ЯНГИЛАНАЁТГАН КОНСТИТУЦИЯДА ФУҚАРОЛАРНИНГ БЕПУЛ ТИББИЙ ЁРДАМ ОЛИШИ КАФОЛАТЛАНГАН

Ўзбекистон халқи жуда муҳим ижтимоий-сиёсий жараён – янгиланаётган Конституциявий қонун лойиҳаси қабул қилинадиган кун остонасида турибди. Ушбу ҳужжатда мамлакат фуқароларининг ҳуқуқлари, эркинликлари ва қонуний манфаатлари тўла акс этган, барча соҳаларни тараққий эттириш йўл-йўриқлари ўз ифодасини топганлигни аҳоли томонидан ҳақли эътироф этилмоқда. Шуниси эътиборлики янгиланаётган Конституция лойиҳасини ишлаб чиқишда кенг жамоатчилик, сиёсий партиялар, жамоат ташкилотлари, илмий доиралар вакиллари, зиёлилар фаол иштирок этди ва Конституциямиз 65 фоизга янгиланмоқда.

Бундай ўзгаришлар орасида бизнинг соҳамизга оид бандлар ҳам борлиги, улар аҳолига тиббий хизмат кўрсатиш сифатини ошириш, ижтимоий таъминот миқдорини кўпайтириш кўзда тутилаётганлиги шифокор сифатида мени жуда қувонтиради. Янги ўзгаришлар фуқароларнинг турмуш даражасини яхшилаш, соғлиғини, меҳнат филиш салоҳиятини сақлаган ҳолда жамиятнинг ҳеч бир аъзосининг эътибордан четда қолмаслигини таъминлайди.

Конституциянинг 48-моддаси иккинчи қисмига “Ўзбекистон Республикаси фуқаролари тиббий ёрдамнинг  кафолатланган ҳажмини қонунда белгиланган тартибда давлат ҳисобидан олишга ҳақли”, деган норма киритилаётгани – ҳар бир фуқарога давлат ҳисобидан бепул тарзда, кафолатли, сифатли тиббий ёрдам олиш ҳуқуқини кафолатлайди. Ихтисослашган марказларда бепул даволанадиган касалликлар рўйхати шакллантирилиб, тиббий ёрдам учун йўлланма электрон навбат асосида берилаётганлиги, энг муҳими – маблағлар шифохонага эмас, балки аниқ беморга ажратилаётганлиги бу инсон омилига эътибор ва ғамхўрликнинг намунасидир.

Янгиланаётган Конституцияда 27 та янги модда  киритилиб, моддалар сони 128 тадан 155 тага ошмоқда, амалдаги 275 та нормаси 434 тага кўпаймоқда. Ва бу ўзгаришлар келгусида мамлакатимиз аҳолисининг эмин-эркин, обод ва фаровон ҳаётини, барча соҳаларнинг тараққиёт йўлини белгилаб бермоқда.

Ушбу муҳим ҳужжат Олий Мажлис Қонунчилик палатаси қарорига кўра “Ўзбекистон Республикасининг Конституцияси тўғрисида”ги Ўзбекистон Республикаси Конституциявий Қонун лойиҳаси референдумга қўйилмоқда.

Мен барча тиббиёт ходимларини, туманимиз фуқароларини 30 март куни ўтказиладиган умумхалқ референдиумида фаоллик билан иштирок этишга, ўзгаришларни якдиллик билан қўллаб-қувватлашга чақираман.

Жумабой ЯВҚАШЕВ, туман Тиббиёт бирлашмаси шифокори.