YaNGILANAYoTGAN KONSTITUTsIYaDA FUQAROLARNING BEPUL TIBBIY YoRDAM OLIShI KAFOLATLANGAN

Oʻzbekiston xalqi juda muhim ijtimoiy-siyosiy jarayon – yangilanayotgan Konstitutsiyaviy qonun loyihasi qabul qilinadigan kun ostonasida turibdi. Ushbu hujjatda mamlakat fuqarolarining huquqlari, erkinliklari va qonuniy manfaatlari toʻla aks etgan, barcha sohalarni taraqqiy ettirish yoʻl-yoʻriqlari oʻz ifodasini topganligni aholi tomonidan haqli eʼtirof etilmoqda. Shunisi eʼtiborliki yangilanayotgan Konstitutsiya loyihasini ishlab chiqishda keng jamoatchilik, siyosiy partiyalar, jamoat tashkilotlari, ilmiy doiralar vakillari, ziyolilar faol ishtirok etdi va Konstitutsiyamiz 65 foizga yangilanmoqda.

Bunday oʻzgarishlar orasida bizning sohamizga oid bandlar ham borligi, ular aholiga tibbiy xizmat koʻrsatish sifatini oshirish, ijtimoiy taʼminot miqdorini koʻpaytirish koʻzda tutilayotganligi shifokor sifatida meni juda quvontiradi. Yangi oʻzgarishlar fuqarolarning turmush darajasini yaxshilash, sogʻligʻini, mehnat filish salohiyatini saqlagan holda jamiyatning hech bir aʼzosining eʼtibordan chetda qolmasligini taʼminlaydi.

Konstitutsiyaning 48-moddasi ikkinchi qismiga “Oʻzbekiston Respublikasi fuqarolari tibbiy yordamning  kafolatlangan hajmini qonunda belgilangan tartibda davlat hisobidan olishga haqli”, degan norma kiritilayotgani – har bir fuqaroga davlat hisobidan bepul tarzda, kafolatli, sifatli tibbiy yordam olish huquqini kafolatlaydi. Ixtisoslashgan markazlarda bepul davolanadigan kasalliklar roʻyxati shakllantirilib, tibbiy yordam uchun yoʻllanma elektron navbat asosida berilayotganligi, eng muhimi – mablagʻlar shifoxonaga emas, balki aniq bemorga ajratilayotganligi bu inson omiliga eʼtibor va gʻamxoʻrlikning namunasidir.

Yangilanayotgan Konstitutsiyada 27 ta yangi modda  kiritilib, moddalar soni 128 tadan 155 taga oshmoqda, amaldagi 275 ta normasi 434 taga koʻpaymoqda. Va bu oʻzgarishlar kelgusida mamlakatimiz aholisining emin-erkin, obod va farovon hayotini, barcha sohalarning taraqqiyot yoʻlini belgilab bermoqda.

Ushbu muhim hujjat Oliy Majlis Qonunchilik palatasi qaroriga koʻra “Oʻzbekiston Respublikasining Konstitutsiyasi toʻgʻrisida”gi Oʻzbekiston Respublikasi Konstitutsiyaviy Qonun loyihasi referendumga qoʻyilmoqda.

Men barcha tibbiyot xodimlarini, tumanimiz fuqarolarini 30-mart kuni oʻtkaziladigan umumxalq referendiumida faollik bilan ishtirok etishga, oʻzgarishlarni yakdillik bilan qoʻllab-quvvatlashga chaqiraman.

Jumaboy YaVQAShEV, tuman Tibbiyot birlashmasi shifokori.