“RAJAPOV OMONBOY” FERMER XOʻJALIGI DEHQONLARI HOSILGA HOSIL QOʻShISh HARAKATIDA

Dehqonlar avgust oyini hosilga hosil qoʻshiladigan gʻanimat davr deyishadi. Ayniqsa, paxta hosilining moʻl va erta muddatlarda pishib yetilishi, uning sifati yuqori boʻlishi ayni shu oyda qilingan mehnat natijasi bilan oʻlchanadi. Shu kunlarda dehqonlar gʻoʻza agrotexnikasini talablarga muvofiq yuqori darajada bajarib, hosilning barakasini oshirishga harakat qilishmoqda.

Qilichboy ovulidagi “Rajapov Omonboy” fermer xoʻjaligida ham ushbu masʼuliyatli oyda har bir ishga jiddiy yondashilib, gʻoʻzani qondirib sugʻorish, kultivatsiya qilish, gʻoʻza qator oralarini yumshatish, zararli hasharotlardan ishonchli himoya qilish, gʻoʻzalarni chilpish va shu kabi qator ishlar amalga oshirilmoqda. Xoʻjalik ishchilari gʻanimat damlardan unumli foydalanib, ertangi moʻl hosilga zamin hozirlashmoqda.

Omonboy Rajabov rahbarligidagi ushbu xoʻjalikda 50 gektar yer maydoni mavjud boʻlib, bu yilgi mavsumda uning 40 gektarida “Ravnaq” navli paxta yetishtirilmoqda. Asosan urugʻchilikka yoʻnaltirilgan xoʻjalik yerlarining qolgan 10 gektar qismiga esa gʻalla ekilib, mavsumda 25 tonna bugʻdoy topshirildi. Xoʻjalikda 1 ta surim, 2 ta MTZ-80 rusumli transport, 2 ta TTZ-80-11 rusumli chopiq qiluvchi traktorlar yordamida ish unumi yanada oshirilmoqda. Barcha texnikalar taʼmirlanib, har bir mavsumga shay qilib qoʻyiladi. Dala chetlariga mosh, sabzi va makkajoʻxori kabilar ham ekilib, ulardan ham moʻl hosil undiriladi.

Chigit ekish ishlari oʻz muddatida bajarilgani, unib chiqqan gʻoʻza nihollari astoydil parvarish qilingani natijasida xoʻjalik dalalarida gʻoʻzadan moʻl hosil toʻplanishiga sharoit yaratilmoqda. Ayniqsa, hosilga hosil qoʻshiladigan avgust oyida barcha paxta maydonlarida gʻoʻzani sugʻorish va ishlov berish ishlari tizimli ravishda olib borilmoqda. Oʻtgan oy boshlarida dalalardagi har tup gʻoʻzada 1-3 donagacha koʻsak, 15-20 donagacha gul va shona shakllandi. Ammo zararkunanda hasharotlarning koʻpayib ketgani, ayniqsa, suv yetishmasligi xoʻjalik ishchilariga ancha qiyinchilik tugʻdirdi. Shunga qaramasdan, 2021-yilda xoʻjalikda ekinlarni tomchilatib sugʻorish yoʻlga qoʻyilgani va kunni tunga ulab mehnat qilayotgan 32 nafar ishchining tinimsiz saʼy-harakatlari tufayli paxta hosilini saqlab qolish va koʻpaytirishga zamin yaratildi.

Ayni kunlarda ishchilar joriy yil hosili uchun ekilgan gʻoʻza maydonlarida zararkunanda hasharotlarga qarshi kurashish yuzasidan chora-tadbirlar koʻrishmoqda. Gʻoʻza nihollarida uchraydigan oʻrgimchakkana, koʻsak qurti singari zararkunanda hasharotlar hosildorlikka jiddiy zarar yetkazishini yaxshi anglagan dehqonlar asosan kunning ertalab va kechki paytlarida ularga qarshi biologik usulda kurashish tadbirlarini amalga oshirishmoqda.

Maʼlumki, avgust oyida bajariladigan muhim agrotexnik tadbirlardan biri gʻoʻzaga suv olishdir. Bu ish yaxshi, maromida bajarilsa, “sharbat” usulidan foydalanilsa, yanada yuqori samara beradi, boshqacha aytganda, hosildorlik oshadi. Xoʻjalikning tajribali dehqonlari, gʻoʻzalarni suvga qondirib, koʻsaklar tezroq toʻlishib, vazni ortishini taʼminlashdi. Sugʻorilgan maydonlar tuprogʻi tobga kelishi bilan qator oralarini tezda kultivatsiya qilishdi. Natijada tuplar orasida havo almashinuvi yaxshilanib, koʻsaklar tez yetila boshladi va koʻsaklar ochilib, paxta hosilining ilk nishonalari koʻzga tashlana boshladi.

Gʻoʻza parvarishida uyushqoqlik va hamjihatlik muhim ahamiyat kasb etadi. Shu sababli “Rajapov Omonboy” fermer xoʻjaligi ishchilari har bir ishni tajribali dehqonlar bilan bamaslahat holda birgalikda olib borishadi. Xoʻjalikdagilar hosil taqdiri hal qilinadigan ayni kunlarda ham har bir daqiqani gʻanimat bilib, yetishtirilayotgan “Ravnaq” navli urugʻlik paxta sifati va salmogʻini oshirishga harakat qilishmoqda.

Ozoda Xudoyberganova.