53-сонли мактабда “Охиратингиз обод бўлсин, азиз устозларим” шиори остида хотира кечаси ўтказилди

Амударё тумани Мактабгача ва мактаб таълими бўлимига қарашли 53-сонли мактабда шу мактабнинг бошланғич синф ўқитувчиси Малоҳат Матсафоева ташаббуси билан 4-А синф ўқувчилари ва мактаб жамоси ҳамкорлигида 9-май – Хотира ва қадрлаш кунига бағишлаб тадбир уюштирилди.

“Охиратингиз обод бўлсин, азиз устозларим” шиори остида ўтказилган хотира кечаси Ўзбекистон ва Қорақалпоғистон Республикаларининг давлат мадҳиялари билан бошланди.

Байрам тадбирини мактаб Касаба уюшма ташкилоти раиси Баҳром Жиянов кириш нутқи билан очиб берди ва мактабда узоқ йиллар меҳнат қилган Иккинчи жаҳон уруши қатнашчилари Жумот Бўранов, Раҳимбой Жиянов ва мазкур мактабда ишлаб, ўз фаолияти билан ўчмас из қолдирган марҳум устозлар Содиқбой Матсафоев, Каримбой Ўразов, Ибрагим Эшназров, Гулиммат Жиянов, Шомурот Пиримов, Омонбой Шомуротов, Бегмурот Пиримов, Султонпошша Жуманиязова каби устозлар ҳақидаги ўчмас хотираларни ёдга олди.

Чиндан ҳам, хотира, инсониятнинг маданий ва тарихий меросини сақлаб қолишнинг асосий омили сифатида қадрлидир. У ўтмишдаги воқеаларни, шахсларни ва уларнинг қаҳрамонликларини эсда сақлаш орқали, келажак авлодларга уларнинг ҳаётий тажрибаларини етказиш имконини беради.

Айниқса, Иккинчи жаҳон урушида қатнашган ва эл юрт тинчлиги учун жон берган юртдошларимизнинг хотираси, уларнинг фидойилиги ва матонатини авлодлар ҳеч қачон унутмайди. Бу хотира ҳар сафар ёдга олинганида нафақат уларнинг жасоратини, балки урушнинг даҳшатларини ва тинчликнинг қадрини ҳам эслатиб туради.

Шу билан бирга, хотира инсонларни бирлаштирувчи куч сифатида, миллий бирдамлик ва жамиятдаги ўзаро ҳурматни мустаҳкамловчи восита сифатида ҳам муҳим аҳамият касб этади. Айниқса, ўтган марҳум устозларни хотирлаш ва айни пайтда нафақада кексалик гаштини сураётган фахрий ўқитувчиларни қадрлаш ҳамда эъзозлаш мактаб жамоаси орасидаги аҳиллик ва бирдамликни таъминлайди, авлодлар ўртасидаги ўзаро алоқаларни мустаҳкамлайди.

Шу сабабли тадбирга 53-сонли мактабда ишлаб, айни кунда кексалик гаштини сураётган бир гуруҳ фахрий устозлар ҳам таклиф қилинди. Узоқ йиллар таълим соҳасида, айнан ушбу мактабда фаолият юритган фахрий устозлар Давлатбой Болтаев, Ўразгул Пиримова, Сотимбой Ражабов, Раҳатой Қурбонова, Шермат Жиянов, Баҳром Эримматов, Тилавой Бекчанов ва бошқа элда азиз устозлар, бугунги кунда ҳам шогирдлари, невара-чеваралари ардоғида юрган нуронийлар марҳум устозларини чуқур ҳурмат билан эслаб, ўзларига ҳурмат кўрсатаётган шогирдларига миннатдорчилик изҳор қилдилар.

Фахрий устозлар таъкидлаганларидек, таълим соҳасида ишлаган ўқитувчи ва мураббийлар тажрибаси, ҳаёт йўли шогирдлар учун чинакам ибрат мактабидир. Уларнинг билим ва тарбия беришдаги беқиёс ҳиссасини қадрлаш ҳамда бой илмий, маънавий меросини давом эттириш ҳар бир ёш педагог учун шараф ҳамда чинакам масъулиятли вазифадир.

Тадбирда мактаб директорининг маънавий-марифий ишлар бўйича ўринбосари Иззатбек Юсуфов ҳам сўзга чиқиб, Иккинчи жаҳон урушида қатнашиб, халқ тинчлиги ва осойишталиги учун жонини фидо қилган, урушдан омон қайтиб, турли соҳаларда фидокорона меҳнат қилган аждодлар хотираси авлодлар қалбида мангу сақланажагини таъкидлади.

Устозларнинг хотирасини, уларнинг таълим ва тарбиядаги фидойиликларини тан олиш, эътироф этиш, уларнинг нурли йўлларини давом эттириш ҳақиқий инсоний фазилатдир. Тадбирда иштирок этган ўқувчиларнинг ота-оналари ёш авлодга таълим бераётган устозларнинг бу каби ҳамжиҳатлиги ва тотувлигидан кўнгиллари тўлиб, улардан таълим олаётган фарзандларининг ҳам ота-онасига, устозларига, ёши катталарга итоатли бўлиб вояга етишларига ишонч билдирдилар.

Тадбирда мактабнинг 4-А синф ўқувчилари Ватанни, тинчлик ва дўстликни, инсонийликни мадҳ этувчи куй-қўшиқларни куйлаб, рақсга тушдилар.

Хотира кечаси якунида тадбир ташкилотчиси Малоҳат Матсафоева сўзга чиқиб, барча иштирокчиларни 9 май – Хотира ва қадрлаш куни билан чин қалбдан табриклади ва ташриф учун миннатдорчилик билдирди.

Узоқ йиллар давомида шу мактабда меҳнат қилиб, айни кунларда пенсияда кексалик гаштини сураётган фахрий устозлар ва меҳмонларга эсдалик совғалари топширилди.