QARZDORLIGI BOʻLGAN AVTOTRANSPORT VOSITALARI HAYDOVChILARINI ANIQLASh BOʻYIChA REYD TADBIRLARI OʻTKAZILDI
Transport yoʻllarida xavfsizlikni taʼminlash, yoʻl-transport hodisalarining oldini olish, qoidabuzarliklarni kamaytirish hozirgi kunning eng dolzarb muammolaridan biridir. Shu bois yoʻl-patrul xizmati xodimlari tomonidan harakat xavfsizligi taʼminlash, xavfli hodisalarning oldini olish maqsadida reyd tadbirlari oʻtkazilib kelinmoqda. Bu borada yoʻlga qoʻyilgan tizimli ishlar yoʻl-transport hodisalarining oldini olishda muhim ahamiyat kasb etib kelmoqda.
26-may kuni Amudaryo tumani hududida tuman Ichki ishlar boʻlimining yoʻl-patrul xizmati xodimlari tomonidan qarzdorligi boʻlgan avtotransport vositalari haydovchilarini aniqlash boʻyicha reyd tadbirlari oʻtkazildi. Reyd tadbirini namunali oʻtkazish maqsadida yoʻl-patrul xizmati xodimlari oʻz xizmat burchlarini astoydil bajarishdi.
Tadbirda avtomobil yoʻllaridagi svetoforlar va piyodalar uchun moʻljallangan yoʻl chiziqlari, yoʻl belgilari, piyodalar oʻtish joylari nazorat koʻrigidan oʻtkazildi. Fuqarolar va velosiped haydovchilari bilan suhbatlar tashkil etilib, yoʻllarda harakatlanish qoidalari tushuntirildi. Shuningdek, reyd tadbirlari davomida qoidabuzarliklarga yoʻl qoʻygan 44 nafar avtotransport haydovchilardan jarimalar undirildi.
Reyd tadbiri davomida transport vositasining oynalarini meʼyoridan ortiqcha qoraytirish, harakat vaqtida telefondan foydalanish, xavfsizlik kamarlarini taqmasdan harakatlanish kabi holatlarda haydovchilarga nisbatan tegishli choralar koʻrilishi tushuntirildi. Shuningdek, yoʻl-patrul xizmati xodimlari haydovchilarga joriy yil 18-aprelda “Maʼmuriy jarimalarni toʻlashda aholiga qoʻshimcha qulayliklar yaratilishi munosabati bilan Oʻzbekiston Respublikasi Maʼmuriy javobgarlik toʻgʻrisidagi kodeksiga oʻzgartish kiritish toʻgʻrisida”gi Qonuni qabul qilingani haqida maʼlumot berib, ushbu Qonunga koʻra qayta tahrir qilingan Maʼmuriy javobgarlik toʻgʻrisidagi kodeksining 332-1-moddasi haqida tushunchalar berishdi.
Taʼkidlash joizki, yangi tahrirdagi matnda huquqbuzar oʻziga jarima solish toʻgʻrisidagi qaror topshirilgan kundan boshlab, oʻn besh kun ichida jarima miqdorining ellik foizini yoki oʻttiz kun ichida jarima miqdorining yetmish foizini ixtiyoriy ravishda toʻlagan taqdirda, u jarimaning qolgan qismini toʻlashdan ozod qilinishi koʻrsatilgan. Mazkur soddalashtirilgan tartib sud qarorlari bilan tayinlanadigan jarimalarga ham nisbatan qoʻllaniladigan boʻldi. Lekin bu tartib ayrim holatlarga tatbiq etilmaydi. Yaʼni, transport vositalarini mast holda boshqarganlik, kemalarni mast holda boshqarganlik, transport vositalari haydovchilarining va yoʻl-harakati boshqa ishtirokchilarining mastligi yoki mast emasligini aniqlash uchun tekshiruvdan oʻtishdan boʻyin tovlaganlik kabi holatlarda qoʻllanilmaydi.
Shuningdek, mast holdagi haydovchilarning yoki transport vositalarini boshqarish huquqi boʻlmagan shaxslarning transport vositalarini boshkarishiga yoʻl qoʻyilgani, jarima solish toʻgʻrisidagi qaror ustidan shikoyat qilinganida yoki protest bildirilganda, bir yil davomida aynan shunday huquqbuzarlik uchun maʼmuriy jazo qoʻllanilganidan soʻng takror sodir etilganida ham tatbiq etilmaydi.
Reyd tadbirlarida qonunchilikdagi ushbu yangiliklar keng tushuntirildi. Har bir haydovchi transport vositasini boshqarayotganda nafaqat oʻzi, balki yoʻlovchilar va piyodalarning hayotiga masʼuliyat bilan qarashlari lozimligi, piyodalar esa yoʻl harakati ishtirokchisi ekanligini unutmasligi va oʻrnatilgan qoidalarga rioya etishlari kerakligi takror va takror aytib oʻtildi.
Bu kabi reyd tadbirlari xavfli yoʻl-transport hodisalarining oldini olishga xizmat qiladi.
O.Xudoyberganova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
