ҚАРЗДОРЛИГИ БЎЛГАН АВТОТРАНСПОРТ ВОСИТАЛАРИ ҲАЙДОВЧИЛАРИНИ АНИҚЛАШ БЎЙИЧА РЕЙД ТАДБИРЛАРИ ЎТКАЗИЛДИ
Транспорт йўлларида хавфсизликни таъминлаш, йўл-транспорт ҳодисаларининг олдини олиш, қоидабузарликларни камайтириш ҳозирги куннинг энг долзарб муаммоларидан биридир. Шу боис йўл-патруль хизмати ходимлари томонидан ҳаракат хавфсизлиги таъминлаш, хавфли ҳодисаларнинг олдини олиш мақсадида рейд тадбирлари ўтказилиб келинмоқда. Бу борада йўлга қўйилган тизимли ишлар йўл-транспорт ҳодисаларининг олдини олишда муҳим аҳамият касб этиб келмоқда.
26 май куни Амударё тумани ҳудудида туман Ички ишлар бўлимининг йўл-патруль хизмати ходимлари томонидан қарздорлиги бўлган автотранспорт воситалари ҳайдовчиларини аниқлаш бўйича рейд тадбирлари ўтказилди. Рейд тадбирини намунали ўтказиш мақсадида йўл-патруль хизмати ходимлари ўз хизмат бурчларини астойдил бажаришди.
Тадбирда автомобиль йўлларидаги светофорлар ва пиёдалар учун мўлжалланган йўл чизиқлари, йўл белгилари, пиёдалар ўтиш жойлари назорат кўригидан ўтказилди. Фуқаролар ва велосипед ҳайдовчилари билан суҳбатлар ташкил этилиб, йўлларда ҳаракатланиш қоидалари тушунтирилди. Шунингдек, рейд тадбирлари давомида қоидабузарликларга йўл қўйган 44 нафар автотранспорт ҳайдовчилардан жарималар ундирилди.
Рейд тадбири давомида транспорт воситасининг ойналарини меъёридан ортиқча қорайтириш, ҳаракат вақтида телефондан фойдаланиш, хавфсизлик камарларини тақмасдан ҳаракатланиш каби ҳолатларда ҳайдовчиларга нисбатан тегишли чоралар кўрилиши тушунтирилди. Шунингдек, йўл-патруль хизмати ходимлари ҳайдовчиларга жорий йил 18 апрелда “Маъмурий жарималарни тўлашда аҳолига қўшимча қулайликлар яратилиши муносабати билан Ўзбекистон Республикаси Маъмурий жавобгарлик тўғрисидаги кодексига ўзгартиш киритиш тўғрисида”ги Қонуни қабул қилингани ҳақида маълумот бериб, ушбу Қонунга кўра қайта таҳрир қилинган Маъмурий жавобгарлик тўғрисидаги кодексининг 332-1-моддаси ҳақида тушунчалар беришди.
Таъкидлаш жоизки, янги таҳрирдаги матнда ҳуқуқбузар ўзига жарима солиш тўғрисидаги қарор топширилган кундан бошлаб, ўн беш кун ичида жарима миқдорининг эллик фоизини ёки ўттиз кун ичида жарима миқдорининг етмиш фоизини ихтиёрий равишда тўлаган тақдирда, у жариманинг қолган қисмини тўлашдан озод қилиниши кўрсатилган. Мазкур соддалаштирилган тартиб суд қарорлари билан тайинланадиган жарималарга ҳам нисбатан қўлланиладиган бўлди. Лекин бу тартиб айрим ҳолатларга татбиқ этилмайди. Яъни, транспорт воситаларини маст ҳолда бошқарганлик, кемаларни маст ҳолда бошқарганлик, транспорт воситалари ҳайдовчиларининг ва йўл-ҳаракати бошқа иштирокчиларининг мастлиги ёки маст эмаслигини аниқлаш учун текширувдан ўтишдан бўйин товлаганлик каби ҳолатларда қўлланилмайди.
Шунингдек, маст ҳолдаги ҳайдовчиларнинг ёки транспорт воситаларини бошқариш ҳуқуқи бўлмаган шахсларнинг транспорт воситаларини бошкаришига йўл қўйилгани, жарима солиш тўғрисидаги қарор устидан шикоят қилинганида ёки протест билдирилганда, бир йил давомида айнан шундай ҳуқуқбузарлик учун маъмурий жазо қўлланилганидан сўнг такрор содир этилганида ҳам татбиқ этилмайди.
Рейд тадбирларида қонунчиликдаги ушбу янгиликлар кенг тушунтирилди. Ҳар бир ҳайдовчи транспорт воситасини бошқараётганда нафақат ўзи, балки йўловчилар ва пиёдаларнинг ҳаётига масъулият билан қарашлари лозимлиги, пиёдалар эса йўл ҳаракати иштирокчиси эканлигини унутмаслиги ва ўрнатилган қоидаларга риоя этишлари кераклиги такрор ва такрор айтиб ўтилди.
Бу каби рейд тадбирлари хавфли йўл-транспорт ҳодисаларининг олдини олишга хизмат қилади.
О.Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
