Nuroniylar oʻrtasidagi koʻrik tanlovning tuman bosqichi yakunlandi

Jamiyatda keksa avlod vakillarining oʻrni va mavqei, ularning hayotiy tajribasi yosh avlod tarbiyasida qanchalik muhim ahamiyat kasb etishini inobatga olgan holda, soʻnggi yillarda mamlakatimizda faxriylar va nuroniylarning ijtimoiy faolligini oshirishga alohida eʼtibor qaratilmoqda. Keksa avlod vakillarining uzoq yillik mehnat va hayot tajribasi, ularning soʻzi va oʻgiti yoshlar ongiga taʼsir oʻtkazishning eng taʼsirchan vositalaridan biri sifatida eʼtirof etilmoqda. Bu yoʻnalishdagi ishlar mahalla darajasida izchil davom ettirilmoqda.

Oʻzbekiston Respublikasi Prezidentining 2022-yil 19-yanvardagi “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi hamda 2023-yil 11-martdagi “Keksa avlod vakillarini har tomonlama qoʻllab-quvvatlash hamda ularning ijtimoiy faolligini oshirishga doir qoʻshimcha chora-tadbirlar toʻgʻrisida”gi Qarorlari ijrosini taʼminlash borasidagi saʼy-harakatlar ana shu maqsadga xizmat qilmoqda.

Mazkur hujjatlar yoshlar bilan ishlashning yangicha boshqaruv mexanizmlarini joriy etish, ular bilan ishlashning vertikal tizimini yaratish, yoshlar muammolarining bevosita mahallalarda hal etilishi, shuningdek, taʼlim muassasalarida maʼnaviy-maʼrifiy va tarbiyaviy ishlarning samaradorligini yanada oshirish imkonini bermoqda. Ayni paytda ushbu hujjatlar keksa avlod vakillarini qoʻllab-quvvatlash, ularning bilim va tajribasidan jamiyat manfaati yoʻlida keng foydalanish uchun ham mustahkam huquqiy asos yaratib bermoqda.

“Bir nuroniy – oʻn yoshga masʼul” tamoyili asosida fuqarolar yigʻinlarida yurtimizning ijtimoiy-siyosiy hayotiga oʻzining faol hissasini qoʻshib kelayotgan, obroʻ-eʼtiborli, yuqori hayotiy tajribaga ega boʻlgan nuroniy va faxriylarga hududlar boʻylab 10 nafardan tarbiyasi ogʻir, maʼnaviy koʻmakka muhtoj, uyushmagan, ishsiz yoshlar biriktirib berilgan. Bunday yondashuv har bir yoshning muammosi bilan alohida shugʻullanish, uning oiladagi va mahalladadagi ahvolini yaqindan oʻrganish imkonini bermoqda.

Joriy yilning 21-avgust kuni Amudaryo tumanida mazkur tamoyil asosida oʻzlariga biriktirilgan yoshlarga yaqindan yordam berib kelayotgan nuroniylar oʻrtasida maxsus koʻrik tanlovning tuman bosqichi oʻtkazildi.

Tadbirda “Nuroniy” jamgʻarmasi Qoraqalpogʻiston Respublikasi boʻlimi raisining oʻrinbosari Gʻafur Kalmuratov ishtirok etib, Prezidentimiz tomonidan yoshlarga koʻrsatilayotgan eʼtibor, shuningdek, yoshlar tarbiyasiga masʼuliyat bilan yondashayotgan faol nuroniylar tomonidan hamkor tashkilotlar bilan birgalikda amalga oshirilayotgan bir qator ishlar xususida soʻz yuritdi.

Koʻrik tanlovning tuman bosqichida nuroniylar oʻrtasidagi uch shart boʻyicha bellashuvlar boʻlib oʻtdi. Ishtirokchilar hakamlar hayʼati eʼtiboriga oʻzlarining kundalik faoliyatini aks ettiruvchi fotoalbomlarini havola etdilar. Hakamlar hayʼati aʼzolari taqdim etilgan materiallar bilan batafsil tanishib, har bir ishtirokchining faoliyatiga xolis baho berdi.

Xususan, nuroniylar oʻzlariga biriktirilgan yoshlar bilan ishlash jarayonlari, ularni ish bilan taʼminlash, biror bir kasbni egallashi uchun kasbga oʻqitish, davlat subsidiya mablagʻlarini jalb qilish orqali bandligini taʼminlash hamda oilaviy ajrimlarning oldini olish borasida amalga oshirgan ishlari boʻyicha qatnashdilar. Koʻrinib turibdiki, bellashuv shartlari nuroniylar faoliyatining barcha yoʻnalishlarini — taʼlim, bandlik va oila mustahkamligi masalalarini qamrab olgan.

Qayd etish joizki, tanlov davomida taqdim etilgan materiallar keksa avlod vakillarining yoshlar bilan yakkama-yakka suhbatlari, ularning muammolarini oʻrganish va yechim topish yoʻlidagi kundalik mehnati natijalarini yaqqol koʻrsatib berdi. Ayni shu mehnat samarasi oʻlaroq koʻplab yoshlar hayotda oʻz oʻrnini topib, kasb-hunar egallash va mehnat faoliyatini boshlash imkoniga ega boʻlmoqda.

Yakuniy natijalarga koʻra, Durunki mahallasining faol nuroniysi Amangul Qayupova 1-oʻrinni, Beruniy mahallasi faol nuroniysi Shukurjon Xoʻjamuratova 2-oʻrinni, Qoramon mahallasi faol nuroniysi Habiba Mamurova esa 3-oʻrinni egalladi.

Gʻoliblarning barchasi “Nuroniy” jamgʻarmasining Qoraqalpogʻiston Respublikasi boʻlimi tomonidan pul mukofotlari hamda diplom bilan taqdirlandi. Koʻrik tanlovda faol ishtiroki bilan ajralib turgan boshqa nuroniylarga “Nuroniy” jamgʻarmasi Amudaryo tumani boʻlimi tomonidan esdalik sovgʻalari topshirildi.

Bunday bellashuvlar nuroniylarning sermazmun faoliyatiga munosib baho berish bilan birga, mahallalarda yoshlar bilan ishlashning ilgʻor usullarini ommalashtirishga ham xizmat qiladi. Tanlovda namoyon boʻlgan ish uslublari boshqa mahallalar nuroniylari uchun ham oʻziga xos namuna vazifasini oʻtaydi. Tajriba almashish imkonini beradigan ana shunday tanlovlar tufayli maʼnaviy koʻmakka muhtoj yoshlar bilan ishlash tizimi yanada mustahkamlanib, keksa avlod bilan yoshlar oʻrtasidagi maʼnaviy koʻprik tobora mustahkam boʻlib boraveradi.