KUYDIRGI KASALLIGIDAN SAQLANIShGA OID KOʻRGAZMALI TAKTIK OʻQUV MAShGʻULOTI OʻTKAZILDI

Kuydirgi kasalligi odamlar va uy hayvonlariga jiddiy xavf tugʻdirishi mumkinligi haqida koʻpincha oʻylamaymiz ham. Kasallik namoyon boʻlishining oldini olish juda muhim ekanligini hayotning oʻzi tasdiqlamoqda.

Tumanimizning Daryoboʻyi mahallasi hududida tuman Favqulodda vaziyatlar davlat tizimi xizmatlarining ish-rejasiga asosan “Aholi oʻrtasida quydirgi kasalligi tarqalishining oldini olishda Favqulodda vaziyatlar davlat tizimi xizmatlarining hamkorlikdagi harakatlari” mavzusidagi koʻrgazmali maxsus-taktik oʻquv-mashgʻuloti oʻtkazildi.

Koʻrgazmali maxsus-taktik oʻquv mashgʻulotida hamkorlikdagi davlat tashkilotlari – jumladan, tuman Favqulodda vaziyatlar, Sanitariya-epidemiologik osoyishtalik va jamoat salomatligi, boʻlimlari tuman Tibbiyot birlashmasi, veterinariya va chorvachilikni rivojlantirish boʻlimi, Obodonlashtirish boshqarmasi masʼullari ishtirok etdilar.

Tadbirda dastlab yigʻilganlarga kuydirgi kasalligi, uning tarqalishi va insonlar undan qanday himoyalanishi lozimligi xususida keng tushunchalar berildi. Taʼkidlanishicha kuydirgi kasalligi koramollar, qoʻy-echkilar va odamlarda uchraydigan oʻta xavfli yuqumli kasallik boʻlib, odamlarga asosan kuydirgi bilan kasallangan hayvonlarni soʻyish, terisini shilish, goʻshtini maydalash, kalla-pocha va oshqozon-ichaklarini tozalash jarayonlarida yuqadi.

Kuydirgi kasalligi hayvonlardan hayvonlarga, hayvonlardan odamlarga yuqadi, lekin odamdan odamga yuqmaydi.

Odamlarda kasallik asosan teri yarasi shaklida namoyon boʻladi. Bunday holda bemorlarning tana harorati koʻtariladi. Kuydirgi yarasi ogʻriqsiz boʻladi, yaraning ustki qismi koʻmir rangiga oʻxshash qora poʻstloq bilan qoplanadi va yara tarofi qizarib, shish paydo boʻladi. Kuydirgi yarasi koʻpincha badanning ochiq qismlarida uchraydi.

Kuydirgi kasalligidan saqlanish uchun chorva mollarini veterinar koʻrigidan oʻtkazib, kuydirgi kasalligiga qarshi emlatib turish lozim. Kasallangan hayvonlarning veterinar roʻyxatisiz suyilishiga yoʻl qoʻymaslik, mollarni faqat qushxona va suyish maydonchalarida veterinar koʻrigidan oʻtkazilgandan soʻng soʻyish, duch kelgan joylardan goʻsht sotib olmaslik, uni goʻsht pavilonlari va doʻkonlardan xarid qilish, shuningdek, uy hayvonlarini parvarish qilishda shaxsiy gigiyena qoidalariga rioya qilish zarur.

Hayvonlarda va odamlarda kuydirgi kasalligining belgilari kuzatilganda, zudlik bilan veterinari boʻlimiga va kasalxonaga murojaat qilish kerak.

Koʻrgazmali maxsus-taktik oʻquv mashgʻulotida quydirgi kasalligi odamlar va hayvonlar oʻrtasida aniqlanganida tuman Tibbiyot birlashmasi, tuman sanitariya-epidemilogik osoyishtalik va jamoat salomatligi boʻlimi, tuman veterinariya va chorvachilikni rivojlantirish boʻlimi hamda oilaviy poliklinika xodimlarining ishlash tizimlari nazariy va amaliy tarzda koʻrsatib berildi. Shuningdek, agar uy hayvonlari – qoramol, qoʻy-echkilarni boqish va parvarishlashda shaxsiy gigiyena qoidalariga rioya qilinsa, kuydirgi kasalligi hech kimga xavf solmasligi tushuntirildi.

Oygul RAJABOVA.