MURGʻAK JONLAR NAJOTKORI EDI...

(El sevgan shifokor Ulugʻbek Jumamuratov xotirasiga)

Inson hayoti uning qancha yashagani bilan emas, balki ortidan qanday iz qoldirgani bilan oʻlchanadi. Amudaryo tumani tibbiyot birlashmasining bolalar reanimatsiyasi boʻlimida oʻttiz yildan ziyod vaqt mobaynida minglab goʻdaklarni davolab, minglab oilalarga quvonch bagʻishlagan oliy toifali shifokor, anesteziolog-reanimatolog Ulugʻbek Bozorboyevich Jumamuratov ham oʻzidan yorqin iz va yorugʻ xotiralar qoldirib, 58 yoshida bu dunyoni barvaqt tark etdi.

Ulugʻbek Jumamuratov 1966-yilning 23-avgustida Amudaryo tumanining Qilichboy ovuli (hozirgi Yuqori qishloq mahallasi) hududidagi ziyolilar oilasida dunyoga keldi. Otasi Bozorboy muallim matematika oʻqituvchisi va maktab direktori, onasi Qurbonoy opa esa qishloq tibbiyot punkti mudirasi sifatida el eʼtiborini qozongan insonlar edi. 11 nafar oʻqimishli farzandni voyaga yetkazgan bu oilaning toʻngʻichi boʻlgan Ulugʻbek yoshligidanoq intiluvchanligi, tartib-intizomi va bilimga chanqoqligi bilan ajralib turardi.

1983-yilda ovuldagi sobiq Kuybishev nomli maktabni aʼlo baholarga tamomlagan yosh yigit kelajak maqsadlari sari dadil qadam tashlab, Toshkentdagi Oʻrta Osiyo meditsina  pediatriya instituti (hozirgi Toshkent Pediatriya tibbiyot instituti)ga oʻqishga kirdi. 1989-yili oliygohni muvaffaqiyatli tugatib, shu yili oila qurgan yosh mutaxassis oʻz mehnat faoliyatini dastlab Toshkent shahridagi tez tibbiy yordam boʻlimida boshladi.

1990-yildan 1992-yilga qadar Taxtakoʻpir tumanida, 1992-yildan boshlab esa Amudaryo tumani tibbiyot birlashmasining bolalar reanimatsiyasi boʻlimida faoliyatini davom ettirdi. Shuningdek, qabul boʻlimi va tez yordam reanimatsiyasida ham fidokorona mehnat qildi. 2024-yilning 4-dekabr sanasiga, yaʼni, vafotiga qadar ushbu dargohda bemorlar dardiga malham boʻlib, oʻz kasbini sidqidildan sevuvchi, malakali va fidoyi shifokor sifatida elga tanildi.

Ulugʻbek nafaqat oʻz kasbining bilimdoni va fidoyisi, balki oilasining mustahkam suyanchigʻi edi. Uning bosib oʻtgan sharafli yoʻlini bugun izdoshlari davom ettirmoqda. Otasining izidan borib, shifokorlik kasbini tanlagan oʻgʻli Sardorbek Bozorboyev bugun el xizmatida. «Otamning oʻgitlari va ustoz sifatida bergan ilmi, oʻrgatgan amallari men uchun katta boylik boʻlib qoldi. Uning bergan tarbiyasi va duolari doimo yoʻlchi yulduzday yoʻlimni yoritib kelmoqda. Dadam oʻz kasbini jondili bilan yaxshi koʻrardi. U faqat malakali shifokor emas, balki odamlarga mehr ulasha oladigan, yuragi pok, mehribon va oqkoʻngil inson edi...” deya xotirlaydi oʻgʻli.

Ulugʻbek Jumamuratov jamoada nafaqat oʻz ishining ustasi, balki hamkasblari uchun haqiqiy suyanchiq va mehribon ustoz edi. Bolalar reanimatsiyasidek oʻta masʼuliyatli va har soniyasi hayot-mamot bilan oʻlchanadigan boʻlimda uning bosiqligi, yuksak professionalizmi va shu bilan birga, cheksiz insoniyligi koʻpchilikka oʻrnak boʻlardi. Yosh mutaxassislarga oʻz tajribasini ayamay oʻrgatar, eng murakkab vaziyatlarda ham hamkasblariga yelkadosh boʻlib, jamoada oʻzaro hurmat, oqibat va mustahkam ishonch muhitini yarata olgan edi. Shu bois uning nomi chuqur ehtirom bilan tilga olinadi.

Shifoxonadan tashqarida, oila davrasi va doʻst-yorlar orasida u butunlay boshqacha – nihoyatda samimiy, ochiqkoʻngil va qalbi daryo inson sifatida namoyon boʻlardi. Ulugʻbek oʻz oilasining mustahkam qoʻrgʻoni, farzandlari uchun gʻamxoʻr ota va nabiralari uchun dunyodagi eng mehribon bobo edi. Doʻstlari va qarindosh-urugʻlari orasida oʻzining ogʻir-vazminligi, birovning dardiga befarq qarab turolmasligi, har qanday holatda ham birinchi boʻlib yordam qoʻlini choʻzishga tayyorligi bilan ajralib turardi.

... Hayot karvoni oʻz yoʻlida davom etaveradi. Kimdir erta, kimdir kech bu karvondan ajralib, abadiy manzilida qoʻnim topadi. Ammo, shunday insolar boʻladiki, jismonan oramizda boʻlmasalar ham, oʻzining chin insoniy fazilatlari tufayli qalblarimizda mangu yashaydi. Ulugʻbek Jumamuratov ham ana shunday yorqin yulduz singari yuzlab insonlarning umr osmonini yoritib yashab oʻtdi. U sababli shifo topgan va hayotga qaytgan yuzlab goʻdaklarning ota-onalari hamda yaqinlari fidoyi shifokorni bugun chuqur ehtirom bilan yodga oladilar. Ulugʻbek Jumamurotovning sermazmun umri endilikda farzandlari va shogirdlari faoliyatida davom etadi, porloq xotirasi yaqinlarining qalbida va undan shifo topgan insonlarning duolarida mangu qoladi.

Jumaboy YavQashev, tuman Tibbiyot birlashmasi tashkiliy-uslubiy boʻlimi mudiri.