Taʼlim sifatini oshirish masalasiga bagʻishlangan yigʻilish boʻlib oʻtdi

Mamlakatimizda taʼlim-tarbiya berish sifatini oshirish, sohada yangi texnologiya va innovatsiyalarni joriy etish borasida qator yangi islohotlar amalga oshirilmoqda. Muhtaram Prezidentimiz tomonidan ilgari surilgan “Yangi Oʻzbekiston – maktab ostonasidan boshlanadi”, degan ezgu gʻoya asosida bu sohada katta ishlar amalga oshirilmoqda. Soʻnggi yillarda hududlarda koʻplab zamonaviy maktablar barpo etildi. Prezident maktablari, ijod maktablari hayotimizga kirib keldi, ixtisoslashtirilgan maktablar tarmogʻi kengaytirildi. Yangi darsliklar va oʻquv qoʻllanmalari yaratildi.

Joriy yilning 13-fevral sanasida Amudaryo tumani 76-sonli maktabda Qoraqalpogʻiston Respublikasi boʻyicha Milliy gvardiya boshqarmasi boshligʻi polkovnik Muxtor Yusupov ishtirokida tashkil etilgan yigʻilish ham hududda taʼlim sifatini yanada rivojlantirishga bagʻishlandi.

Yigʻilishda tuman hokimi oʻrinbosari Nodir Kamolov, tuman Maktabgacha va maktab taʼlimi boʻlimi boshligʻi Yalgʻash Shomuradov, Milliy gvardiya tuman boʻlimi boʻlimi boshligʻi podpolkovnik Bahtiyor Atajanov qatnashdilar hamda ovul va mahallalar masʼullari, ota-onalar, barcha maktablar direktorlari va direktor oʻrinbosarlari, oʻqituvchilari onlayn ishtirok etdilar.

Uchrashuvda davlatimiz rahbarining joriy yil 5-fevral sanasida oʻtkazilgan ijtimoiy sohaga bagʻishlangan videoselektr yigʻilishida belgilab berilgan ustuvor vazifalar xususida soʻz yuritildi.

Qayd etilishicha, Maktablarda ogʻriqli masalalardan biri, bu – tarbiya va maʼnaviyat boʻlib, oʻtgan yili voyaga yetmaganlar 3,5 mingta jinoyat sodir etgan. Shundan 2 ming 280 nafarini maktab oʻquvchilari tashkil qiladi. Soʻrov maktab direktoridan boʻlayotgani, lekin bolalar masalalari boʻyicha milliy komissiyaga masʼul hokimlar har hafta bitta maktabga borib, oʻquvchilarni sharoiti va tarbiyasi bilan shugʻullanmayotgani, shu munosabat bilan maktablardagi inspektor-psixologlar shtati Ichki ishlar vazirligidan Milliy gvardiya tizimiga oʻtkazilishi belgilandi.

Shuningdek, yigʻilishda oʻquvchilarni vatanparvarlik ruhida tarbiyalash orqali ularda “huquqbuzarlikka qarshi immunitet” yaratish boʻyicha tizim qilish zarurligi, oʻquvchilarning boʻsh vaqtini mazmunli oʻtkazish va kasbga yoʻnaltirish, tarbiyasi va oʻqishida muammo boʻlgan oʻquvchilarning ota-onalari va mahalla faollari bilan birga ishlab, muammolarni yechishga qaratilgan aniq choralarni amalga oshirish zararligi qayd etildi.

Mahalla raislari har oy maktablarda ota-onalar bilan uchrashib, mahalla va maktabdagi muhitni muhokama qilishi maqsadga muvofiq ekani koʻrsatib oʻtildi.

Maktablarda oʻquvchilarning davomadini taʼminlashga mahalla, ota-onalar, maktab birdek masʼul ekanligi, farzandlarimizga oʻz vaqtida toʻgʻri va yetarli taʼlim-tarbiya berish orqali ertangi kun uchun barkamol avlod yetishtirishga zamin yaratilishi xususida soʻz yuritildi.

Shuningdek, maktabga moslashish va kitobni sevishga oʻrgatish, yaxshi xulqli boʻlish, atrofidagilar bilan muloqot qilishni oʻrganish va bilim olishga kuchli ishtiyoqni shakllantirish, kasb tanlash, jamiyatga moslashish, katta hayotga qadam qoʻyish borasida farzandlarga yoʻl-yoʻriq berish zarur ekanligi taʼkidlandi.

Muhtaram Prezidentimiz taʼbiri bilan aytganda, yuqorida aytilgan tashabbuslar amaliyotda yoʻlga qoʻyilsa, ota-onada masʼuliyat, oʻqituvchida majburiyat, oʻquvchida ishonch, taʼlim va tarbiyada sifat, mahallada esa nazorat boʻladi.

Charos Arslonova, tuman hokimligining Axborot xizmat rahbari