69-SONLI MAKTABDA BOShLANGʻICh SINF OʻQUVChILARINING “XAYR, BIRINChI USTOZIM!” TADBIRI OʻTKAZILDI

25-may kuni barcha umumtaʼlim maktablarida boshlangʻich sinf oʻquvchilarining maktabga kelgan ilk kunidan kutib olgan va qoʻllariga qalam tutishni oʻrgatgan, alifbeni tanitgan birinchi ustozlari bilan xayrlashishga bagʻishlangan tadbirlar oʻtkazildi. Oʻquvchilar oʻzlariga 4-yil mobaynida taʼlim va tarbiya bergan birinchi ustozga samimiy minnatdorchilik bildirib, katta ehtirom koʻrsatishmoqda.

Ayoqchi mahallasidagi 69-sonli maktabning 4-“A” sinf oʻquvchilari ham boʻlib oʻtgan “Xayr, birinchi ustozim!” tadbirida taʼlim bergan birinchi ustozi sinf rahbari Jumagul Boltayevadan olgan bilimlarini namoyish etishdi. Tadbirda maktab direktorining maʼnaviy-maʼrifiy ishlar boʻyicha oʻrinbosari Joʻrabek Tajimurodov, ijodiy-madaniy ishlar boʻyicha targʻibotchisi Sanamjon Matyakubova, Ayoqchi mahalla fuqarolar yigʻini raisi Allayor Qalandarov, xotin-qizlar faoli Nigora Polvonovalar ham qatnashishdi.

Tadbirda soʻzga chiqqanlar dastlab oʻquvchilarini boshlangʻich taʼlimni puxta egallaganliklari va yuqori sinfga oʻtishayotgani bilan tabriklashdi. Shuningdek, ushbu bilim maskanida yaratilgan sharoitlar, oʻquvchilarga taʼlim berayotgan bilimli va salohiyatli oʻqituvchilar, tashkil etilgan turli toʻgaraklar, har xil tanlovlarda iqtidorini yuzaga chiqarayotgan va yutuqlarga erishayotgan yoshlar haqida soʻz yuritildi.

Taʼkidlanganidek, ushbu maktabda pedagoglar jamoasi oʻzaro hamjihatlikda, ahillikda yosh avlodga taʼlim-tarbiya berib kelishmoqda. Oʻtgan davrlar mobaynida maktabda taʼlim sifatini oshirish boʻyicha samarali ishlar amalga oshirildi. Natijada Fanlar olimpiadasida maktab oʻquvchilari turli fanlardan tuman va Qoraqalpogʻiston Respublikasi bosqichlarida faol qatnashib, sovrinli oʻrinlarni qoʻlga kiritib kelmoqdalar. Oʻtkazilayogan turli sport musobaqalarida ham maktab oʻquvchilari faol qatnashib, epchillik hamda uddaburonlik qobiliyatlarini namoyon qilib, respublika miqyosidagi sovrinli oʻrinlarni qoʻlga kiritishmoqda. Maktabdagi oʻquvchilar tarbiyasi, ularga berilayotgan bilim va koʻnikmalar doimiy eʼtiborda boʻlgani sababli 69-maktab tumanimizdagi namunali maktablar safidan joy olgan.

Tadbir bayramona bezatilgan sahnada oʻquvchilar tomonidan tayyorlangan musiqiy dastur bilan davom ettirildi. Oʻquvchilar Vatan va tinchlik haqidagi, ustozlarga bagʻishlangan sheʼrlarni aytishdi. Jozibali milliy raqslar, xushnavo qoʻshiqlar kuylab, tadbirga yanada fayz kiritishdi. Oʻquvchilar ijrosidagi sahna koʻrinishidagi ertak ham tomoshabinlarga juda manzur boʻldi. Ular ertak qahramonlari obrazini mohirona ijro etishga harakat qildilar va olqishlarga sazovor boʻldilar.

Tadbirda boshlangʻich sinfda aʼlo baholarga oʻqigan oʻquvchilarga maktab maʼmuriyati tomonidan faxriy yorliqlar ham topshirildi. Ushbu marosimda soʻzga chiqqan boshlangʻich sinf oʻqituvchisi, bolalarning birinchi ustozi Jumagul Boltayeva 4-sinfni muvaffaqiyatli tugatgan oʻquvchilariga eng ezgu tilaklarni tilab, kelgusida maktabni aʼlo baholarga tugatishlarini, jamiyat kelajagagiga munosib, komil insonlar boʻlib voyaga yetishlarini, oʻzlari sevgan kasbi, hunarining mohir egalari boʻlib yetishishlarini tiladi. Tadbirga tashrif buyurgan ota-onalar ham farzandlariga 4-yil mobaynida taʼlim-tarbiya bergan birinchi ustozga, oʻqituvchilarga katta minnatdorchilik bildirdilar.

O.Xudoyberganova.