“КЕЛАЖАК СОАТИ” ДАРС МАШҒУЛОТИ ДОИРАСИДА БОЛАЖОНЛАР ЙЎЛ ҲАРАКАТИ ҚОИДАЛАРИНИ ЎРГАНДИЛАР

Мактабгача таълим ташкилотларида ва умумий ўрта таълим мактабларида тарбияланувчилар ҳамда ўқувчи-ёшларни миллий-маънавий қадриятларга садоқат, ватанпарварлик руҳида тарбиялаш, маънавий-маърифий ишлар самарадорлигини янада ошириш, психологлар иш фаолиятини тизимли ташкил этиш мақсадида Ўзбекистон Республикаси Мактабгача ва мактаб таълими вазирлигининг 2025 йил 25 августдаги тегишли буйруғи таълим муассасаларида ҳар ҳафтанинг душанба куни дарс жадвалининг биринчи соатида “Келажак соати” дарси ўқилиши белгиланган.

Айни пайтда мактабгача таълим ташкилотларида “milliytarbiya.uz” электрон платформасида жойлаштирилган контентлардан фойдаланган ҳолда “Келажак соати” дарси муваффақиятли ўтказиб келинмоқда.

Жорий йилнинг 3 ноябрь санасида Амударё туманидаги 4-сонли мактабгача таълим ташкилотида “Келажак соати” дарс жадвалидаги мактабгача ёшдаги тарбияланувчилар учун белгиланган “Йўл ҳаракати қоидалари” мавзусида давра суҳбати ўтказилди. Давра суҳбатида Амударё туман Йўл ҳаракати хавфсизлиги бўлими бошлиғи Бегзод Қазақов ҳамда 4-сонли мактабгача таълим ташкилоти ходимлари, мазкур ташкилот тарбияланувчилари иштирок этдилар.

Давра суҳбати жараёнида педагог-тарбиячилар томонидан болаларга йўл ҳаракати қоидалари тўғрисида тушунчалар берилди. Шу билан бирга, йўл ҳаракати қоидаларига амал қилиш инсон ҳаётини хавф-хатардан сақлаши, светофор рангларини билиш ва уларга риоя қилиш зарурлиги, йўлдан ўтаётганда ҳар доим диққатли бўлиши кераклиги хусусида батафсил маълумотлар ҳам тақдим этилди.

Шунингдек, тадбирда Амударё тумани Йўл ҳаракати хавфсизлиги бўлими бошлиғи Бегзод Қазақов болаларда йўл ҳаракати қоидалари ҳақида бошланғич тушунчалар ҳосил қилиш, йўлда ўзини тўғри тутиш, хавфсизликни сақлаш кўникмаларини шакллантириш, йўл белгилари, светофор ва пиёдалар йўлакчаларининг аҳамияти хусусида кўргазмали воситалар орқали кенг ва батафсил маълумотлар берди.

4-сонли давлат мактабгача таълим ташкилотининг тайёрлов гуруҳларида мактабгача ёшдаги тарбияланувчилар учун ташкил қилинган давра суҳбати давомида тарбияланувчилар светофорнинг уч хил ранги — қизил, сариқ, яшил рангли кийимларни кийиб, йўл ҳаракати қоидалари бўйича ўзларининг билим ва кўникмаларини амалда намойиш қилдилар.

Шундан сўнг тарбиячи томонидан “Сирли меҳмон” ташрифи эълон қилиниб, даврага Йўл ҳаракати хавфсизлиги ходими кириб келди. Ушбу ходим томонидан светофор макети ёрдамида савол-жавоб орқали болажонларнинг “Келажак соати” дарсидан олган билимлари синовдан ўтказилди.

Бундан ташқари, давра суҳбати давомида “Рангларга қараб юр!” интерактив ўйини ҳам ташкиллаштирилди. Йўл ҳаракати хавфсизлиги ходими ўйин давомида светофорнинг рангини айтиб турди ва болаларнинг қизил рангда “қотиб туриш”, сариқ, яшил рангида болаларнинг тартибли, белгиланган қоидага кўра, олдинга секин югуриш ҳолатларини кузатиб, уларнинг ҳаракатларига баҳо берди. “Зебра йўлагида ким биринчи?” ўйини ҳам ташкил этилиб, болалар ясама зебра чизиғидан ўтишни ўргандилар.

Шундан сўнг визуал контентдан фойдаланган ҳолда видео намойиш қилинди. Давра суҳбати болаларда кенг ва қизиқарли таассурот қолдирди ҳамда болажонлар давра суҳбати якунида “Сирли меҳмон” — Йўл ҳаракати хавфсизлиги ходимига раҳмат айтдилар.

Мактабгача таълим ташкилотларида “Келажак соати” дарс-машғулоти доирасида амалга оширилаётган бу каби тадбирлар, албатта, жажжи болажонларнинг йўл ҳаракати қоидаларини жуда ёшлигидан пухта ўрганишларида муҳим аҳамият касб этади ва бу борадаги таълимий ва тарбиявий ишлар самарадорлигига эришиш имконини беради.

Ҳулкар Бабажанова, Амударё тумани ММТБ бош методисти.