KELAJAK BUNYoDKORI, YuRT TAYaNChI BOʻLIShNI MAQSAD QILGAN QANGLILIK YoShLAR

Yoshlar – yurtimiz kelajagi, millat va jamiyat tayanchi, ertangi kunimizning davomchilaridir. Mamlakatimizda yoshlar siyosati borasida olib borilayotgan ishlarning mazmun-mohiyati ham ularning taʼlim-tarbiya olishlari, odob-axloqli va sogʻlom, yuksak maʼnaviyatli, har tomonlama salohiyatga ega kasb egalari boʻlishlariga qaratilgan. Ularning yurtimiz ravnaqiga munosib hissa qoʻsha oladigan barkamol avlod boʻlib voyaga yetishlari uchun barcha shart-sharoitlar, yetarli imkoniyatlar yaratilgan.

Yurtimizda yoshlar uchun yaratilgan shart-sharoitlardan foydalanib, yutuqlarga erishayotgan, chuqur bilim olishga, hunar oʻrganishga intilayotgan, bilimli va maʼnaviyatli, tafakkuri va dunyoqarashi keng yoshlar talaygina. Amudaryo tumanida ham ana shunday intiluvchan, oʻz iqtidori, zakovati bilan tumanimizni dunyoga tanitayotgan yoshlar koʻpchilikni tashkil qiladi.

Amudaryo tumanidagi “Taraqqiyot koʻzgusi” gazetasi tahririyatining “Bilimli va maʼnaviyatli yoshlar bilan – Uchinchi Renessans sari” nomli grant loyihasini amalga oshirish orqali mana shunday yurtga munosib, komil insonlar boʻlib voyaga yetayotgan yoshlarni tengdoshlariga namuna, oʻrnak qilib koʻrsatish orqali ularning safini yanada kengaytirish maqsad qilingan.

Grant loyihasi ish rejasiga muvofiq ayni paytda Qangli ovulidagi 29-sonli maktabda tahsil olib, kelajakda yetuk insonlar, kelajak bunyodkorlari, yurt tayanchi boʻlishni maqsad qilib, aʼlo baholarga oʻqiyotgan oʻquvchilar haqida lavha tayyorlash uchun taʼlim maskaniga tashrif buyurdik.

4-sektor hududida joylashgan ushbu maktab 330-oʻringa moʻljallangan boʻlib, hozirgi kunda 405 nafar oʻquvchiga 46 nafar oʻqituvchi tomonidan taʼlim-tarbiya berilmoqda. Maktab binosi 2008-yilda yangidan qurilgan boʻlib, oʻquvchilarning sifatli taʼlim olishlari uchun barcha sharoitlar yaratilgan. Oʻquv muassasasida fan kabinetlari, informatika fani xonasi, faollar va sport zallari, oshxona mavjud. Taʼlim samaradorligini oshirishga alohida eʼtibor qaratilayotgan ushbu taʼlim maskanini oʻtgan oʻquv yilida bitirgan 14 nafar bitiruvchi oʻquvchilardan 10 nafari oliy taʼlim muassasalariga oʻqishga kirishga muvaffaq boʻlishdi va maktab 93,3 foiz bilan yashil toifaga kiritildi.

Maktabning aʼlochi oʻquvchilaridan biri boʻlgan Madina Kushmuradova hozir 9-sinfda tahsil olmoqda. Matar yop mahallasida 2009-yilda tugʻilgan Madina oilada katta farzand. Ota-onasi farzandlarining komil insonlar boʻlib voyaga yetishlari uchun alohida eʼtibor qaratishganidan Madinaning bilim olishga qiziqishi katta. Hozir u fanlarni yaxshi oʻzlashtirish bilan birga rus va ingliz tillarini mustaqil oʻrganmoqda. Shu bilan birga matematika, ingliz tili, biologiya, ximiya fanlaridan maktabda tashkil etilgan toʻgaraklarga qatnashmoqda.

Madina 2022-2023 oʻquv yilida Al-Xorazmiy olimpiadasida tuman bosqichida biologiya fanidan qatnashib, 1-oʻrinni egallashga muvaffaq boʻldi. Ushbu olimpiadaning Qoraqalpogʻiston Respublikasi bosqichida ham muvaffaqiyatli ishtirok etib, oʻz iqtidorini sinovdan oʻtkazdi. Oʻtgan 2023-2024 oʻquv yilida ham biologiya fanidan olimpiadaning tuman bosqichida faxrli 1-oʻrinni egalladi va Qoraqalpogʻiston bosqichida qatnashdi.

