ILGʻOR TERIMChILAR RAGʻBATLANTIRILDI
Amudaryo tumanida joriy yilgi paxta terimi mavsumi qizgʻin davom etmoqda. Fermer xoʻjaliklari pudratchilari va terimda ularga yaqin koʻmakdosh boʻlayotgan uyushmagan aholi vakillari dalalarda yetishtirilgan hosilni yogʻin-sochinli kunlarga qoldirmay, yigʻib-terib olishga va oilalariga qoʻshimcha daromad keltirishga astoydil harakat qilishmoqda.
Kuzning iliq kunlaridan unumli foydalangan holda paxta hosilini nest-nobud qilmasdan yigʻib olish muhim masalalardan biri hisoblanadi. Buning uchun tumanning barcha hududlarida ham jiddiy tayyorgarlik koʻrildi va paxta terimiga sentyabr oyi boshlaridanoq uyushqoqlik bilan kirishildi.
Toshyop ovulidagi Jangil Dusanova rahbarlik qilayotgan “Ozodov Musobek” fermer xoʻjaligida tumanda birinchilardan boʻlib paxta yigʻim-terimiga kirishilgan edi. Xoʻjalikda 57 gektar maydonda paxta yetishtirildi. Bugunga kelib ushbu dalalardan 177 tonnadan ziyod paxta terib olindi. Terimchilar bir kunda 6-8 tonna hosil terib olishib, tumanning “oq oltin” xirmoni yuksalishiga munosib hissa qoʻshishmoqda.
Mazkur fermer xoʻjalik masʼuliyati cheklangan jamiyat shaklidagi “Amudaryotex” xorijiy korxonasi paxta -toʻqimachilik klasteri bilan jami 200 tonna paxta topshirish shartnomasini tuzgan. Ushbu shartnoma yaqin kunlarda ado etiladi. Shu maqsadda terim surʼati kun sayin oshirilmoqda.
Aytish joizki, tumandagi barcha fermer xoʻjaliklarning texnika taʼminoti yaxshilanib, chigit ekish ishlari zamonaviy seyalkalar yordamida amalga oshirilgani, dalalar oʻz vaqtida ekishga tayyorlanib, tobida chigit ekilgani bugungi moʻl hosilning asosi boʻldi. Suvdan oqilona foydalanilgani, mineral oʻgʻitlar bilan oʻz vaqtida ishlov berilgani natijasida hamda dehqonlarning fidokorona mehnati evaziga dalalarda moʻl hosil toʻplanishiga erishildi.
Tumanda 2023-yil paxta yigʻim-terimini optimal muddatlarda amalga oshirish maqsadida chora-tadbirlar dasturi ishlab chiqilgan edi. Shunga koʻra 310ta terim otryadi tashkil qilinib, ularga tajribali mutaxassislardan iborat rahbarlar tayinlandi.
Otryadlarga paxta-toʻqimachilik klasteri va fermer xoʻjaliklarining jami 25 ming 682 nafar terimchilari, har bir otryadga oʻrtacha 82 nafar terimchidan jalb qilindi. Shuningdek terimchilarga oʻz vaqtida terim pullarini berib borish maqsadida bank xodimlari biriktirilgan.
Yigʻim-terim tobora qizgʻin pallaga kirayotgan ayni paytda dala mehnatkashlari uchun qulay ish va dam olish sharoiti yaratilgani “Ozodov Musobek” fermer xoʻjaligi terimchilariga ham gʻanimat kunlardan unumli foydalangan holda samarali mehnat qilish imkonini bermoqda.
Paxta yigʻim-terimi surʼatini oshirish va terimchilarni ragʻbatlantirish maqsadida mazkur fermer xoʻjaligidagi ilgʻor terimchilar 4-sektor rahbariyati va fuqarolar yigʻini tomonidan ragʻbatlantirildi.
4-sektor rahbari hamda Toshyop ovul fuqarolar yigʻini raisi paxtakorlarga kuch-gʻayrat tilab, ilgʻor terimchilar – Nodira Haytboyeva, Sayyora Yoʻldosheva,Feruza Qurbonboyeva, Navbahor Jabborberganova, Gulnoza Yoʻldosheva, Shirin Xudoyberganova, Bogʻdagul Kamolova, Rabiga Sobirovalarga qimmatbaho sovgʻalar topshirildi.
Shu kuni paxta terimchilar uchun dala boshida osh tortilib, sanʼatkorlar ijrosida kontsert dasturi namoyish etildi.
Sevara Ismoilova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
