YoSh IJROChILAR OʻRTASIDA ShUKURULLA GULMANOV XOTIRASIGA BAGʻIShLAB “SANʼATIM – SAODATIMDIR” KOʻRIK-TANLOVI OʻTKAZILDI

Bolalar musiqa va sanʼat maktablarida tahsil olayotgan oʻquvchi-yoshlarning isteʼdodi va ijodiy qobiliyatini namoyon etishlari uchun koʻmaklashish, ularning ijrochilik koʻnikmalarini yanada rivojlantirish, oʻzbek xalqining boy sanʼati va qardosh xalqlar kuylaridan bahramand boʻlishlari uchun qulay shart-sharoitlarni yaratish, oʻzbek musiqa sanʼati madaniyatini yuksak darajaga koʻtarish, milliy sanʼatimizni dunyo sahnalariga olib chiqish hamda iqtidorli yoshlarni kashf etish va ijodini targʻib qilish maqsadida 9-sonli Bolalar musiqa va sanʼat maktabida Shukurulla Gulmonov xotirasiga bagʻishlab “Sanʼatim - saodatimdir” deb nomlangan koʻrik-tanlov boʻlib oʻtdi.

Unda 9- va 21-sonli bolalar musiqa va sanʼat maktablarining 16 yoshga toʻlmagan oʻquvchilari ishtirok etishib, oʻz qobiliyatlarini amalda namoyon etdilar.

Tanlov A, B, V guruhlarda, xalq cholgʻulari, anʼanaviy cholgʻular, anʼanaviy xonandalik va baxshichilik yoʻnalishlari boʻyicha oʻtkazildi.

Koʻrik-tanlovni 9-sonli bolalar musiqa va sanʼat maktabi direktori Yoʻldosh Abdalov ochdi va Shukurulla Gulmonovning hayoti va faoliyati haqida qisqacha toʻxtalib, koʻrik-tanlov ishtirokchilariga omad tiladi. Shundan soʻng, Shukurulla Gulmanovning farzandi Ibodulla Gulmonov otasi haqidagi xotiralari haqida soʻzlab berdi.

Gulmanov Shukurulla Gulmanovich 1948-yil 16-fevralda Amudaryo tumanining Mangʻit shahrida tugʻilgan. 1965-yilda hozirgi 16-sonli umumtaʼlim maktabini tugatgan. Oʻsha yili Nukus Davlat pedagogika institutining boshlangʻich taʼlim va musiqa fakultetiga oʻqishga qabul qilingan, ammo qashqar rubobi cholgʻusiga qiziqishi ustun kelib, 1968-yilda Xorazm viloyatidagi Matyusuf Xarratov nomidagi musiqa va sanʼat bilim yurtiga qashqar rubob mutaxassisligi boʻyicha sirtqi taʼlim yoʻnalishida oʻqishni davom ettirgan.

Ilk mehnat faoliyatini 1969-yilda Amudaryo tumanidagi Hamza nomli 7-yillik bolalar musiqa maktabida qashqar rubob sinfi oʻqituvchisi, keyinchalik oʻquv ishlari boʻyicha direktor oʻrinbosari lavozimlarida ishlab davom ettirgan.

Doimiy oʻqish va izlanishdan toʻxtamagan Sh.Gulmonov 1974-yilda Toshkent Davlat Madaniyat institutiga sirqi taʼlim yoʻnalishi boʻyicha oʻqishga kirib, 1979-yilda institutni muvaffaqiyatli tugatgan.

Haqiqiy sanʼat fidoyisi, koʻplab amudaryolik sanʼatkorlarning ustozi Shukrulla Gulmonov 1997-yilda Hamza nomidagi 7-yillik bolalar musiqa maktabi direktori lavozimiga tayinlanib, 2005-yilgacha faoliyat olib borgan. U ogʻir xastalik tufayli 2005-yil 22-avgustda vafot etgan.

Shukurulla Gulmanov oʻz mehnat faoliyati davomida yetuk pedagog hamda cholgʻu orkestri rahbari sifatida oʻquvchilari bilan har yili sanʼat yoʻnalishida oʻtkaziladigan koʻplab respublika koʻrik-tanlovlarida faxrli oʻrinlarni egallagan.

Oʻqituvchilik faoliyatidan tashqari, muvaffaqiyatli ijod qilib, bir necha kuylar bastalagan, sheʼrlar yozgan. U “Tanovar” kuyini oʻziga xos uslubda bastalab, shogirdlariga oʻrgatgan. Shukrulla Gulmanov qalamiga mansub “Ona yurt omon boʻlsin” qoʻshigʻi hozirgi kunda ham bolalar musiqa va sanʼat maktabi oʻquvchilari tomonidan ijro qilinib kelmoqda.

Bugungi kunda Gulmanovlarning 4 ta avlodga mansub sulola vakillaridan surnaychi Gulman Hasanovning farzandi boʻlgan Shukurulla Gulmanovning farzandlaridan Ibodulla, Xayrulla, Sayfulla Gulmanovlar, marhuma qizi Nargiza va ularning farzandlari Sanʼat, Gulnoza, Xursand, Begdulla, Javohir, Mubinalar hamda kelini Nigora Usmonovalar sanʼat sohasida oʻqib, faoliyat yuritishmoqda.

Xushovoz xonanda, taniqli sanʼatkor Anvar Xudoyberganov raisligidagi hakamlar hayʼati aʼzolari 13 ta yoʻnalish boʻyicha gʻoliblik uchun oʻz sanʼatlarini namoyish etgan, Shukurulla Gulmanovning izdoshlari tomonidan ijro etilgan kuylarning mazmun-mohiyati, koʻrik-tanlov ishtirokchilarining ijrochilik mahoratini sinchkovlik bilan kuzatib, har bir ijrochining musiqa sanʼati boʻyicha bilimini munosib baholab bordilar. Koʻrik-tanlovda cholgʻu turi boʻyicha chang, prima rubob, qashqar rubob, afgʻon rubob, dutor bas, gʻijjak, chang, ud, doira, tanbur yoʻnalishlari boʻyicha mahoratli ijrochilar tanlanib, gʻoliblar koʻrik-tanlov tashkilotchilari tomonidan faxriy yorliqlar, qimmatbaho sovgʻalar bilan taqdirlandilar.

Boʻlib oʻtgan koʻrik-tanlov Shukurulla Gulmanov xotirasiga va uning ijod yoʻliga hurmat-ehtirom koʻrsatishdan tashqari, yosh ijrochilar qalbida intellektual mulkka daxldorlik tuygʻusini uygʻotgani bilan muhim ahamiyat kasb etdi.

Robiya YOʻLDOShEVA.