shu sababli ham har yili mamlakatimizda 9-may – Xotira va qadrlash kuni keng nishonlanadi. Bu sanada Ikkinchi jahon urushi janggohlarida jon olib-jon bergan, mehnat frontida, urushdan keyingi tiklanish yillarida fidoyilik koʻrsatgan ota-bobolarimiz, momolarimiz xotirasiga hurmat bajo keltiriladi. Bugungi dorilomon kunlarga yetgan nuroniylarimizga hurmat-ehtirom koʻrsatilib, holidan xabar olinadi.

8-may kuni Amudaryo tumanida ham Xotira va qadrlash kuni munosabati bilan tadbir oʻtkazildi. Tadbirda tuman hokimi Sobir Xoʻjametov, sektorlar rahbarlari, huquqni muhofaza qilish organlari vakillari, mehnat fronti faxriylari, deputatlar, turli muassasa, korxona va tashkilotlar rahbarlari, mahalla faollari hamda keng jamoatchilik vakillari ishtirok etdi.

Tadbirda soʻzga chiqqan tuman hokimi Sobir Xoʻjametov barchani bayram bilan qutlar ekan, urush davrida yuz bergan voqealar, jumladan, Oʻzbekistonlik jangchilarning jasorati va fidoyiligi, ularning jang maydonlarida va front ortida koʻrsatgan qahramonliklari xalq xotirasida mangu muhrlanib qolishini, marhumlar xotirasi hech qachon avlodlar yodidan oʻchmasligini taʼkidlab oʻtdi.

Tuman Mudofaa ishlari boʻlimi boshligʻi Sherzod Murodov oʻz nutqida urush va mehnat fronti faxriylarining insoniyatni fashizm balosidan qutqarishdagi jasorati va matonati haqida toʻxtalib oʻtdi. Oʻsha suronli yillarda ajdodlarimiz koʻrsatgan jasorat va fidoyiliklar nafaqat oʻz davrida, balki bugungi kunda ham barchamiz uchun ibrat maktabi boʻlib qolmoqda.

Nuroniylar jamoatchilik kengashi raisining oʻrinbosari Bekman ota Allaberganov beshafqat urushning millionlab insonlar hayotiga zomin boʻlgani, koʻplab shaharlarning vayron boʻlishi, iqtisodiyotning izdan chiqishi va boshqa koʻplab salbiy oqibatlari bilan hali-hanuz insonlar qalbiga ogʻriq solib kelayotganini aytib, barchani bugungi tinch va dorilomon kunlarning qadriga yetishga chorladi.

Tuman madaniyat boʻlimi va joylardagi madaniyat markazlari jamoalari tomonidan tayyorlangan sahna koʻrinishlari hamda badiiy chiqishlar orqali janggohlarning ayovsiz manzarasi, aholining front ortidagi qiyin hayoti ishtirokchilar koʻz oʻngida gavdalanganday boʻldi.

Urush yillarida nafaqat frontda, balki front ortida ham yurtimiz aholisi fidoyiliklar koʻrsatgan. Ularning mehnati urush davrida Sovet Ittifoqining iqtisodiy va harbiy salohiyatini mustahkamlashda muhim rol oʻynagan. Oʻzbekistonliklar koʻplab evakuatsiya qilingan zavod va fabrikalarni ishlatishga koʻmaklashgan, shuningdek, qishloq xoʻjaligida ham katta yuklamalarni zimmalariga olishgan. Oʻsha paytda ayollar ham erkaklar bilan bir safda mehnat qilib, iqtisodiyotni qoʻllab-quvvatlashda faol ishtirok etganlar.

Urush yillarida mamlakatimiz koʻplab evakuatsiya qilingan jabrdiydalarni ham qabul qilgan. Xalqimiz mehmondoʻstlik va insonparvarlik namunalarini koʻrsatib, oʻz uylarini boshqa millat vakillariga boʻshatib bergan.

Urushdan keyingi yillarda ham ota-bobolarimizning gʻayrat va shijoati, jasorati bilan yurtimizda keng koʻlamli tiklanish ishlari amalga oshirildi. Bu davrda koʻplab sanoat korxonalari, maktablar, kasalxonalar va boshqa infrastruktura obʼektlari qayta qurildi yoki yangidan barpo etildi.

Shuningdek, madaniy hayot ham jonlandi, adabiyot va sanʼatda yangi asarlar yaratildi, bu esa xalqning maʼnaviy tiklanishiga hissa qoʻshdi. Urushdan keyingi yillarda Oʻzbekistonda ijtimoiy va madaniy hayotning rivojlanishi, xususan, adabiyot va sanʼatning gullab-yashnashi, mamlakatning turli sohalarda erishgan yutuqlari ajdodlarimiz koʻrsatgan qahramonliklar, ularning matonati va fidoyiliklarining ramzidir.

Tadbirda marhumlar ruhiga Qurʼon tilovat qilindi. Ishtirokchilar Motamsaro ona haylaki poyiga gulchambarlar qoʻyib, ularning jasorati va matonati oldida taʼzim bajo keltirishdi.

Gʻ.Yeshniyozov