“AMIR TEMUR BOBOMIZ DOIMO BARHAYoT” DEB NOMLANGAN TADBIR OʻTKAZILDI

Sohibqiron Amir Temur tavalludiga joriy yilning 9-aprelida 687-yil toʻldi. Oʻrta asrlarning yiriy davlat arbobi, buyuk sarkarda, markazlashgan davlat asoschisi, ilm-fan va madaniyat homiysi, oʻz davrining maʼrifatparvari boʻlgan ulugʻ bobomiz yashab oʻtgan davrdan beri qancha vaqtlar oʻtgan boʻlsa-da uning hayoti va faoliyati avlodlar uchun hamon yoʻlchi yulduz boʻlib xizmat qilmoqda. Chunki jahongir bobomizning hayoti haqiqiy vatanparvarlik namunasidir.

Sana munosabati bilan Sohibqiron bobomizga bagʻishlab koʻpgina tadbirlar oʻtkazilmoqda.

Shu yilning 8-aprelida Amudaryo tumanidagi 34-sonli maktabda ham Amir Temur tavalludiga 687-yil toʻlishi munosabati bilan maʼnaviy- maʼrifiy tadbir oʻtkazildi. Unda maktab oʻqituvchilari, oʻquvchilari, ularning ota-onalari ishtirok etdilar.

Tadbirni maktabning tarix fani oʻqituvchisi Nurbek Otajonov, ijodiy-madaniy masalalar boʻyicha targʻibotchi Surayyo Bozorboyevalar tashkillashtirdilar. Maktabning maʼnaviy-maʼrifiy ishlar boʻyicha direktor oʻrinbosari Sherzod Sultonov kechani ochib berdi.

Maʼlumki 14-asrning ikkinchi yarmi va 15-asr boshlarida moʻgʻullar hukmronligi va feodal tarqoqliq hukm surishi natijasida bosqinchilar zulmidan ezilgan Markaziy Osiyoda Amir Temur boshchiligida yagona tugʻ ostida markazlashgan kuchli va mustaqil davlat tashkil topdi, 27 ta davlatni oʻz ichiga olgan Amir temur saltanatiga asos solindi.

Jahongir bobomizning hayot yoʻli, harbiy salohiyati va xalqparvarligi, maʼrifatparvarligi, adolatliligi, davlatni boshqarishdagi cheksiz mahorati oradan shuncha vaqtlar oʻtsa-da, hamon dunyo xalqlariga ibrat boʻlib kelmoqda.

Tadbirda tarix fani oʻqituvchisi Gulnora Hayitmurova Amir Temurning hayoti va faoliyati, Oʻrta Osiyo xalqlari taraqqiyotiga, ilm-fan rivojiga qoʻshgan beqiyos hissasi haqida qiziqarli maʼruza qildi.

Shundan soʻng maktabning 1-sinf oʻquvchilari ustozi Dildora Sharipova koʻmagida tayyorlagan Sohibqiron bobomiz hayotiga oid sahna koʻrinishini namoyish etdilar. 7-a, b hamda 8-b sinflarning iqtidorli oʻquvchilari Amir Temurga bagʻishlangan sheʼrlarni ifodali oʻqib, uning hayotidan sahna koʻrinishlarini ijro etdilar.

Shuni alohida eʼtirof etish kerakki, mazkur maktabda 3-yildan beri faoliyat yuritayotgan “Yosh kitobxon” va oʻzbek jang sanʼati toʻgaraklari ishtirokchilari maktabda oʻtkaziladigan barcha tadbirlarda faol ishtirok etishadi, oʻz iqtidorlarini namoyish etib, qiziqarli oʻtishiga hissa qoʻshishadi. Mazkur tadbirda ham ularning har chiqishlari barchada ulkan taassurotlar qoldirdi. Xususan, oʻzbek jang sanʼati toʻgaragi aʼzolarining Amir Temur askarlari sifatidagi chiqishlarini barcha ishtirokchilar qarsaklar bilan olqishlab turdilar.

Tajribali murabbiy Mahmudjon Safarboyev rahbarligida oʻzbek jang sanʼati sir-asrorlarini qunt bilan oʻrganayotgan oʻquvchilar ushbu sport turining koʻpgina elementlari Amir Temur bobomiz joriy etgan harbiy mashgʻulotdan joy olganligini yaxshi bilishadi. Bu ularga faxr bagʻishlaydi. Toʻgarak aʼzolari sportning ushbu turi boʻyicha nufuzli musobaqalarda, Oʻzbekiston chempionatlarida qoʻlga kiritayotgan salmoqli yutuqlar esa hammamizni quvontiradi. Yaqinda toʻgarakning mohir aʼzolaridan 5 nafari Qozogʻistonda oʻtkazilagan xalqaro musobaqada ishtirok etish uchun joʻnab ketishdi.

Tadbirda maktabda Sohibqiron bobomizning munosib avlodlari kamolga yetayotgani taʼkidlandi. Tadbir maktab badiiy havaskorlari ijrosidagi kuy-qoʻshiqlar bilan yakunlandi va barcha ishtirokchilarga ulkan maʼnaviy ruh baxsh etdi.

Oygul RAJABOVA.