Amunews.uz veb-sayti tahririyati tomonidan Boʻz solma MFY qoshida yangi kutubxona tashkil qilindi

Amudaryo tumanida faoliyat yuritayotgan amunews.uz veb-sayti tahririyatining Oliy Majlis huzuridagi jamoat fondi tomonidan moliyalashtirilgan “Sogʻlom muhit – sogʻlom hayot” grant loyihasi doirasida koʻplab tadbirlar oʻtkazilmoqda. Loyihaning asosiy maqsadi – internetdagi veb-saytda, ijtimoiy tarmoqlarda maqolalar eʼlon qilish, faol va intiluvchan yoshlarni tengdoshlariga oʻrnak qilib koʻrsatish, tushuntirish, targʻibot ishlarini olib borish orqali mahallalarda, oilalarda ijtimoiy-maʼnaviy muhit barqarorligiga salbiy taʼsir koʻrsatuvchi holatlarning, aholi, ayniqsa yoshlar orasida oʻz joniga qasd qilish, giyohvandlik, erta turmush qurish kabi illatlarning oldini olishdan iboratdir.

Shuningdek, mahallalarda, oilalarda ijtimoiy-maʼnaviy muhit barqarorligini taʼminlash, yoshlarni har tomonlama barkamol avlod qilib voyaga yetkazish ishlarida davlat organlari bilan ijtimoiy sheriklikni kuchaytirish, yoshlarning boʻsh vaqtlarini mazmunli oʻtkazish, aholini kitobxonlikka jalb qilish, ularni jismoniy tarbiya va sportga keng jalb qilish maqsadida tumanning eng chekka ovullarida kutubxona ochish ishlari ham loyiha doirasida koʻzda tutilgan.

Mazkur loyihaning ish rejasiga asosan Prezidentimizning yoshlar taʼlim-tarbiyasi uchun qoʻshimcha sharoitlar yaratish, xotin-qizlar bandligini oshirishga qaratilgan kompleks chora-tadbirlarni oʻz ichiga olgan 5ta tashabbusni amaliyotga joriy etish, yoshlarning dunyoqarashini va maʼnaviyatini yuksaltirish, ularni yot gʻoya va illatlardan ishonchli himoya qilish, yoshlar oʻrtasida kitobxonlikni yanada ommalashtirish maqsadida tumanning eng chekka ovullaridan biri – Boʻz solma mahalla fuqarolar yigʻini qoshida yangi kutubxona tashkil qilindi.

Mazkur kutubxonaga turli janrlardagi adabiyotlar tahririyat tomonidan sovgʻa qilindi. Kutubxona fondidan joy olgan sheʼriyat, nazm, mumtoz adabiyotlar, chet el adabiyoti, bolalar adabiyoti, detektiv janrlardagi adabiyotlar, darslik, qoʻllanmalar, tibbiyot kitoblari, odobnoma kitoblari qishloq ahlining maʼnaviy-madaniy turmushi yanada rivojlanishiga muhim asos boʻla oladi.

Yangi kutubxonaning ochilishi qishloq ahlining ulkan quvonchiga sabab boʻldi. Tadbirda 70-sonli maktabning psixologi Muhayyo Oʻrinboyeva, “Jayxun ilhomlari” nodavlat notijorat tashkilotining raisi Oʻrozali Reyimov, mehnat faxriylaridan Xolmurod Xaytimbetov, Bibijon Rahimova, oʻqituvchi Gulimboy Yusupov, Boʻzsolma fuqarolar yigʻini raisi Bahodir Matyaqubovlar soʻzga chiqib, yangidan ochilgan kutubxona qishloq ahli hayotida muhim maʼnaviy rol oʻynashini taʼkidladilar.

Mehnat faxriysi Xolmurod Haytimbetov ham oʻz shaxsiy hisobidan yangi kutubxonaga badiiy adabiyotlar sovgʻa qildi.

Aytish joizki, loyiha doirasidagi vazifalarni amalga oshirish orqali hududlarda yuz berayotgan salbiy holatlarning oldini olishda davlat organlari bilan ommaviy axborot vositalarining mustahkam ijtimoiy sherikligini yoʻlga qoʻyish, turli mavzularda internatdagi veb-saytlar va ijtimoiy tarmoqlar orqali maqolalar, ijtimoiy roliklar eʼlon qilish koʻzda tutilgan.

Yil davomida loyiha doirasida oʻtkaziladigan tadbirlarga tumanning 10 mingdan ortiq yoshlari qamrab olinadi.

Yangi  kutubxonaning ochilish marosimi ishtirokchilari kitoblarni katta qiziqish bilan koʻrib chiqdilar. Shu kunning oʻzidayoq mahalla yoshlari kutubxonaga aʼzo boʻlib, kitob mutolaasini boshlab yuborishdi. Kutubxonada bolalar adabiyotiga oid kitoblarning koʻpligi qishloqdagi maktab oʻquvchilarida katta qiziqish uygʻotdi.

Qishloq ahli nodavlat notijorat tashkilotining chekka hududlarda yashovchilar uchun koʻrsatayotgan bunday hurmat-eʼtiboridan cheksiz minnatdor boʻldilar.

Shunisi eʼtiborliki, oʻtgan yillar mobaynida “Jayxun ilhomlari” nodavlat notijorat tashkiloti, “Taraqqiyot koʻzgusi” va “Mening oilam” gazetalari hamda Amudaryo televideniyesi tahririyatlari tomonidan tumanning Qangli, Kuyuk koʻpir, Doʻrman ovul fuqarolar yigʻinlari, Qipchoq shaharcha va Gulzor mahalla fuqarolar yigʻinlari qoshida ham kutubxonalar tashkil qilingan edi.

Mazkur yoʻnalishdagi xayrli ishlar kelgusida ham davom ettiriladi.

Oʻrozali REYIMOV