ЁШ ИЖРОЧИЛАР ЎРТАСИДА ШУКУРУЛЛА ГУЛМАНОВ ХОТИРАСИГА БАҒИШЛАБ “САНЪАТИМ – САОДАТИМДИР” КЎРИК-ТАНЛОВИ ЎТКАЗИЛДИ

Болалар мусиқа ва санъат мактабларида таҳсил олаётган ўқувчи-ёшларнинг истеъдоди ва ижодий қобилиятини намоён этишлари учун кўмаклашиш, уларнинг ижрочилик кўникмаларини янада ривожлантириш, ўзбек халқининг бой санъати ва қардош халқлар куйларидан баҳраманд бўлишлари учун қулай шарт-шароитларни яратиш, ўзбек мусиқа санъати маданиятини юксак даражага кўтариш, миллий санъатимизни дунё саҳналарига олиб чиқиш ҳамда иқтидорли ёшларни кашф этиш ва ижодини тарғиб қилиш мақсадида 9-сонли Болалар мусиқа ва санъат мактабида Шукурулла Гулмонов хотирасига бағишлаб “Санъатим - саодатимдир” деб номланган кўрик-танлов бўлиб ўтди.

Унда 9- ва 21-сонли болалар мусиқа ва санъат мактабларининг 16 ёшга тўлмаган ўқувчилари иштирок этишиб, ўз қобилиятларини амалда намоён этдилар.

Танлов А, Б, В гуруҳларда, халқ чолғулари, анъанавий чолғулар, анъанавий хонандалик ва бахшичилик йўналишлари бўйича ўтказилди.

Кўрик-танловни 9-сонли болалар мусиқа ва санъат мактаби директори Йўлдош Абдалов очди ва Шукурулла Гулмоновнинг ҳаёти ва фаолияти ҳақида қисқача тўхталиб, кўрик-танлов иштирокчиларига омад тилади. Шундан сўнг, Шукурулла Гулмановнинг фарзанди Ибодулла Гулмонов отаси ҳақидаги хотиралари ҳақида сўзлаб берди.

Гулманов Шукурулла Гулманович 1948 йил 16 февралда Амударё туманининг Манғит шаҳрида туғилган. 1965 йилда ҳозирги 16-сонли умумтаълим мактабини тугатган. Ўша йили Нукус Давлат педагогика институтининг бошланғич таълим ва мусиқа факультетига ўқишга қабул қилинган, аммо қашқар рубоби чолғусига қизиқиши устун келиб, 1968 йилда Хоразм вилоятидаги Матюсуф Харратов номидаги мусиқа ва санъат билим юртига қашқар рубоб мутахассислиги бўйича сиртқи таълим йўналишида ўқишни давом эттирган.

Илк меҳнат фаолиятини 1969 йилда Амударё туманидаги Ҳамза номли 7 йиллик болалар мусиқа мактабида қашқар рубоб синфи ўқитувчиси, кейинчалик ўқув ишлари бўйича директор ўринбосари лавозимларида ишлаб давом эттирган.

Доимий ўқиш ва изланишдан тўхтамаган Ш.Гулмонов 1974 йилда Тошкент Давлат Маданият институтига сирқи таълим йўналиши бўйича ўқишга кириб, 1979 йилда институтни муваффақиятли тугатган.

Ҳақиқий санъат фидойиси, кўплаб амударёлик санъаткорларнинг устози Шукрулла Гулмонов 1997 йилда Ҳамза номидаги 7 йиллик болалар мусиқа мактаби директори лавозимига тайинланиб, 2005 йилгача фаолият олиб борган. У оғир хасталик туфайли 2005 йил 22 августда вафот этган.

Шукурулла Гулманов ўз меҳнат фаолияти давомида етук педагог ҳамда чолғу оркестри раҳбари сифатида ўқувчилари билан ҳар йили санъат йўналишида ўтказиладиган кўплаб республика кўрик-танловларида фахрли ўринларни эгаллаган.

Ўқитувчилик фаолиятидан ташқари, муваффақиятли ижод қилиб, бир неча куйлар басталаган, шеърлар ёзган. У “Тановар” куйини ўзига хос услубда басталаб, шогирдларига ўргатган. Шукрулла Гулманов қаламига мансуб “Она юрт омон бўлсин” қўшиғи ҳозирги кунда ҳам болалар мусиқа ва санъат мактаби ўқувчилари томонидан ижро қилиниб келмоқда.

Бугунги кунда Гулмановларнинг 4 та авлодга мансуб сулола вакилларидан сурнайчи Гулман Ҳасановнинг фарзанди бўлган Шукурулла Гулмановнинг фарзандларидан Ибодулла, Хайрулла, Сайфулла Гулмановлар, марҳума қизи Наргиза ва уларнинг фарзандлари Санъат, Гулноза, Хурсанд, Бегдулла, Жавоҳир, Мубиналар ҳамда келини Нигора Усмоновалар санъат соҳасида ўқиб, фаолият юритишмоқда.

Хушовоз хонанда, таниқли санъаткор Анвар Худойберганов раислигидаги ҳакамлар ҳайъати аъзолари 13 та йўналиш бўйича ғолиблик учун ўз санъатларини намойиш этган, Шукурулла Гулмановнинг издошлари томонидан ижро этилган куйларнинг мазмун-моҳияти, кўрик-танлов иштирокчиларининг ижрочилик маҳоратини синчковлик билан кузатиб, ҳар бир ижрочининг мусиқа санъати бўйича билимини муносиб баҳолаб бордилар. Кўрик-танловда чолғу тури бўйича чанг, прима рубоб, қашқар рубоб, афғон рубоб, дутор бас, ғижжак, чанг, уд, доира, танбур йўналишлари бўйича маҳоратли ижрочилар танланиб, ғолиблар кўрик-танлов ташкилотчилари томонидан фахрий ёрлиқлар, қимматбаҳо совғалар билан тақдирландилар.

Бўлиб ўтган кўрик-танлов Шукурулла Гулманов хотирасига ва унинг ижод йўлига ҳурмат-эҳтиром кўрсатишдан ташқари, ёш ижрочилар қалбида интеллектуал мулкка дахлдорлик туйғусини уйғотгани билан муҳим аҳамият касб этди.

Робия ЙЎЛДОШЕВА.