26 июнь – Халқаро гиёҳвандликка қарши курашиш куни

Инсоният томонидан “Аср вабоси” деб тан олинган гиёҳвандлик иллатига қарши курашиш, айниқса, ўсиб келаётган ёш авлодни бу иллат домига тушиб қолишидан асраш долзарб масалалардан бири ҳисобланади. Бу борада ҳамкорликда иш олиб борилса, самарадорликка эришиш мумкин. Шу сабабли мамлакатимизда аҳоли ўртасида ушбу иллатнинг тарқалишига йўл қўймаслик, гиёҳвандлик оқибатида содир бўлиши мумкин бўлган жиноятларнинг олдини олишга доир чоралар белгилаб олиниб, амалга оширилмоқда.

Ўзбекистон Республикаси Президентининг 2021 йил 29 ноябрдаги “2022-2025 йилларда Ўзбекистон Республикаси жамоат хавфсизлигини таъминлаш тезлигини ривожлантириш стратегияси”да белгиланган вазифаларни амалга ошириш бўйича “Йўл харитаси”га кўра, жамоат хавфсизлигини таъминлашнинг услубий асосларини янада ривожлантиришга қаратилган амалий тадбирлар натижасида ҳудудлардаги Наркология бўлимлари мутахассислари томонидан сурункали ичкиликбозликка ва гиёҳвандликка мубтало бўлган шахслар доимий тиббий назоратга олиниб, уларни соғломлаштириш чоралари кўрилмоқда.

Амударё тумани Тиббиёт бирлашмаси ҳузуридаги наркология хонаси шифокорлари ҳам ичкиликбозлик ва гиёҳвандлик касалига мубтало бўлган шахсларни рўйхатга олиш, уларнинг шахсини сир сақлаган ҳолда муолажа чораларини қўллаш ва соғломлаштириш борасида сезиларли натижаларга эришмоқдалар.

Малакали нарколог шифокор Баҳодир Чоршамов раҳбарлигидаги мазкур наркология хонасида айни пайтда 176 нафар сурункали ичкиликбозликка мойил ва 4 нафар гиёҳванд шахслар рўйхатда туришади. Уларнинг касаллик ҳолатларини ўз вақтида тўғри ташхислаш, шахсини сир сақлаган ҳолда Республика наркология диспансерида стационар шароитда даволанишлари учун шароит яратишга қаратилган чора-тадбирлар натижасида кўплаб беморлар соғлом ҳаётга қайтишмоқда.

Айни пайтда, жорий йилнинг 30 май ҳолатига 10 нафар бемор Тахиатош шаҳридаги, Республика Наркология диспансерида зарур муолажаларни олишмоқда. Яна 3 нафар бемор ўз ихтиёри билан мазкур муолажа масканида даволанишга қарор қилишди ва ҳозирги кунда бу беморлар ўзларининг тузалиш сари илк қадамларидан мамнун.

Тиббиёт бирлашмаси ҳузуридаги наркология хонаси қошидаги наркологик реабилитация пунктида тун-у кун навбатчилик ташкил этилган бўлиб, 9 нафар малакали шифокорлар, 9 нафар ҳамшира ва 10 нафар кичик тиббий ходимлар беморларга намунали тиббий хизмат кўрсатиб келишмоқда.

Шунингдек, бўлим мудири Баҳодир Чоршамов раҳбарлигида ичкиликбозлик ва гиёҳвандликка қарши кураш чоралари бўйича аҳоли, айниқса, ёшлар ўртасида профилактик суҳбатлар, тушунтириш-тарғибот тадбирлари мунтазам амалга ошириб келинмоқда.

Жумладан, 2023 йилнинг 1 июнь санасидан 30 июнь кунигача “Ёшлар орасида гиёҳванд воситаларнинг тарқатилишига қарши кураш ойлиги” доирасида туман ИИБ билан ҳамкорликда тезкор профилактик тадбирлар ўтказилиб, кўнгилочар масканларида ёшларнинг спиртли ичимлик истеъмол қилишларининг олдини олишга қаратилган назорат тадбирлари амалга оширилди.

Шунингдек, туман ИИБ билан ҳамкорликда жорий йил 1 майдан 30 июнгача туман ҳудудида “Қора дори – 2023” кенг қамровли профилактик тезкор тадбирлар ўтказилди. Ушбу тадбирларда саломатлик ва умр кушандаси бўлган гиёҳвандликнинг салбий оқибатлари, унинг олдини олиш чоралари хусусида кенг тушунчалар берилди.

Гиёҳвандликнинг олдини олишда, албатта, оила ва жамиятнинг роли беқиёсдир. Порлоқ келажак учун ҳар биримиз оилада, жамоада соғлом турмуш тарзи пойдеворини яратишга жиддий эътибор қаратсак, ҳамкорликда ҳаракат қилсак, самарали натижаларга эришишимиз мумкин.

Робия ЙЎЛДОШЕВА.