Ipak qurti boqish va pilla yetishtirish mavsumi uyushqoqlikda oʻtkazilmoqda

Ipak qurti boqish va pillachilik Oʻzbekistonning boy madaniy merosining ajralmas qismidir. Ushbu soha koʻp asrlik tarixga ega. Ipak qurti yetishtirish va boqishning tarixi miloddan avvalgi II asrga borib taqaladi. Ipak Buyuk Ipak yoʻli orqali Sharq va Gʻarbni bogʻlagan savdo yoʻllarida muhim hamda qimmatbaho mahsulot vazifasini oʻtagan.

Bu soha mamlakat iqtisodiyotida ham katta ahamiyat kasb etadi. Shu sababli ham mamlakatimizda pillachilikni rivojlantirishga davlat tomonidan katta eʼtibor qaratilmoqda. Pillani qayta ishlash sohasida koʻplab yangiliklar joriy etilib, bu oʻz navbatida mahsulotlarning xalqaro bozorlarda raqobatbardoshligini oshirishga xizmat qilmoqda. Shu bilan birga Oʻzbekistonda ipakchilik sohasida ilmiy-tadqiqot ishlari va innovatsion yondashuvlar ham faollashtirilmoqda, bu esa mamlakatning ipakchilik sanoatini yanada rivojlantirishga yordam beradi. Mazkur sohada davlat tomonidan berilayotgan subsidiyalar va soliq imtiyozlari, shuningdek, ilmiy-tadqiqot ishlariga ajratilayotgan mablagʻlar ipakchilikni yanada rivojlantirish uchun muhim omil hisoblanadi. Bularning barchasi Oʻzbekistonning ipakchilik sanoatini yangi bosqichga koʻtarishga va uning jahon bozoridagi oʻrnini mustahkamlashga xizmat qiladi.

Amudaryo tumanida ham ipak qurtini boqish va pilla yetishtirishga katta eʼtibor qaratiladi. Tumanda har yili  Qoraqalpogʻiston boʻyicha karvoni eng ogʻir va salmoqli boʻlgan pilla xirmoni bunyod etiladi. Amudaryolik pillakorlar bu yilgi mavsumni ham uyushqoqlik bilan oʻtkazmoqdalar. Har yili pillachilik bilan shugʻullanib, daromad topayotgan oilalar bu yil ham ipak qurti qutilarini olib, parvarishlashni allaqachon boshlab yubordilar.

Pillachilik sohasida asosan qishloq ayol-qizlari mavsumiy ish bilan band boʻlishadi. Shu sababli tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova pillakor xotin-qizlar holidan xabar olib, ipak qurtini parvarishlash jarayoni bilan yaqindan tanishib, bu borada yuzaga kelayotgan muammolarni tegishli masʼullar ishtirokida tezkor bartaraf qilish chorlarini koʻrib kelmoqda.

Ipak qurti parvarishining ham oʻziga xos mashaqqati va sir-asrorlari bor. Eng avvalo urugʻlarning sifati va parvarish sharoitlari mahsulotning, yaʼni olinadigan pillaning sifatiga taʼsir koʻrsatadi. Ipak barcha davrlarda ham xaridorgir mahsulot boʻlib kelgan. Shu sababli ham Respublikamizda sifatli pilla xom ashyosi yetishtirish, yetishtirilgan pilladan jahon standarti talablariga javob beradigan yuqori sifatli xom ipak olish, ipakli mahsulotlar sifatini yaxshilash va assortiment turlarini kengaytirish, tannarxini kamaytirish, mahsulot sifatiga salbiy taʼsir koʻrsatuvchi omillarni aniqlash va ularni bartaraf qilishga alohida eʼtibor qaratilmoqda.

Bu harakatlarning qanchalik samarali boʻlishi eng avvalo ipak qurti boquvchi pillakorlarga bogʻliq. Buni toʻgʻri anglab yetgan pillakorlar oʻz ishlarini sidqidildan bajarib, ipakchilik tarmogʻining rivojiga oʻz hissalarini qoʻshmoqdalar. Ushbu tarmoqning rivojlanishi kelgusida pillakorlarning daromad manbaini yanada oshiribgina qolmay, yetishtirilgan pilla miqdorining koʻpayishiga, undan olinadigan xom ipak, ipakli mahsulotlar miqdorining ortishiga hamda xorijiy davlatlarga eksport qilish hajmining koʻpayishiga sharoit yaratadi. Bu esa oʻz navbatida Respublikamiz iqtisodiyotining rivojlanishiga hamda aholi turmushining yanada farovon boʻlishiga taʼsir koʻrsatadi.

Amudaryo tumani hokimining oʻrinbosari, Oila va xotin-qizlar boʻlimi boshligʻi Goʻzal Saburova pillakor xotin-qizlarga ularning mehnatlari qanchalik muhim iqtisodiy va ijtimoiy ahamiyatga ega ekanligini tushuntirish bilan birga pillachilik tarmogʻini yanada rivojlantirish, kasanachilarning moddiy manfaatdorligini oshirish borasida mamlakatimizda amalga oshirilayotgan islohotlar haqida maʼlumotlar bermoqda.