53-sonli maktabda “Oxiratingiz obod boʻlsin, aziz ustozlarim” shiori ostida xotira kechasi oʻtkazildi

Amudaryo tumani Maktabgacha va maktab taʼlimi boʻlimiga qarashli 53-sonli maktabda shu maktabning boshlangʻich sinf oʻqituvchisi Malohat Matsafoyeva tashabbusi bilan 4-A sinf oʻquvchilari va maktab jamosi hamkorligida 9-may – Xotira va qadrlash kuniga bagʻishlab tadbir uyushtirildi.

“Oxiratingiz obod boʻlsin, aziz ustozlarim” shiori ostida oʻtkazilgan xotira kechasi Oʻzbekiston va Qoraqalpogʻiston Respublikalarining davlat madhiyalari bilan boshlandi.

Bayram tadbirini maktab Kasaba uyushma tashkiloti raisi Bahrom Jiyanov kirish nutqi bilan ochib berdi va maktabda uzoq yillar mehnat qilgan Ikkinchi jahon urushi qatnashchilari Jumot Boʻranov, Rahimboy Jiyanov va mazkur maktabda ishlab, oʻz faoliyati bilan oʻchmas iz qoldirgan marhum ustozlar Sodiqboy Matsafoyev, Karimboy Oʻrazov, Ibragim Eshnazrov, Gulimmat Jiyanov, Shomurot Pirimov, Omonboy Shomurotov, Begmurot Pirimov, Sultonposhsha Jumaniyazova kabi ustozlar haqidagi oʻchmas xotiralarni yodga oldi.

Chindan ham, xotira, insoniyatning madaniy va tarixiy merosini saqlab qolishning asosiy omili sifatida qadrlidir. U oʻtmishdagi voqealarni, shaxslarni va ularning qahramonliklarini esda saqlash orqali, kelajak avlodlarga ularning hayotiy tajribalarini yetkazish imkonini beradi.

Ayniqsa, Ikkinchi jahon urushida qatnashgan va el yurt tinchligi uchun jon bergan yurtdoshlarimizning xotirasi, ularning fidoyiligi va matonatini avlodlar hech qachon unutmaydi. Bu xotira har safar yodga olinganida nafaqat ularning jasoratini, balki urushning dahshatlarini va tinchlikning qadrini ham eslatib turadi.

Shu bilan birga, xotira insonlarni birlashtiruvchi kuch sifatida, milliy birdamlik va jamiyatdagi oʻzaro hurmatni mustahkamlovchi vosita sifatida ham muhim ahamiyat kasb etadi. Ayniqsa, oʻtgan marhum ustozlarni xotirlash va ayni paytda nafaqada keksalik gashtini surayotgan faxriy oʻqituvchilarni qadrlash hamda eʼzozlash maktab jamoasi orasidagi ahillik va birdamlikni taʼminlaydi, avlodlar oʻrtasidagi oʻzaro aloqalarni mustahkamlaydi.

Shu sababli tadbirga 53-sonli maktabda ishlab, ayni kunda keksalik gashtini surayotgan bir guruh faxriy ustozlar ham taklif qilindi. Uzoq yillar taʼlim sohasida, aynan ushbu maktabda faoliyat yuritgan faxriy ustozlar Davlatboy Boltayev, Oʻrazgul Pirimova, Sotimboy Rajabov, Rahatoy Qurbonova, Shermat Jiyanov, Bahrom Erimmatov, Tilavoy Bekchanov va boshqa elda aziz ustozlar, bugungi kunda ham shogirdlari, nevara-chevaralari ardogʻida yurgan nuroniylar marhum ustozlarini chuqur hurmat bilan eslab, oʻzlariga hurmat koʻrsatayotgan shogirdlariga minnatdorchilik izhor qildilar.

Faxriy ustozlar taʼkidlaganlaridek, taʼlim sohasida ishlagan oʻqituvchi va murabbiylar tajribasi, hayot yoʻli shogirdlar uchun chinakam ibrat maktabidir. Ularning bilim va tarbiya berishdagi beqiyos hissasini qadrlash hamda boy ilmiy, maʼnaviy merosini davom ettirish har bir yosh pedagog uchun sharaf hamda chinakam masʼuliyatli vazifadir.

Tadbirda maktab direktorining maʼnaviy-marifiy ishlar boʻyicha oʻrinbosari Izzatbek Yusufov ham soʻzga chiqib, Ikkinchi jahon urushida qatnashib, xalq tinchligi va osoyishtaligi uchun jonini fido qilgan, urushdan omon qaytib, turli sohalarda fidokorona mehnat qilgan ajdodlar xotirasi avlodlar qalbida mangu saqlanajagini taʼkidladi.

Ustozlarning xotirasini, ularning taʼlim va tarbiyadagi fidoyiliklarini tan olish, eʼtirof etish, ularning nurli yoʻllarini davom ettirish haqiqiy insoniy fazilatdir. Tadbirda ishtirok etgan oʻquvchilarning ota-onalari yosh avlodga taʼlim berayotgan ustozlarning bu kabi hamjihatligi va totuvligidan koʻngillari toʻlib, ulardan taʼlim olayotgan farzandlarining ham ota-onasiga, ustozlariga, yoshi kattalarga itoatli boʻlib voyaga yetishlariga ishonch bildirdilar.

Tadbirda maktabning 4-A sinf oʻquvchilari Vatanni, tinchlik va doʻstlikni, insoniylikni madh etuvchi kuy-qoʻshiqlarni kuylab, raqsga tushdilar.

Xotira kechasi yakunida tadbir tashkilotchisi Malohat Matsafoyeva soʻzga chiqib, barcha ishtirokchilarni 9-may – Xotira va qadrlash kuni bilan chin qalbdan tabrikladi va tashrif uchun minnatdorchilik bildirdi.

Uzoq yillar davomida shu maktabda mehnat qilib, ayni kunlarda pensiyada keksalik gashtini surayotgan faxriy ustozlar va mehmonlarga esdalik sovgʻalari topshirildi.