Maktabgacha taʼlim tashkilotlari tarbiyachilari ishtirokida ijodkorlik koʻrgazmasi oʻtkazildi

Joriy yilning 19-fevral kuni Amudaryo tumanidagi “Ilk rivojlanish markazi” binosida tumanda faoliyat yuritayotgan maktabgacha taʼlim tashkilotlari xodimlari hamda ularga masʼul sifatida biriktirilgan pedagoglar ishtirokida amaliy-koʻrgazmali seminar boʻlib oʻtdi. Amudaryo tumani Maktabgacha va maktab taʼlimi boʻlimi boshligʻi tomonidan tashkil etilgan ushbu tadbirda asosiy eʼtibor “Ilk qadam” davlat oʻquv dasturi talablari asosida “Ijodkorlik ustaxonalari”da qoʻl mehnati orqali yaratiladigan har xil turdagi oʻyinchoqlar va koʻrgazmali qurollardan samarali foydalanish masalalariga qaratildi.

Seminarda Maktabgacha taʼlim tashkilotlari faoliyatini muvofiqlashtirish shuʼbasi bosh metodisti Hulkar Babajanova va shuʼba metodisti Saule Patullayevalar soʻzga chiqib, tumanda maxsus “Ijodkorlik ustaxonasi” tashkil etilganini, unda har bir maktabgacha taʼlim tashkilotidan biriktirilgan xodimlar muntazam ravishda ijodiy ishlar olib borayotganini taʼkidlab oʻtdi. Yaratilgan didaktik oʻyinchoqlar va ularni tayyorlagan ijodkor pedagoglarning ilgʻor ish tajribalari kelgusida barcha xodimlarga ommalashtirilishi taʼkidlab oʻtildi.

Tadbirda maktabgacha taʼlim tashkilotlarida tashkil etilgan "Turon kichkintoylari" bolalar teatr jamoalari uchun maxsus qoʻl mehnati bilan yaratilgan koʻrgazmali qurollar orqali sahna koʻrinishlari namoyish etildi. Yigʻilganlar eʼtiboriga 29-sonli davlat maktabgacha taʼlim tashkiloti tarbiyachisi Maxsuda Qalandarova tomonidan qoʻgʻirchoq teatri yoʻnalishida “Ur toʻqmoq” ertagi jonli tarzda havola qilindi.

Shuningdek, 18-sonli maktabgacha taʼlim tashkiloti tarbiyachisi Sanobar Bazarbayeva soya teatri usulida “Kapalak” ertagini mahorat bilan koʻrsatib berdi. 8-sonli maktabgacha taʼlim tashkiloti vakili Shahlo Eshimbetova esa barmoq va qoʻlqop teatri yoʻnalishidan foydalangan holda “Sholgʻom” ertagini sahnalashtirdi. Bundan tashqari, 45-sonli maktabgacha taʼlim tashkiloti tarbiyachisi Komila Amankulova stol teatri yordamida “Tulki va turna” ertagini yigʻilish ishtirokchilariga namoyish qildi. Ushbu rang-barang sahna koʻrinishlari seminar ishtirokchilari tomonidan katta olqishlar bilan kutib olindi va mutaxassislarda juda katta taassurot qoldirdi.

Seminarning navbatdagi qismida koʻplab ijodkor pedagoglar oʻzlarining qoʻl mehnati asosidagi mahsulotlari bilan yaqindan oʻrtoqlashdilar. Jumladan, 13-sonli davlat maktabgacha taʼlim tashkiloti tarbiyachisi Oysha Safarbayeva, 36-sonli davlat maktabgacha taʼlim tashkiloti tarbiyachisi Nasiba Babaniyazova hamda 4-sonli davlat maktabgacha taʼlim tashkiloti tarbiyachisi Oʻgʻiljon Rajabovalar oʻzlari yaratgan didaktik oʻyinchoqlar namoyishini oʻtkazdi. 9-sonli davlat maktabgacha taʼlim tashkiloti tarbiyachisi Mohira Xolimbetova, 2-sonli davlat maktabgacha taʼlim tashkiloti tarbiyachisi Mohira Jalalova va 17-sonli davlat maktabgacha taʼlim tashkiloti tarbiyachisi Muborak Yuldashevalar tomonidan tayyorlangan didaktik oʻyinchoqlar ham seminar ishtirokchilarida katta taassurotlar qoldirdi. Ayniqsa, 19-sonli davlat maktabgacha taʼlim tashkiloti tarbiyachisi Asaloy Seytbayeva hamda 38-sonli davlat maktabgacha taʼlim tashkiloti tarbiyachisi Salomat Qurbanbayevalar tomonidan yaratilgan oʻziga xos didaktik oʻyinchoqlar bolalarning har tomonlama rivojlanishiga hissa qoʻshishi alohida qayd etildi.

Mutaxassislar mazkur koʻrgazmali qurollarning qanday materiallardan va qay usulda yasalishini, qaysi mavzularda hamda qaysi yosh guruhlarida foydalanilishini batafsil tavsiflab berdilar. Eng muhimi, ushbu vositalar orqali bolalarda qanday bilim va koʻnikmalar shakllanishi alohida tushuntirildi.

Seminar yakunida kun tartibidagi masala yuzasidan qizgʻin savol-javoblar oʻtkazilib, qatnashuvchilarning barcha fikr va mulohazalari tinglandi. Tashkilotchilar kelgusida qoʻl mehnati bilan oʻyinchoqlar yaratish boʻyicha maxsus qoʻllanmalar ishlab chiqilib, yaratilgan didaktik materiallar boʻyicha ijodkor pedagoglarning ilgʻor ish tajribasi barcha taʼlim tashkilotlarida keng ommalashtirilishini alohida qayd etdilar.