DOʻRMANLIK IJODKOR MUHAYYo

Ijod – bu oʻziga chorlovchi va maftun qiluvchi oʻzgacha olam. Ijodkor esa shu oʻzgacha olamning sehrli sarhadlarini kezib, zavqqa toʻladi. Toʻlib-toshgan hislarini goʻzal tashbehlar, chiroyli ranglar bilan bezab, boshqalarga koʻrsatishga oshiqadi. Dunyoni, hayotni oʻzi koʻrib turgandek shaklu-shamoyilda tasvirlab, buni hammaga anglatgisi keladi.

Oʻziga xos isteʼdod sohibasi boʻlgan amudaryolik Muhayyo Oʻrinboyeva ham keng va rang-barang mavzulardagi sheʼrlari bilan bugun nafaqat Doʻrman elida, balki tumanda ham taniqli desak, aslo muoblagʻa boʻlmaydi. Uning qalamiga mansub boʻlgan Vatan, xalq, jonajon qishlogʻi, zamondoshlari haqidagi sheʼrlari allaqachon oʻz muxlislarini topgan. Ayniqsa, eliga boʻlgan samimiy muhabbatini, faxru-iftixorini, shukronasini ifoda etgan “Mehmon boʻling, Doʻrmanga” degan sheʼri doʻrmanliklarning qalbidan joy olgan.

Muhayyo 1980-yilda oʻqituvchi oilasida tavallud topdi. Ota-onasi ona tili va adabiyot fani oʻqituvchilari boʻlgani boisdanmi, sheʼriyatga havas unda oʻquvchilik davridan boshlangan edi. Erkaboy aka va Momogul opalar qizidagi bu havasni ertaroq payqab, koʻproq badiiy kitoblar oʻqishga qiziqtirar, oʻzlari olib kelib berar, Muhayyoni ruhlantirardi. Tabiatning goʻzalligi, odamlar oʻrtasidagi mehr-oqibat, yurtga muhabbat mavzularida havas bilan ijod qila boshlagan qizaloq yozgan sheʼrlarning birinchi tinglovchisi ham onasi Momogul opa boʻlardi. Ilhom qanotlarida parvoz qila boshlagan ijod olamining yosh havaskori oʻz sheʼrlarini onasiga oʻqib berib, juda zavqlanar, yanada koʻproq yozishga ragʻbat olardi.

Ijod muhitida ulgʻaygan Muhayyoning, dastlabki yillarda oliy taʼlim muassasasi talabasi boʻlish orzusi ushalmadi. Oʻsha davrdagi oilaviy sharoit sababli uning oʻqishni davom ettirishiga imkon boʻlmadi. Avvalroq oliy taʼlim muassasalari talabalari boʻlgan aka-opalarini oʻqitish tashvishida boʻlgan ota-onasi ham uni payti kelsa oliygohlarda oʻqitishni juda-juda istashar edi. Bu orada katta farzandlar oilali boʻlishdi. Odobli, chaqqon va roʻzgʻor ishlariga ham uquvli boʻlgan Muhayyoni ham ovulda kelin qilishga havasmandlar koʻpayib, xonadon eshigini tindirishmadi va yaxshi bir oiladan kelgan sovchilarga ota-onasining roziligi bilan turmushga chiqdi.

Uning baxtiga turmush oʻrtogʻi, qaynona-qaynotasi ham dunyoqarashi keng, maʼnaviyatli insonlar boʻlib chiqdi. Izma-iz dunyoga kelgan qizlari Muhabbat va Dilnuralarni ulgʻaytirishganidan soʻng, 2011-yilda uning ovuldagi 70-sonli maktabda toʻgarak rahbari boʻlib ishlashiga sharoit yaratishdi. Oʻz ishiga masʼuliyatli va oʻquvchilar bilan oson til topisha oladigan Muhayyoni maktab psixologi vazifasiga tayinlashdi. Oʻquvchilar bilan ishlash uni dastlabki kunlardanoq, ruhlantirish bilan birga ilhomlantirib ham boshlagan edi. Bu yana ijodga qaytishiga turtki boʻlib, turli mavzularda yangi sheʼrlar yozdi, katta daftarlarni toʻldirdi.

U oʻzi yozgan sheʼrlarini tajribali ustozlarga koʻrsatib, yoʻl-yoʻriq oʻrganish maqsadida tuman gazetasi tahririyatiga olib kelishga jazm qildi. Tahririyatda uni ustoz jurnalist Saʼdulla Xoʻjaniyazov qarshi oldi va ijod namunalari bilan tanishib, kerakli tavsiyalar berdi. Maʼqul kelgan qoralamalarni gazeta sahifalarida chop etish uchun olib qoldi. Ustozdan yoʻl-yoʻriqlar oʻrganib, koʻngli toʻlib chiqqan Muhayyo oʻz sheʼrlarini gazeta sahifalarida koʻrganidan soʻng, yanada ilhomlandi. Keyinchalik qalbidagi nozik his-tuygʻulari ifoda etilgan sheʼriy mashqlari, hikoyalari tuman gazetasida koʻplab chop etildi. Bundan ruhlangan yosh shoira “Mehmon boʻling, Doʻrmanimga” deb nomlangan sheʼriy toʻplamini nashrdan chiqarishga muvaffaq boʻldi. U endi tumandagi yosh ijodkorlarni qoʻllab-quvvatlovchi “Jayxun ilxomlari” nodavlat-notijorat tashkilotining faol aʼzosiga aylandi. Tashkilot aʼzolari boʻlgan turli yoshdagi ijodkorlar bilan tez-tez uchrashar, mushoiralarda qatnashar va bundan juda katta zavq olardi. Tashkilot qoshida tashkil etilgan kutubxonaga ham tashrif buyurib, turli mavzulardagi adabiyotlar, kitoblarni mutolaa qilishni odatga aylantirdi.

Muhayyoning hayotida 2020-yilda yana bir quvonchli voqea roʻy berdi. U Nukus shahridagi Pedagogika institutining pedagogika-psixologiya yoʻnalishiga oʻqishga kirib, eng azaliy orzusi boʻlgan talabalik baxtiga erishdi. Maktabdagi faoliyatini esa amaliyotchi-psixolog lavozimida davom ettira boshladi. Hozirgi kunda maktabda yosh avlodning maʼnaviyatli, komil insonlar boʻlib voyaga yetishlariga munosib hissa qoʻshish eng asosiy maqsadiga aylangan. Shu bois taʼlim maskanida oʻqituvchilar bilan bamaslahat, hamkorlikda ish olib borib, oʻquvchilarni kasbga yoʻnaltirish, iqtidorlarini yuzaga chiqarishlariga koʻmaklashish borasidagi tadbirlarni hamkorlikda tashkil etib kelmoqda.

 Muhayyo fayzli oilaning bekasi, umr yoʻldoshi bilan 4 nafar farzandni voyaga yetkazishmoqda. Hamon ijod qilishdan charchamayotgan shoiraning yangidan “Aytilmagan ertaklar” deb nomlangan toʻplami nashrga tayyorlanmoqda. Ushbu toʻplamda ijodkorning rang-barang mavzulardagi sheʼrlari bilan birga, hayotiy hikoyalar ham joy olgan.

Ijod maydonida parvoz qilish bilan birga sevimli kasbi orqali jamiyatga naf keltirayotgan Muhayyo Oʻrinboyevaga ijodiy barkamollik, muvaffaqiyat tilaymiz.

Ozoda Xudoyberganova.