“АМИР ТЕМУР БОБОМИЗ ДОИМО БАРҲАЁТ” ДЕБ НОМЛАНГАН ТАДБИР ЎТКАЗИЛДИ
Соҳибқирон Амир Темур таваллудига жорий йилнинг 9 апрелида 687 йил тўлди. Ўрта асрларнинг йирий давлат арбоби, буюк саркарда, марказлашган давлат асосчиси, илм-фан ва маданият ҳомийси, ўз даврининг маърифатпарвари бўлган улуғ бобомиз яшаб ўтган даврдан бери қанча вақтлар ўтган бўлса-да унинг ҳаёти ва фаолияти авлодлар учун ҳамон йўлчи юлдуз бўлиб хизмат қилмоқда. Чунки жаҳонгир бобомизнинг ҳаёти ҳақиқий ватанпарварлик намунасидир.
Сана муносабати билан Соҳибқирон бобомизга бағишлаб кўпгина тадбирлар ўтказилмоқда.
Шу йилнинг 8 апрелида Амударё туманидаги 34-сонли мактабда ҳам Амир Темур таваллудига 687 йил тўлиши муносабати билан маънавий- маърифий тадбир ўтказилди. Унда мактаб ўқитувчилари, ўқувчилари, уларнинг ота-оналари иштирок этдилар.
Тадбирни мактабнинг тарих фани ўқитувчиси Нурбек Отажонов, ижодий-маданий масалалар бўйича тарғиботчи Сурайё Бозорбоевалар ташкиллаштирдилар. Мактабнинг маънавий-маърифий ишлар бўйича директор ўринбосари Шерзод Султонов кечани очиб берди.
Маълумки 14-асрнинг иккинчи ярми ва 15-аср бошларида мўғуллар ҳукмронлиги ва феодал тарқоқлиқ ҳукм суриши натижасида босқинчилар зулмидан эзилган Марказий Осиёда Амир Темур бошчилигида ягона туғ остида марказлашган кучли ва мустақил давлат ташкил топди, 27 та давлатни ўз ичига олган Амир темур салтанатига асос солинди.
Жаҳонгир бобомизнинг ҳаёт йўли, ҳарбий салоҳияти ва халқпарварлиги, маърифатпарварлиги, адолатлилиги, давлатни бошқаришдаги чексиз маҳорати орадан шунча вақтлар ўтса-да, ҳамон дунё халқларига ибрат бўлиб келмоқда.
Тадбирда тарих фани ўқитувчиси Гулнора Ҳайитмурова Амир Темурнинг ҳаёти ва фаолияти, Ўрта Осиё халқлари тараққиётига, илм-фан ривожига қўшган беқиёс ҳиссаси ҳақида қизиқарли маъруза қилди.
Шундан сўнг мактабнинг 1-синф ўқувчилари устози Дилдора Шарипова кўмагида тайёрлаган Соҳибқирон бобомиз ҳаётига оид саҳна кўринишини намойиш этдилар. 7-а, б ҳамда 8-б синфларнинг иқтидорли ўқувчилари Амир Темурга бағишланган шеърларни ифодали ўқиб, унинг ҳаётидан саҳна кўринишларини ижро этдилар.
Шуни алоҳида эътироф этиш керакки, мазкур мактабда 3 йилдан бери фаолият юритаётган “Ёш китобхон” ва ўзбек жанг санъати тўгараклари иштирокчилари мактабда ўтказиладиган барча тадбирларда фаол иштирок этишади, ўз иқтидорларини намойиш этиб, қизиқарли ўтишига ҳисса қўшишади. Мазкур тадбирда ҳам уларнинг ҳар чиқишлари барчада улкан таассуротлар қолдирди. Хусусан, ўзбек жанг санъати тўгараги аъзоларининг Амир Темур аскарлари сифатидаги чиқишларини барча иштирокчилар қарсаклар билан олқишлаб турдилар.
Тажрибали мураббий Маҳмуджон Сафарбоев раҳбарлигида ўзбек жанг санъати сир-асрорларини қунт билан ўрганаётган ўқувчилар ушбу спорт турининг кўпгина элементлари Амир Темур бобомиз жорий этган ҳарбий машғулотдан жой олганлигини яхши билишади. Бу уларга фахр бағишлайди. Тўгарак аъзолари спортнинг ушбу тури бўйича нуфузли мусобақаларда, Ўзбекистон чемпионатларида қўлга киритаётган салмоқли ютуқлар эса ҳаммамизни қувонтиради. Яқинда тўгаракнинг моҳир аъзоларидан 5 нафари Қозоғистонда ўтказилаган халқаро мусобақада иштирок этиш учун жўнаб кетишди.
Тадбирда мактабда Соҳибқирон бобомизнинг муносиб авлодлари камолга етаётгани таъкидланди. Тадбир мактаб бадиий ҳаваскорлари ижросидаги куй-қўшиқлар билан якунланди ва барча иштирокчиларга улкан маънавий руҳ бахш этди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
