ZULFIYaXONIM TAVALLUDINING 108-YILLIGIGA BAGʻIShLANGAN KEChA OʻTKAZILDI
Bahorning ilk kunida yurtimiz boʻylab shoira Zulfiyaxonim tavalludi nishonlanadi. Oʻz ijodi va mashaqqatli hayot yoʻli, oqila hamda olijanobligi bilan oʻzbek ayollarining yorqin timsoliga aylangan Zulfiya Isroilova tavalludining 108-yilligi munosabati bilan 36-sonli maktabda ham maʼnaviy-maʼrifiy kecha oʻtkazildi.
Maktabning ijodiy-madaniy masalalar boʻyicha targʻibotchisi O.Xudoyberganova hamda ona tili va adabiyot fani oʻqituvchisi U.Jumaniyozovalar tomonidan oʻtkazilgan ushbu tadbirda 9-sinf oʻquvchilari, “Yosh jurnalistlar” toʻgaragi aʼzolari ishtirok etishdi.
Suhbat tarzida oʻtkazilgan tadbir davomida shoira Zulfiyaxonimning benazir sheʼriyati haqida soʻz yuritildi. Shoiraning betakror isteʼdodi, Vatanga muhabbat, vafo va sadoqat tuygʻusini, olijanob insoniy fazilatlarni yuksak pardalarda tarannum qilgan yetuk badiiy asarlari, ibratli hayoti hamda ijtimoiy faoliyati bilan milliy adabiyotimiz va madaniyatimiz rivojiga, xalqimiz maʼnaviyatini yuksaltirishga qoʻshgan ulkan hissasi eʼtirof etildi. Oʻquvchi-qizlar shoira Zulfiya ijodidan parchalar oʻqib berdilar. Shundan soʻng, shoira hayoti va ijodiga bagʻishlab esse yozdilar.
Oʻquvchilar oʻz ijod namunalarida ulugʻ isteʼdod sohibi boʻlgan shoira oʻz eliga sidqidildan xizmat qilish barobarida salmoqli asarlari bilan oʻzbek adabiyotida yorqin iz qoldirgani, bir umr oʻz yoriga sadoqat bilan yashab, "Hijron kunlarida", "Oʻrik gullaganda", "Koʻrganmiding koʻzlarimda yosh?", "Sensiz", "Izlayman" kabi sheʼrlarida Hamid Olimjonga boʻlgan cheksiz mehr-u sadoqatini, sof sevgisini ifoda etganligini tasvirlab, shoiraga boʻlgan ehtiromini bayon etdilar.
Yoshlarda oʻz ajdodlaridan faxrlanish tuygʻularini va ularga munosib voris boʻlishga intilishni kuchaytirish, vatanparvarlik ruhida tarbiyalash maqsadida oʻtkazilgan tadbir barchaga manzur boʻldi.
Javlon Oʻrozaliyev, “Yosh jurnalistlar” toʻgaragi aʼzosi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
