83-sonli maktabda “Hayot goʻzal, yashash uchun 1001 sabab!” aktsiyasi doirasida rang-tasvir yoʻnalishi ishqibozlari ishtirokida koʻrik-tanlov oʻtkazildi

Hayot – chindanam goʻzal. Uning har lahzasidan bahra olib, qadrini bilib yashash esa yanada gashtli. Lekin inson hayotida baʼzan shunday lahzalar boʻladiki, kundalik tashvishlar, oiladagi arzimagan dilxiraliklar tufayli koʻngli choʻkib, tushkun kayfiyatga tushib qoladi va buning oqibatida oʻziga bevaqt kasallik orttirib oladi. Asabiylashib, odamovi, baʼzan jizzaki boʻlib qolganidan qoʻli ishga bormaydi, koʻpchilikka, aralashishdan oʻzini chetga oladigan, qandaydir loqayd kayfiyatda yuradi.

Xoʻsh, insonni bu kabi noxush holatdan olib chiqish, uning ruhiy holatini yaxshilashning imkoni bormi? “Albatta”, deb javob berishadi psixologlar.

Joriy yilning 25-27-aprel sanalarida Amudaryo tumanida “Hayot goʻzal, yashash uchun 1001 sabab” mavzusida aktsiya oʻtkazildi. Aktsiya doirasidagi tadbirlarga taʼlim-tarbiya muassasalari xodimlari, umumtaʼlim maktablarining oʻquvchilari va ularning ota-onalari, ovul va mahalla fuqarolar yigʻinlari xodimlari, IIB inspektor-psixologlari hamda tuman hududidagi oilaviy poliklinikalar mutaxassislari qamrab olindi.

Amudaryo tumanidagi 83-sonli umumtaʼlim maktabida Nafisa Aminboyeva rahbarligida boʻlib oʻtgan “Hayot goʼzal!” mavzusidagi rang-tasvir yoʻnalishi ishqibozlari ishtirokidagi koʻrik-tanlov oʻzining qamrovi hamda rassomlik boʻyicha iqtidori bor oʻquvchi-yoshlarga koʻtarinki kayfiyat bagʻishlagani bilan muhim ahamiyat kasb etdi.

Koʻrik-tanlovda rassomlik yoʻnalishiga qiziquvchi iqtidorli yoshlar faol ishtirok etishib, oʻz qobiliyatlarini amalda namoyon qilish orqali kelgusi orzulari xususida toʻlqinlanib soʻzladilar, chizgan rasmlari, tabiat manzaralari, natyurmort janridagi ijodiy ishlari bilan oʻz kelajaklariga loqayd emasliklarini, hayot goʻzalliklarini chuqur idrok etishga qodir shaxslar sifatida shakllanayotganlarini rang-tasvir jilolarida gavdalantira oldilar.

Tumandagi maktablarda toʻrtta bosqichda boʻlib oʻtgan mazkur aktsiyadan koʻzlangan maqsad – oʻqituvchi va oʻquvchi oʻrtasidagi shaxslararo munosabatlarda ijobiy muloqot tamoyillarini shakllantirish, ota-ona va farzand oʻrtasida yuzaga kelishi mumkin boʻlgan salbiy munosabatlarning oldini olish va ularni bartaraf etish, ijtimoiy-psixologik xususiyatlarga koʻra, shok holatga tushib qolgan oʻquvchilar bilan jamoaviy ishlash orqali ularning ruhiyatida ijobiy oʻzgarishlarga erishish.

Bundan tashqari, taʼlim muassasasi xodimlari va oʻquvchilarida hayotiy koʻnikmalar va erkin kreativ fikrlashni rivojlantirish, oʻquvchilar orasida zoʻravonlik, autodestruktiv va destruktiv xulq-atvor, jinoyatchilik singari salbiy illatlarga qarshi kuchli immunitetni shakllantirish orqali ularda hayotni sevish, hayotdan zavqlanib, atrofidagilarga ham zavq-shavq ulashib yashash tuygʻusini uygʻotishdan iborat.

Umumtaʼlim muassasalarida uch kun davom etgan “Hayot goʻzal, yashash uchun 1001 sabab!” mavzusidagi 4 bosqichli aktsiya doirasida boshlangʻich sinf oʻqituvchilari va ota-onalar uchun “Siz farzandingizni bilasizmi?” mavzusida kreativ oʻyinlar, oʻrta sinf oʻquvchilari va ularning ota-onalari uchun “Yashil doira orqali goʻzal hayot sari!” mavzusida breyn-ringlar, yuqori sinf oʻquvchilari va ularning ota-onalariga moʻljallangan “Bizning oilamiz eng goʻzal oila ekanligiga 1001 sabab” mavzusida koʻrik-tanlov, pedagog-xodimlar uchun “Oʻqituvchilik – eng sharafli kasb ekanligiga 1001 sabab” mavzusida koʻrik-tanlov hamda “Hayot goʼzal!” deb nomlangan qiziqarli seminar-trening mashgʻulotlari tashkil etildi.

Shuningdek, xoʻjalik ishlari boʻyicha masʼul xodimlar uchun “Qadriyatlar” va “Hayotiy koʻnikmalar” trening mashgʻulotlari, ovul va mahalla fuqarolar yigʻinlari xodimlari hamda IIB inspektor-psixologlari, oilaviy poliklinikalar shifokorlari ishtirokidagi tadbirlar gʻoyatda mazmunli, qiziqarli taassurotlarga boy tarzda oʻtdi.

“Hayot goʻzal, yashash uchun 1001 sabab!” mavzusidagi aktsiya doirasida oʻtkazilgan barcha tadbirlar ishtirokchilarga olam-olam zavq-shavq bagʻishladi.

Robiya YOʻLDOShEVA.