Таълим сифатини ошириш масаласига бағишланган йиғилиш бўлиб ўтди

Мамлакатимизда таълим-тарбия бериш сифатини ошириш, соҳада янги технология ва инновацияларни жорий этиш борасида қатор янги ислоҳотлар амалга оширилмоқда. Муҳтарам Президентимиз томонидан илгари сурилган “Янги Ўзбекистон – мактаб остонасидан бошланади”, деган эзгу ғоя асосида бу соҳада катта ишлар амалга оширилмоқда. Сўнгги йилларда ҳудудларда кўплаб замонавий мактаблар барпо этилди. Президент мактаблари, ижод мактаблари ҳаётимизга кириб келди, ихтисослаштирилган мактаблар тармоғи кенгайтирилди. Янги дарсликлар ва ўқув қўлланмалари яратилди.

Жорий йилнинг 13 февраль санасида Амударё тумани 76-сонли мактабда Қорақалпоғистон Республикаси бўйича Миллий гвардия бошқармаси бошлиғи полковник Мухтор Юсупов иштирокида ташкил этилган йиғилиш ҳам ҳудудда таълим сифатини янада ривожлантиришга бағишланди.

Йиғилишда туман ҳокими ўринбосари Нодир Камолов, туман Мактабгача ва мактаб таълими бўлими бошлиғи Ялғаш Шомурадов, Миллий гвардия туман бўлими бўлими бошлиғи подполковник Баҳтиёр Атажанов қатнашдилар ҳамда овул ва маҳаллалар масъуллари, ота-оналар, барча мактаблар директорлари ва директор ўринбосарлари, ўқитувчилари онлайн иштирок этдилар.

Учрашувда давлатимиз раҳбарининг жорий йил 5 февраль санасида ўтказилган ижтимоий соҳага бағишланган видеосэлектр йиғилишида белгилаб берилган устувор вазифалар хусусида сўз юритилди.

Қайд этилишича, Мактабларда оғриқли масалалардан бири, бу – тарбия ва маънавият бўлиб, ўтган йили вояга етмаганлар 3,5 мингта жиноят содир этган. Шундан 2 минг 280 нафарини мактаб ўқувчилари ташкил қилади. Сўров мактаб директоридан бўлаётгани, лекин болалар масалалари бўйича миллий комиссияга масъул ҳокимлар ҳар ҳафта битта мактабга бориб, ўқувчиларни шароити ва тарбияси билан шуғулланмаётгани, шу муносабат билан мактаблардаги инспектор-психологлар штати Ички ишлар вазирлигидан Миллий гвардия тизимига ўтказилиши белгиланди.

Шунингдек, йиғилишда ўқувчиларни ватанпарварлик руҳида тарбиялаш орқали уларда “ҳуқуқбузарликка қарши иммунитет” яратиш бўйича тизим қилиш зарурлиги, ўқувчиларнинг бўш вақтини мазмунли ўтказиш ва касбга йўналтириш, тарбияси ва ўқишида муаммо бўлган ўқувчиларнинг ота-оналари ва маҳалла фаоллари билан бирга ишлаб, муаммоларни ечишга қаратилган аниқ чораларни амалга ошириш зарарлиги қайд этилди.

Маҳалла раислари ҳар ой мактабларда ота-оналар билан учрашиб, маҳалла ва мактабдаги муҳитни муҳокама қилиши мақсадга мувофиқ экани кўрсатиб ўтилди.

Мактабларда ўқувчиларнинг давомадини таъминлашга маҳалла, ота-оналар, мактаб бирдек масъул эканлиги, фарзандларимизга ўз вақтида тўғри ва етарли таълим-тарбия бериш орқали эртанги кун учун баркамол авлод етиштиришга замин яратилиши хусусида сўз юритилди.

Шунингдек, мактабга мослашиш ва китобни севишга ўргатиш, яхши хулқли бўлиш, атрофидагилар билан мулоқот қилишни ўрганиш ва билим олишга кучли иштиёқни шакллантириш, касб танлаш, жамиятга мослашиш, катта ҳаётга қадам қўйиш борасида фарзандларга йўл-йўриқ бериш зарур эканлиги таъкидланди.

Муҳтарам Президентимиз таъбири билан айтганда, юқорида айтилган ташаббуслар амалиётда йўлга қўйилса, ота-онада масъулият, ўқитувчида мажбурият, ўқувчида ишонч, таълим ва тарбияда сифат, маҳаллада эса назорат бўлади.

Чарос Арслонова, туман ҳокимлигининг Ахборот хизмат раҳбари