XALQ SOGʻLOM BOʻLSAGINA JAMIYaTDA YuKSAK TARAQQIYoTGA ERIShILADI

Har kim sogʻligini saqlash va malakali tibbiy xizmatdan foydalanish huquqiga ega.

Konstitutsiyaning 48-moddasidan.

Mamlakatimizda tibbiy xizmatlar sifati va qamrovini kengaytirishga qaratilgan kompleks chora-tadbirlar amalga oshirilmoqda. Bu borada Amudaryo tumanida amalga oshirilayotgan ishlar ham eʼtiborga molik.

Hozirgi kunda tumanimizda  1ta KTMP, 9ta oilaviy poliklinika, 4ta oilaviy shifokorlik punktlari   tomonidan  aholiga malakali tibbiy xizmat koʻrsatib kelinmoqda, shu bilan birga aholiga tibbiy xizmat koʻrsatishni yaqinlashtirish maqsadida 2022-yildan 11ta mahalla   tibbiyot punkti faoliyati ham yoʻlga qoʻyildi.

Sir emas, avvallari birlamchi tibbiy-sanitariya muassasalarida oilaviy shifokor qabuliga kelgan aksariyat fuqarolarga dori-darmonlar retsepti yozib berilar, bu holat surunkali kasalligi bor va shoshilinch tibbiy yordamga muhtoj bemorlarga, moddiy imkoniyati cheklangan oilalarga qiyinchilik tugʻdirardi. Endilikda  Sogʻlikni saqlash vazirligining tegishli buyrugʻiga muvofiq, oilaviy shifokorlik punktlari, oilaviy poliklinikalar, koʻp tarmoqli markaziy poliklinikalar, tuman (shahar) markaziy shifoxonalarida va tugʻuruqxonalarda koʻrsatiladigan tibbiy yordamning kafolatlangan hajmlari roʻyxati belgilandi.

Har bir fuqaro elektron dastur orqali oilaviy shifokorga biriktiriladi va doimiy muloqotda boʻlish uchun imkoniyat yaratiladi; Davlat tomonidan bepul taqdim etiladigan tibbiy xizmatdan foydalanadi; Asossiz dori vositalarini tavsiya etish va statsionarga yotishga chek qoʻyiladi. Natijada tibbiy xizmatlar uchun norasmiy toʻlovlar bartaraf etilib, fuqarolar sogʻlomlashtirish dasturlari bilan toʻliq qamrab olinadi.

Prezidentimizning 2020-yil 10-noyabrdagi “Aholining sogʻlom ovqatlanishini taʼminlash boʻyicha qoʻshimcha chora-tadbirlar toʻgʻrisida”gi Qaroriga muvofiq tuman Tibbiyot birlashmasi mutaxassislari  tomonidan tumandagi 49 OFY va MFYlarda, maktablarda, maktabgacha taʼlim tashkilotlari, korxona va tashkilotlarda haftaning  dushanba kunlari “Stressga qarshi kurash kuni” deb belgilanib, stress keltirib chiqaradigan kasalliklar prolfilaktikasi, seshanba – “Tuz va shakarni cheklash kuni”da qandli diabetdan saqlanish, chorshanba – “Tamakisiz kun”da chekishdan voz kechishning afzalliklari, payshanba – “Sogʻlom ovqatlanish kuni”da sogʻlom ovqatlanish tamoyillari toʻgʻrisida “Salomatlik saboqlari”  tarzidagi suhbatlar oʻtkazilayotgani oʻzining ijobiy natijasini bermoqda.

Haftaning juma va shanba kunlari esa shifokorlar doimo xalq bilan birga piyoda yurish va “Salomatlik uchun ming qadam” tadbirlarida ishtirok etishadi.

Jismoniy faollikning inson salomatligiga ijobiy taʼsiri, gipodinamiya oqibatida kelib chiqadigan kasalliklar profilaktikasi, aholining keng qatlamlari, ayniqsa, yoshlar oʻrtasida sport, nafas mashqlari texnikasi, faol yurishning va jismoniy mashqlarning kasalliklarning oldini olishdagi ahamiyati, ayol-qizlar salomatligi kabi mavzularda tibbiyot birlashmasi, OP, OShPlar maydonchalarida, 30-sonli maktab sport zalida, OFY, MFYlar aholisi, muassasa, tashkilotlar xodimlari, maktab va maktabgacha taʼlim tashkilotlari oʻqituvchi, oʻquvchi va tarbiyalanuvchilari uchun gimnastrada, faol va sportcha yurish, sport musobaqalari tashkil qilinib, ishtirokchilarga tegishli maslahatlar beriladi.

Shunisi eʼtiborliki, tibbiy muolajalarni sport-sogʻlomlashtirish mashqlari bilan birgalikda olib borish xalqimizga ruhiy tetiklik, koʻtarinki kayfiyat baxsh etib, ularning salomatligi mustahkamlanishini taʼminlamoqda. TTBda esa aynan shu yoʻnalishda muolaja choralarini qoʻllash uchun barcha sharoitlarga ega fizioterapiya anjomlari, trenajyor zali, markaziy shifoxona hududida sport mashgʻulotlari olib borish uchun moʻljallangan maxsus maydoncha mavjud.

Yangilangan Konstitutsiyamizning 48-moddasida belgilab qoʻyilganidek, “Har kim sogʻligini saqlash va malakali tibbiy xizmatdan foydalanish huquqiga ega”. Bu borada aholi oʻrtasida sogʻlom turmush tarzini shakllantirish uchun barcha shart-sharoitlar yaratib berilgan. Zero, inson, xalq sogʻlom boʻlsagina jamiyatda yuksak taraqqiyotga erishiladi.

J.YaVKAShEV,

TTB tashkiliy-uslubiy boʻlimi mudiri.