“РАЖАПОВ ОМОНБОЙ” ФЕРМЕР ХЎЖАЛИГИ ДЕҲҚОНЛАРИ ҲОСИЛГА ҲОСИЛ ҚЎШИШ ҲАРАКАТИДА

Деҳқонлар август ойини ҳосилга ҳосил қўшиладиган ғанимат давр дейишади. Айниқса, пахта ҳосилининг мўл ва эрта муддатларда пишиб етилиши, унинг сифати юқори бўлиши айни шу ойда қилинган меҳнат натижаси билан ўлчанади. Шу кунларда деҳқонлар ғўза агротехникасини талабларга мувофиқ юқори даражада бажариб, ҳосилнинг баракасини оширишга ҳаракат қилишмоқда.

Қиличбой овулидаги “Ражапов Омонбой” фермер хўжалигида ҳам ушбу масъулиятли ойда ҳар бир ишга жиддий ёндашилиб, ғўзани қондириб суғориш, культивация қилиш, ғўза қатор ораларини юмшатиш, зарарли ҳашаротлардан ишончли ҳимоя қилиш, ғўзаларни чилпиш ва шу каби қатор ишлар амалга оширилмоқда. Хўжалик ишчилари ғанимат дамлардан унумли фойдаланиб, эртанги мўл ҳосилга замин ҳозирлашмоқда.

Омонбой Ражабов раҳбарлигидаги ушбу хўжаликда 50 гектар ер майдони мавжуд бўлиб, бу йилги мавсумда унинг 40 гектарида “Равнақ” навли пахта етиштирилмоқда. Асосан уруғчиликка йўналтирилган хўжалик ерларининг қолган 10 гектар қисмига эса ғалла экилиб, мавсумда 25 тонна буғдой топширилди. Хўжаликда 1 та сурим, 2 та МТЗ-80 русумли транспорт, 2 та ТТЗ-80-11 русумли чопиқ қилувчи тракторлар ёрдамида иш унуми янада оширилмоқда. Барча техникалар таъмирланиб, ҳар бир мавсумга шай қилиб қўйилади. Дала четларига мош, сабзи ва маккажўхори кабилар ҳам экилиб, улардан ҳам мўл ҳосил ундирилади.

Чигит экиш ишлари ўз муддатида бажарилгани, униб чиққан ғўза ниҳоллари астойдил парвариш қилингани натижасида хўжалик далаларида ғўзадан мўл ҳосил тўпланишига шароит яратилмоқда. Айниқса, ҳосилга ҳосил қўшиладиган август ойида барча пахта майдонларида ғўзани суғориш ва ишлов бериш ишлари тизимли равишда олиб борилмоқда. Ўтган ой бошларида далалардаги ҳар туп ғўзада 1-3 донагача кўсак, 15-20 донагача гул ва шона шаклланди. Аммо зараркунанда ҳашаротларнинг кўпайиб кетгани, айниқса, сув етишмаслиги хўжалик ишчиларига анча қийинчилик туғдирди. Шунга қарамасдан, 2021 йилда хўжаликда экинларни томчилатиб суғориш йўлга қўйилгани ва кунни тунга улаб меҳнат қилаётган 32 нафар ишчининг тинимсиз саъй-ҳаракатлари туфайли пахта ҳосилини сақлаб қолиш ва кўпайтиришга замин яратилди.

Айни кунларда ишчилар жорий йил ҳосили учун экилган ғўза майдонларида зараркунанда ҳашаротларга қарши курашиш юзасидан чора-тадбирлар кўришмоқда. Ғўза ниҳолларида учрайдиган ўргимчаккана, кўсак қурти сингари зараркунанда ҳашаротлар ҳосилдорликка жиддий зарар етказишини яхши англаган деҳқонлар асосан куннинг эрталаб ва кечки пайтларида уларга қарши биологик усулда курашиш тадбирларини амалга оширишмоқда.

Маълумки, август ойида бажариладиган муҳим агротехник тадбирлардан бири ғўзага сув олишдир. Бу иш яхши, маромида бажарилса, “шарбат” усулидан фойдаланилса, янада юқори самара беради, бошқача айтганда, ҳосилдорлик ошади. Хўжаликнинг тажрибали деҳқонлари, ғўзаларни сувга қондириб, кўсаклар тезроқ тўлишиб, вазни ортишини таъминлашди. Суғорилган майдонлар тупроғи тобга келиши билан қатор ораларини тезда культивация қилишди. Натижада туплар орасида ҳаво алмашинуви яхшиланиб, кўсаклар тез етила бошлади ва кўсаклар очилиб, пахта ҳосилининг илк нишоналари кўзга ташлана бошлади.

Ғўза парваришида уюшқоқлик ва ҳамжиҳатлик муҳим аҳамият касб этади. Шу сабабли “Ражапов Омонбой” фермер хўжалиги ишчилари ҳар бир ишни тажрибали деҳқонлар билан бамаслаҳат ҳолда биргаликда олиб боришади. Хўжаликдагилар ҳосил тақдири ҳал қилинадиган айни кунларда ҳам ҳар бир дақиқани ғанимат билиб, етиштирилаётган “Равнақ” навли уруғлик пахта сифати ва салмоғини оширишга ҳаракат қилишмоқда.

Озода Худойберганова.