26-iyun – Xalqaro giyohvandlikka qarshi kurashish kuni

Insoniyat tomonidan “Asr vabosi” deb tan olingan giyohvandlik illatiga qarshi kurashish, ayniqsa, oʻsib kelayotgan yosh avlodni bu illat domiga tushib qolishidan asrash dolzarb masalalardan biri hisoblanadi. Bu borada hamkorlikda ish olib borilsa, samaradorlikka erishish mumkin. Shu sababli mamlakatimizda aholi oʻrtasida ushbu illatning tarqalishiga yoʻl qoʻymaslik, giyohvandlik oqibatida sodir boʻlishi mumkin boʻlgan jinoyatlarning oldini olishga doir choralar belgilab olinib, amalga oshirilmoqda.

Oʻzbekiston Respublikasi Prezidentining 2021-yil 29-noyabrdagi “2022-2025-yillarda Oʻzbekiston Respublikasi jamoat xavfsizligini taʼminlash tezligini rivojlantirish strategiyasi”da belgilangan vazifalarni amalga oshirish boʻyicha “Yoʻl xaritasi”ga koʻra, jamoat xavfsizligini taʼminlashning uslubiy asoslarini yanada rivojlantirishga qaratilgan amaliy tadbirlar natijasida hududlardagi Narkologiya boʻlimlari mutaxassislari tomonidan surunkali ichkilikbozlikka va giyohvandlikka mubtalo boʻlgan shaxslar doimiy tibbiy nazoratga olinib, ularni sogʻlomlashtirish choralari koʻrilmoqda.

Amudaryo tumani Tibbiyot birlashmasi huzuridagi narkologiya xonasi shifokorlari ham ichkilikbozlik va giyohvandlik kasaliga mubtalo boʻlgan shaxslarni roʻyxatga olish, ularning shaxsini sir saqlagan holda muolaja choralarini qoʻllash va sogʻlomlashtirish borasida sezilarli natijalarga erishmoqdalar.

Malakali narkolog shifokor Bahodir Chorshamov rahbarligidagi mazkur narkologiya xonasida ayni paytda 176 nafar surunkali ichkilikbozlikka moyil va 4 nafar giyohvand shaxslar roʻyxatda turishadi. Ularning kasallik holatlarini oʻz vaqtida toʻgʻri tashxislash, shaxsini sir saqlagan holda Respublika narkologiya dispanserida statsionar sharoitda davolanishlari uchun sharoit yaratishga qaratilgan chora-tadbirlar natijasida koʻplab bemorlar sogʻlom hayotga qaytishmoqda.

Ayni paytda, joriy yilning 30-may holatiga 10 nafar bemor Taxiatosh shahridagi, Respublika Narkologiya dispanserida zarur muolajalarni olishmoqda. Yana 3 nafar bemor oʻz ixtiyori bilan mazkur muolaja maskanida davolanishga qaror qilishdi va hozirgi kunda bu bemorlar oʻzlarining tuzalish sari ilk qadamlaridan mamnun.

Tibbiyot birlashmasi huzuridagi narkologiya xonasi qoshidagi narkologik reabilitatsiya punktida tun-u kun navbatchilik tashkil etilgan boʻlib, 9 nafar malakali shifokorlar, 9 nafar hamshira va 10 nafar kichik tibbiy xodimlar bemorlarga namunali tibbiy xizmat koʻrsatib kelishmoqda.

Shuningdek, boʻlim mudiri Bahodir Chorshamov rahbarligida ichkilikbozlik va giyohvandlikka qarshi kurash choralari boʻyicha aholi, ayniqsa, yoshlar oʻrtasida profilaktik suhbatlar, tushuntirish-targʻibot tadbirlari muntazam amalga oshirib kelinmoqda.

Jumladan, 2023-yilning 1-iyun sanasidan 30-iyun kunigacha “Yoshlar orasida giyohvand vositalarning tarqatilishiga qarshi kurash oyligi” doirasida tuman IIB bilan hamkorlikda tezkor profilaktik tadbirlar oʻtkazilib, koʻngilochar maskanlarida yoshlarning spirtli ichimlik isteʼmol qilishlarining oldini olishga qaratilgan nazorat tadbirlari amalga oshirildi.

Shuningdek, tuman IIB bilan hamkorlikda joriy yil 1-maydan 30-iyungacha tuman hududida “Qora dori – 2023” keng qamrovli profilaktik tezkor tadbirlar oʻtkazildi. Ushbu tadbirlarda salomatlik va umr kushandasi boʻlgan giyohvandlikning salbiy oqibatlari, uning oldini olish choralari xususida keng tushunchalar berildi.

Giyohvandlikning oldini olishda, albatta, oila va jamiyatning roli beqiyosdir. Porloq kelajak uchun har birimiz oilada, jamoada sogʻlom turmush tarzi poydevorini yaratishga jiddiy eʼtibor qaratsak, hamkorlikda harakat qilsak, samarali natijalarga erishishimiz mumkin.

Robiya YOʻLDOShEVA.