SANITARIYa ShIFOKORLARI TOMONIDAN “MAHALLABAY” IShLASh TIZIMI ORQALI AYoQChI MAHALLASIDA TARGʻIBOT-TAShVIQOT TADBIRI OʻTKAZILDI

Muhtaram Prezidentimiz Shavkat Mirziyoyevning “Mahallabay” ishlash tizimini amaliyotga joriy etish toʻgʻrisidagi tashabbusi hududlardagi  muammo va yechimini kutayotgan masalalarning iloji boricha tezroq bartaraf boʻlishiga mustahkam va ishonchli zamin boʻlmoqda.

“Mahallabay” ishlash tizimi murakkab jarayon boʻlishiga qaramasdan, unda har bir insonning dardini tinglash, uning qismatini tubdan oʻzgartirish, jamiyat taraqqiyotini iqtisodiy oʻsishlar bilangini emas, balki aholining oʻz hayotidan mamnunligi bilan oʻlchash kabi mezonlar mavjud.

Bu borada Amudaryo tumani sanitariya-epidemiologik va jamoat salomatligi boʻlimi mutaxassislari tomonidan  amalga oshirilayotgan ishlar eʼtiborga molik. Xususan, tumanning Ayoqchi mahallasida  amalga oshirilgan “mahallabay” va “xonadonbay” kesimida aholiga yuqumli va yuqumli boʻlmagan, oʻta-havfli yuqumli kasalliklar, parazitar kasalliklarning oldini olish toʻgʻrisidagi targʻibot-tashviqot tadbirida aholiga tarqatma materiallar tarqatilib, yuqumli kasalliklar boʻyicha olib borilgan tushuntirish ishlaridan mahalla ahli zarur maʼlumotlarga ega boʻldilar.

Tadbirda Sanitariya-epidemiologik osoyishtalik va jamoat salomatligi boʻlimi epidemiolog-shifokori Durbek Bobojonov Aholining sanitariya-epidemiologik osoyishtaligi bilan bogʻliq muammoli masalalarni hal etish borasida boʻlim shifokorlari tomonidan tizimli ravishda “Mahallabay” ishlash orqali ovul va mahallarda uchrashuvlar tashkil etilib,muammo va masalalar oʻrganilayotgani haqida toʻxtalib oʻtdi.

Shuningdek, hayotimizning yanada koʻrkam va farovon boʻlmogʻi uchun har bir xonadonda sanitariya  madaniyatini talab darajasida shakllantirish zarurligini taʼkidlab, oilalarda sogʻlom turmush tarzi mustahkam qaror topishi turli yuqumli kasalliklardan himoyalanishning birdan-bir asosi ekanligini qayd etdi.

Durbek Bobojonov oʻz maʼruzasida mahalla ahlini sogʻlom yashab, osoyishta turmush kechirishning oʻziga xos tartib-qoidalariga amalga qilish va bahamjihat ish tutib,yashayotgan mahallasi, hovlisini toza, goʻzal va tartibli maskanga aylantirishga chaqirdi.

Xususan, hovlidagi mavjud vodoprovod suvidan tejab foydalanish, ichimlik suvi tashib keltiriladigan xonadonlarda esa ichimlik suvini qopqoqli maxsus idishlarda saqlash, yangi suvni solishdan oldin ushbu idishni toza suv bilan yuvib tashlash, har kim oʻz hovlisini oʻzi yashashi uchun qulay va mos qilib jihozlashi, yashash xonalari, oshxona, tandirxona, molxona, tovuqxona va hojatxonalarni qurishda hamda taʼmirlashda quruvchi mutaxasislar bilan bamaslahat ish tutish zarurligini taʼkidladi.

 Shuningdek, tadbirda Ayoqchi oilaviy poliklinikasi umumiy amaliyot shifokori Gulnora Shomurodova azaldan ota-bobolarimiz hovlida alohida chuqur qazib, har kungi chiqindilarni shu chuqurga koʻmgani, magʻzava suvlarini oʻraga toʻkishgani va shu oqilona tajribani bugungi kunimizda ham qoʻllash ayni muddao ekanligini aytib oʻtdi.

Tadbir davomida mutaxasislar yuvinish joylari hovlining bir chekkasida, yoʻlaklari beton yoki gʻisht bilan qoplangan boʻlishi, oila aʼzolari alohida sovun, tish yuvish choʻtkasi va sochiqlardan foydalanishlari lozimligi, bolalarni yoshligidan ozoda va sogʻlom turmush tarziga amal qilib yashashga oʻrgatish, orastalikka amal qilish orqali yuqumli kasalliklarning oldini olish mumkinligini ularga doimiy eslatib turish zarurligini taʼkidladilar.

Shuningdek, tadbirda uy hayvonlari, it, mol va mushuklarni vaqti-vaqti bilan veterinariya koʻrigidan oʻtkazib, ularni veterinariya xizmati tomonidan yuqumli kasalliklarga qarshi emlatish, yirik va mayda shoxli mollarda kanalar aniqlangan holatlarda ularni qoʻlda terib, ezib oʻldirmaslik, aks holda oʻta havfli, yuqumli kasallik yuqishi mumkinligi, bunday holatlarda darhol veterinariya vrachini chaqirib, uy hayvonini dezinsektsiya qildirish, uyda boqilayotgan yirik va mayda shoxli  qora mollarni oʻz vaqtida yuqumli kasalliklarga qarshi emlatib turish boʻyicha zarur tavsiyalar berildi.

Bundan tashqari, yoz faslida meva-chevalarni yuvib isteʼmol qilish oshqozon-ichak kasalliklaridan saqlanishning asosiy omili ekanligi taʼkidlab oʻtildi.

Tadbir davomida Ayoqchi MFY raisi Allayor Qalandarov mahalla ahli tomonidan obodonlashtirish ishlari yaxshi yoʻlga qoʻyilgani, xonadonlar atrofi, koʻcha boʻylari va hududdagi suv yoʻllarining orastaligi xususida soʻz yuritib, mahalladoshlarini mutaxassis shifokorlarning maslahat va tavsiyalariga amal qilishga chaqirdi.

Tadbir ishtirokchilari turli yuqumli kasalliklar va ularning profilaktikasi yuzasidan mutaxassislarga savollar berdilar va tegishli javoblar oldilar.

Robiya YOʻLDOShEVA.