Shu maktabning 10-sinf oʻquvchisi Mohinur Shomurodova ham faol va bilimdon oʻquvchilardan biri. Qangli ovulida ziyoli oilada tugʻilgan Mohinurning ota-onasi taʼlim sohasida faoliyat koʻrsatishadi. Yosh avlod taʼlim-tarbiyasiga oʻz hissalarini qoʻshib kelayotgan bu fidoyi insonlar oilada farzandlarining chuqur bilim olishlariga, kitobxonlikka qiziqtirishgani samarali natijalar bermoqda.

Barcha fanlarni chuqur oʻzlashtirishga, bilim asoslarini mukammal bilib olishga intilayotgan Mohinur maktabda matematika, ingliz tili, biologiya fanlaridan toʻgaraklariga qatnashadi. U 2022-2023 oʻquv yilida Fanlar olimpiadasining tuman bosqichida biologiya fanidan 3-oʻrinni egallab, Qoraqalpogʻiston Respublikasi bosqichida muvaffaqiyatli ishtirok etdi. Joriy 2023-2024 oʻquv yilida ham biologiya fanidan tuman bosqichida faxrli 2-oʻrinni egalladi va Qoraqalpogʻiston bosqichida oʻz bilimini sinovdan oʻtkazdi. Shuningdek, tumanimizda boʻlib oʻtgan “Zakovat” intellektual oʻyinida faol ishtirok etib, bilimdonligi, zukkoligi bilan eʼtibor qozondi. Jamoa ushbu oʻyinda 1-oʻrinni egallab, tuman gʻolibi boʻldi va Qoraqalpogʻiston Respublikasida eng kuchli 10 ta jamoa qatoridan joy oldi.

Maktabning 11-sinf oʻquvchisi Jahongir Yendirboyev ham aʼlo baholarga oʻqib, faolligi bilan tengdoshlariga namuna boʻlib kelmoqda. Oilada kitobxonlikka va ilm olishga eʼtibor kuchli boʻlgani sababli Jahongirning opalari hozirgi kunda oliy taʼlim muassasalarida tahsil olishmoqda.

Biri Nukus davlat pedagogika instituti, biri Nukus davlat tibbiyot instituti talabalari boʻlgan opalariga havas qilgan Jahongir ham oliygohda tahsilni davom ettirishni maqsad qilgan. Ushbu ezgu maqsadini roʻyobga chiqarish uchun darslardan tashqari paytda matematika, tarix, ingliz tili va informatika toʻgaraklarida oʻz bilimini oshirmoqda. U 2023-2024 oʻquv yilida Fanlar olimpiadasida informatika fanidan tumanda faxrli 3-oʻrinni egalladi. Undan tashqari, “Zakovat” intellektual oʻyinida tumanda 1-oʻrinni egallab Qoraqalpogʻiston Respublikasida ham ishtirok etdi va eng kuchli 10 ta jamoa qatoridan joy oldi.

Maktabning faol oʻquvchilaridan biri boʻlgan Sevinch Sultonmurodova ham bobosi Sultonmurod Avezimbetov kabi oʻqituvchi boʻlishni maqsad qilgan. Barcha fanlarni aʼlo darajada oʻzlashtirib kelayotgani, darslarda va jamoat ishlarida faol boʻlgani uchun uni oʻqituvchilari doim barchaga oʻrnak qilib koʻrsatadi. Sevinchoy, ayniqsa, matematika, fizika va geografiya fanlariga juda qiziqadi va ushbu fanlardan toʻgaraklarga qatnashadi. Oʻz iqtidorini sinab 2023-2024 oʻquv yilida Fanlar olimpiadasining tuman bosqichida matematika fanidan qatnashdi va faxrli 2-oʻrinni egalladi.

Yoshlar – kelajak bunyodkori, ertangi kunimiz egalaridir. Shu bois, yurtimizda yoshlar taʼlim-tarbiyasi, ularning hayotda barkamol shaxs sifatida kamol topishi uchun zarur shart-sharoit va imkoniyatlar yaratilgan. Qanglilik yoshlar ham kelajak bunyodkori, yurt tayanchi boʻlishni, kelgusida mamlakatimiz ravnaqiga munosib hissa qoʻshishni maqsad qilib, maktabda ustozlaridan ilm sirlarini mukammal oʻrganishga intilishmoqda.

 O.Xudoyberganova.