TEZ TIBBIY YoRDAM BEMORLARGA NAJOT BAGʻIShLAYDI

Mamlakatimiz aholisiga tez tibbiy yordam koʻrsatish sifatini oshirish maqsadida “Aholiga tez tibbiy yordam koʻrsatish tizimini takomillashtirish toʻgʻrisida”gi 2022-yil 16-iyunda qabul qilingan Prezident Qarori sohada tub oʻzgarishlar yasalishiga zamin boʻldi.

Qarorga muvofiq Respublika tez tibbiy yordam markazi va uning 14ta hududiy tez tibbiy yordam xizmati hamda tibbiy avtoxoʻjaliklar negizida qayta tashkil qilindi va tez tibbiy yordamning yagona vertikal tizimi yoʻlga qoʻyildi. Tibbiy brigada bemorning ahvoli va kasallik turiga qarab, hududidan qatʼiy nazar, unga eng yaqin masofadan yuboriladi. Markaziy shifoxonalarda esa kun-u tun ishlaydigan shoshilinch qabul boʻlimlari tashkil etildi.

Mazkur Qarorga muvofiq tashkil etilgan Respublika tez tibbiy yordam Markazi Qoraqalpogʻiston filialiga qarashli Amudaryo tuman boʻlimi tuman Tibbiyot birlashmasining yuqumli kasalliklar boʻlimi binosining birinchi qavatida joylashgan. Boʻlimda shifokorlarning, feldsherlar, haydovchilarning boʻsh vaqtlarida dam olishlari uchun xonalar, boʻlim mudiri, xoʻjalik bekasi xonalari, eng zarur dorilarni saqlash xonalari mavjud.

Boʻlim tarkibida 1ta markaziy podstantsiya va 11ta shoxobcha mavjud boʻlib, ularda jami 15 brigada – 11ta umumtarmoq 1ta reanimatsion, 3ta feldsherlik brigadalari faoliyat yuritadi.

Boʻlimdagi barcha avtomashinalarga  GRS oʻrnatilgan boʻlib, harakatlanishi dispetcher oldidagi monitor orqali onlayn kuzatib boriladi.

Boʻlimda faoliyat yurituvchi xodimlar jami 302 nafarni tashkil etadi. Shu jumladan, 38 nafari asosiy, 22 nafari oʻrindosh shifokorlar, 161 nafari asosiy, 1 nafari oʻrindosh oʻrta tibbiyot xodimlaridir.

Ular tumanimiz aholisi tez tibbiy yordamga muhtoj boʻlib qolganda chaqiruvlarga zudlik bilan yetib borishga va tez tibbiy yordam koʻrsatishga oshiqadilar.

Joriy yilning oʻtgan olti oyi mobaynida boʻlimga jami 25952ta chaqiruvlar boʻldi. Ularning 25527tasi bajarilgan. 25776 nafar bemorga tez tibbiy yordam koʻrsatildi. Jami chaqiriqlarning 489tasi baxtsiz hodisalar, 12399tasi shoshilinch chaqiriqlar, 4890tasi shoshilinch boʻlmagan, 969tasi tugʻruq va homiladorlar patologiyasi boʻyicha chaqiriqlar, 29tasi esa shifoxonadan shifoxonaga oʻtkazishlardir. Tez tibbiy yordamga muhtoj boʻlib murojaat qilganlardan 4323 nafar bemor shifoxonaga yotqizildi, 962 nafar bemorga esa ambulator yordam koʻrsatilgan.

Chaqiriqlar davomida tez tibbiy yordamga muhtoj boʻlib qolgan bemorlarga aniq tashxis qoʻyish uchun boʻlimimizda  13ta EKG apparati va ogʻir holatdagi bemorlar ahvolini yengillashtirish uchun zarur boʻlgan anjomlari, bemorlarga oʻz vaqtida sifatli tez tibbiy yordam koʻrsatish uchun 41 nomdagi dori preparatlari mavjud.

Keyingi yillarda aholi orasida tez tibbiy yordamga ehtiyoj kuchayayotganini eʼtiborga olib, yaqin kunlarda markaziy stantsiyada yangidan tez tibbiy yordam brigadasi tashkil qilish rejalashtirilmoqda.

Buningdek chora-tadbirlar tumanimiz aholisining sogʻligini muhofaza qilishga, zarurat tugʻilganda dard  iskanjasida qolgan odamlarga tezkor tibbiy yordam berishga qaratilgani bilan ahamiyatlidir.

Konstantin Shabayev,

Respublika tez tibbiy yordam markazi

Amudaryo boʻlimi mudiri.