МУРҒАК ЖОНЛАР НАЖОТКОРИ ЭДИ...
(Эл севган шифокор Улуғбек Жумамуратов хотирасига)
Инсон ҳаёти унинг қанча яшагани билан эмас, балки ортидан қандай из қолдиргани билан ўлчанади. Амударё тумани тиббиёт бирлашмасининг болалар реанимацияси бўлимида ўттиз йилдан зиёд вақт мобайнида минглаб гўдакларни даволаб, минглаб оилаларга қувонч бағишлаган олий тоифали шифокор, анестезиолог-реаниматолог Улуғбек Бозорбоевич Жумамуратов ҳам ўзидан ёрқин из ва ёруғ хотиралар қолдириб, 58 ёшида бу дунёни барвақт тарк этди.
Улуғбек Жумамуратов 1966 йилнинг 23 августида Амударё туманининг Қиличбой овули (ҳозирги Юқори қишлоқ маҳалласи) ҳудудидаги зиёлилар оиласида дунёга келди. Отаси Бозорбой муаллим математика ўқитувчиси ва мактаб директори, онаси Қурбоной опа эса қишлоқ тиббиёт пункти мудираси сифатида эл эътиборини қозонган инсонлар эди. 11 нафар ўқимишли фарзандни вояга етказган бу оиланинг тўнғичи бўлган Улуғбек ёшлигиданоқ интилувчанлиги, тартиб-интизоми ва билимга чанқоқлиги билан ажралиб турарди.
1983 йилда овулдаги собиқ Куйбишев номли мактабни аъло баҳоларга тамомлаган ёш йигит келажак мақсадлари сари дадил қадам ташлаб, Тошкентдаги Ўрта Осиё медицина педиатрия институти (ҳозирги Тошкент Педиатрия тиббиёт институти)га ўқишга кирди. 1989 йили олийгоҳни муваффақиятли тугатиб, шу йили оила қурган ёш мутахассис ўз меҳнат фаолиятини дастлаб Тошкент шаҳридаги тез тиббий ёрдам бўлимида бошлади.
1990 йилдан 1992 йилга қадар Тахтакўпир туманида, 1992 йилдан бошлаб эса Амударё тумани тиббиёт бирлашмасининг болалар реанимацияси бўлимида фаолиятини давом эттирди. Шунингдек, қабул бўлими ва тез ёрдам реанимациясида ҳам фидокорона меҳнат қилди. 2024 йилнинг 4 декабрь санасига, яъни, вафотига қадар ушбу даргоҳда беморлар дардига малҳам бўлиб, ўз касбини сидқидилдан севувчи, малакали ва фидойи шифокор сифатида элга танилди.
Улуғбек нафақат ўз касбининг билимдони ва фидойиси, балки оиласининг мустаҳкам суянчиғи эди. Унинг босиб ўтган шарафли йўлини бугун издошлари давом эттирмоқда. Отасининг изидан бориб, шифокорлик касбини танлаган ўғли Сардорбек Бозорбоев бугун эл хизматида. «Отамнинг ўгитлари ва устоз сифатида берган илми, ўргатган амаллари мен учун катта бойлик бўлиб қолди. Унинг берган тарбияси ва дуолари доимо йўлчи юлдуздай йўлимни ёритиб келмоқда. Дадам ўз касбини жондили билан яхши кўрарди. У фақат малакали шифокор эмас, балки одамларга меҳр улаша оладиган, юраги пок, меҳрибон ва оқкўнгил инсон эди...” дея хотирлайди ўғли.
Улуғбек Жумамуратов жамоада нафақат ўз ишининг устаси, балки ҳамкасблари учун ҳақиқий суянчиқ ва меҳрибон устоз эди. Болалар реанимациясидек ўта масъулиятли ва ҳар сонияси ҳаёт-мамот билан ўлчанадиган бўлимда унинг босиқлиги, юксак профессионализми ва шу билан бирга, чексиз инсонийлиги кўпчиликка ўрнак бўларди. Ёш мутахассисларга ўз тажрибасини аямай ўргатар, энг мураккаб вазиятларда ҳам ҳамкасбларига елкадош бўлиб, жамоада ўзаро ҳурмат, оқибат ва мустаҳкам ишонч муҳитини ярата олган эди. Шу боис унинг номи чуқур эҳтиром билан тилга олинади.
Шифохонадан ташқарида, оила давраси ва дўст-ёрлар орасида у бутунлай бошқача – ниҳоятда самимий, очиқкўнгил ва қалби дарё инсон сифатида намоён бўларди. Улуғбек ўз оиласининг мустаҳкам қўрғони, фарзандлари учун ғамхўр ота ва набиралари учун дунёдаги энг меҳрибон бобо эди. Дўстлари ва қариндош-уруғлари орасида ўзининг оғир-вазминлиги, бировнинг дардига бефарқ қараб туролмаслиги, ҳар қандай ҳолатда ҳам биринчи бўлиб ёрдам қўлини чўзишга тайёрлиги билан ажралиб турарди.
... Ҳаёт карвони ўз йўлида давом этаверади. Кимдир эрта, кимдир кеч бу карвондан ажралиб, абадий манзилида қўним топади. Аммо, шундай инсолар бўладики, жисмонан орамизда бўлмасалар ҳам, ўзининг чин инсоний фазилатлари туфайли қалбларимизда мангу яшайди. Улуғбек Жумамуратов ҳам ана шундай ёрқин юлдуз сингари юзлаб инсонларнинг умр осмонини ёритиб яшаб ўтди. У сабабли шифо топган ва ҳаётга қайтган юзлаб гўдакларнинг ота-оналари ҳамда яқинлари фидойи шифокорни бугун чуқур эҳтиром билан ёдга оладилар. Улуғбек Жумамуротовнинг сермазмун умри эндиликда фарзандлари ва шогирдлари фаолиятида давом этади, порлоқ хотираси яқинларининг қалбида ва ундан шифо топган инсонларнинг дуоларида мангу қолади.
Жумабой ЯвҚашев, туман Тиббиёт бирлашмаси ташкилий-услубий бўлими мудири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
