Amunews.uz веб-сайти таҳририяти томонидан Бўз солма МФЙ қошида янги кутубхона ташкил қилинди

Амударё туманида фаолият юритаётган amunews.uz веб-сайти таҳририятининг Олий Мажлис ҳузуридаги жамоат фонди томонидан молиялаштирилган “Соғлом муҳит – соғлом ҳаёт” грант лойиҳаси доирасида кўплаб тадбирлар ўтказилмоқда. Лойиҳанинг асосий мақсади – интернетдаги веб-сайтда, ижтимоий тармоқларда мақолалар эълон қилиш, фаол ва интилувчан ёшларни тенгдошларига ўрнак қилиб кўрсатиш, тушунтириш, тарғибот ишларини олиб бориш орқали маҳаллаларда, оилаларда ижтимоий-маънавий муҳит барқарорлигига салбий таъсир кўрсатувчи ҳолатларнинг, аҳоли, айниқса ёшлар орасида ўз жонига қасд қилиш, гиёҳвандлик, эрта турмуш қуриш каби иллатларнинг олдини олишдан иборатдир.

Шунингдек, маҳаллаларда, оилаларда ижтимоий-маънавий муҳит барқарорлигини таъминлаш, ёшларни ҳар томонлама баркамол авлод қилиб вояга етказиш ишларида давлат органлари билан ижтимоий шерикликни кучайтириш, ёшларнинг бўш вақтларини мазмунли ўтказиш, аҳолини китобхонликка жалб қилиш, уларни жисмоний тарбия ва спортга кенг жалб қилиш мақсадида туманнинг энг чекка овулларида кутубхона очиш ишлари ҳам лойиҳа доирасида кўзда тутилган.

Мазкур лойиҳанинг иш режасига асосан Президентимизнинг ёшлар таълим-тарбияси учун қўшимча шароитлар яратиш, хотин-қизлар бандлигини оширишга қаратилган комплекс чора-тадбирларни ўз ичига олган 5та ташаббусни амалиётга жорий этиш, ёшларнинг дунёқарашини ва маънавиятини юксалтириш, уларни ёт ғоя ва иллатлардан ишончли ҳимоя қилиш, ёшлар ўртасида китобхонликни янада оммалаштириш мақсадида туманнинг энг чекка овулларидан бири – Бўз солма маҳалла фуқаролар йиғини қошида янги кутубхона ташкил қилинди.

Мазкур кутубхонага турли жанрлардаги адабиётлар таҳририят томонидан совға қилинди. Кутубхона фондидан жой олган шеърият, назм, мумтоз адабиётлар, чет эл адабиёти, болалар адабиёти, детектив жанрлардаги адабиётлар, дарслик, қўлланмалар, тиббиёт китоблари, одобнома китоблари қишлоқ аҳлининг маънавий-маданий турмуши янада ривожланишига муҳим асос бўла олади.

Янги кутубхонанинг очилиши қишлоқ аҳлининг улкан қувончига сабаб бўлди. Тадбирда 70-сонли мактабнинг психологи Муҳайё Ўринбоева, “Жайхун илҳомлари” нодавлат нотижорат ташкилотининг раиси Ўрозали Рейимов, меҳнат фахрийларидан Холмурод Хайтимбетов, Бибижон Раҳимова, ўқитувчи Гулимбой Юсупов, Бўзсолма фуқаролар йиғини раиси Баҳодир Матяқубовлар сўзга чиқиб, янгидан очилган кутубхона қишлоқ аҳли ҳаётида муҳим маънавий роль ўйнашини таъкидладилар.

Меҳнат фахрийси Холмурод Ҳайтимбетов ҳам ўз шахсий ҳисобидан янги кутубхонага бадиий адабиётлар совға қилди.

Айтиш жоизки, лойиҳа доирасидаги вазифаларни амалга ошириш орқали ҳудудларда юз бераётган салбий ҳолатларнинг олдини олишда давлат органлари билан оммавий ахборот воситаларининг мустаҳкам ижтимоий шериклигини йўлга қўйиш, турли мавзуларда интернатдаги веб-сайтлар ва ижтимоий тармоқлар орқали мақолалар, ижтимоий роликлар эълон қилиш кўзда тутилган.

Йил давомида лойиҳа доирасида ўтказиладиган тадбирларга туманнинг 10 мингдан ортиқ ёшлари қамраб олинади.

Янги  кутубхонанинг очилиш маросими иштирокчилари китобларни катта қизиқиш билан кўриб чиқдилар. Шу куннинг ўзидаёқ маҳалла ёшлари кутубхонага аъзо бўлиб, китоб мутолаасини бошлаб юборишди. Кутубхонада болалар адабиётига оид китобларнинг кўплиги қишлоқдаги мактаб ўқувчиларида катта қизиқиш уйғотди.

Қишлоқ аҳли нодавлат нотижорат ташкилотининг чекка ҳудудларда яшовчилар учун кўрсатаётган бундай ҳурмат-эътиборидан чексиз миннатдор бўлдилар.

Шуниси эътиборлики, ўтган йиллар мобайнида “Жайхун илҳомлари” нодавлат нотижорат ташкилоти, “Тараққиёт кўзгуси” ва “Менинг оилам” газеталари ҳамда Амударё телевидениеси таҳририятлари томонидан туманнинг Қангли, Куюк кўпир, Дўрман овул фуқаролар йиғинлари, Қипчоқ шаҳарча ва Гулзор маҳалла фуқаролар йиғинлари қошида ҳам кутубхоналар ташкил қилинган эди.

Мазкур йўналишдаги хайрли ишлар келгусида ҳам давом эттирилади.

Ўрозали РЕЙИМОВ