QILIChBOY OVULIDAGI 27-SONLI MTT TARBIYaChILARI “BALLI, QIZLAR!” KOʻRIK-TANLOVIDA FAOL QATNAShIShDI

Yurtimizda Navroʻzi olam shukuhi kezayotgan ayni kunlarda barcha hududlarda tadbirlar oʻtkazilib, bayram xush kayfiyatda kutib olinmoqda. Ovul va mahallalarda sumalak sayillari, korxona-tashkilotlar, taʼlim muassasalarida esa turli tadbirlar tashkil etilib, hammaga bayramona kayfiyat ulashilmoqda.

Qilichboy ovulidagi 27-sonli maktabgacha taʼlim tashkilotida ham bahor bayramlari munosabati bilan, shuningdek, yuqori malakali tarbiyachilarni aniqlash va ragʻbatlantirish, ularning pedagogik mahorati, ijodiy qobiliyatlarini rivojlantirish, ilgʻor tajribalarini keng ommalashtirish, kasbiy faoliyatda sogʻlom raqobat hamda ijodkorlik muhitini yaratish maqsadida “Balli, qizlar!” koʻrik-tanlovi oʻtkazildi. Navroʻz bayrami arafasida oʻtkazilgan ushbu tadbirga fuqarolar yigʻini masʼullari, ovul faollari, ota-onalar va shu yerda ishlagan, ayni kunda nafaqadagi onaxonlar, tarbiyachilar tashrif buyurishdi.

Tadbirni tashkilot direktori Muhabbat Rahimboyeva ochib berdi va mehmonlarni bahor bayramlari bilan qutlab, tanlov qatnashchilariga omad tiladi. Shuningdek, tashkilotda uzoq yillar mudiralik qilib, ayni paytda qarilik gashtini surayotgan Roʻzika Asqarova, tarbiyachi boʻlib ishlagan onaxon Oygul Yusupova va boshqalar, ovulning faol onaxonlaridan Amina Yusupovalar ham soʻzga chiqib, barchani yaqinlashib kelayotgan Navroʻzi olam bilan tabriklashdi.

Tashkilot tarbiyachilari oʻrtasida boʻlib oʻtgan ushbu koʻrik-tanlovda tayyorlov guruhi tarbiyachilari Malohat Ibodullayeva, Ziyoda Davletova, Gulzebo Qilichbekova, Laylo Atajonovalar, katta guruh tarbiyachilari Dilrabo Bozorboyeva, Shahlo Jumamurodovalar ishtirok etishdi. Tanlovda qatnashgan tarbiyachi-qizlar beshta shart asosida oʻz iqtidorlarini, bilimdonliklari, chaqqonliklari va epchilliklarini koʻrsatishga harakat qilishdi. Tanlov davomida qizlar shartlarga koʻra, salomlashish odobini, savol-javoblar asosida bilimdonliklari, kasbiy mahoratini, qoʻl ishlari, pazandaliklari va isteʼdodlarini koʻrsatishdi.

Tanlovning birinchi shartiga koʻra tarbiyachilar salomlashish odobini talqin qilib berishdi va taʼlim-tarbiya jarayonida yosh avlodga eng avvalo bu odobni singdirishayotganini ifoda etishdi. Keyingi, savol-javob sharti davomida esa tashkilotda qoʻllanilayotgan “Ilk qadam” dasturi va boshqa taʼlim-tarbiya usullari xususidagi bilimdonliklarini sinovdan oʻtkazishdi.

Bahoriy bezak deb nomlangan shart boʻyicha esa gulqogʻozlardan turfa bahoriy gullar, bayramlarga tabriknomalar, plastilindan multfilmlar qahramonlarini yasab mahoratlarini koʻrsatishdi. Oʻzlari yoqtirgan salatlarni tayyorlash sharti boʻyicha esa turli koʻklam salatlarini tayyorlab, pazandaliklarini namoyish etishdi. Erkin mavzu sharti davomida esa qizlar isteʼdodli ekanliklarini ham koʻrsatib, qoʻshiqlar kuylashdi, raqslar ijro etib, tadbirga yanada fayz kiritishdi. Ayniqsa, maromiga yetkazib ijro etilgan ona allasi juda taʼsirli chiqdi va barchaga manzur boʻldi.

Qizlarning har birining chiqishlari hakamlar hayʼati tomonidan odilona baholab borildi va tayyorlov guruhi tarbiyachisi Malohat Ibodullayeva koʻrik-tanlovning mutlaq gʻolibi deb topilib, 1-oʻrin berildi. Koʻrik-tanlovda ishtirok etgan boshqa qizlar ham “Eng ijodkor tarbiyachi”, “Eng tashabbuskor tarbiyachi”, “Eng epchil tarbiyachi”, “Eng zukko tarbiyachi”, “Eng nafosatli tarbiyachi” nominatsiyalariga ega boʻlishdi.

Koʻrik-tanlov davomida Navroʻz, koʻklam, goʻzal yurt madhiga bagʻishlab ijro etilgan qoʻshiqlar, oʻzbek milliy kiyimlaridagi bolajonlar, atlas, adras koʻylaklardagi jajji qizaloqlar ishtirokidagi ajoyib raqslar barchani yanada xushnud etdi. Qiziqarli oʻtgan tadbir barchada katta taassurot qoldirdi.

O.Xudoyberganova.