BUYuK AJDODLARIMIZ TAVALLUDIGA BAGʻIShLAB “IKKI BUYuK SIYMO” DEB NOMLANGAN ADABIY KEChA OʻTKAZILDI

Yurtimiz boʻylab Nizomiddin Mir Alisher Navoiyning tavallud topgan kuniga 582-yil, Zahiriddin Muhammad Bobur tavalludiga 540-yil toʻlishi munosabati bilan turli tadbirlar oʻtkazildi. Shu munosabat bilan Amudaryo tumanidagi 14-sonli maktabda ham “Ikki buyuk siymo” deb nomlangan tadbir tashkil etildi.

14-fevral kuni maktab zalida boʻlib oʻtgan mazkur tadbir munosabati bilan sahna bayramona bezatildi. Buyuk mutafakkir Mir Alisher Navoiy va Zahiriddin Muhammad Boburning suratlari, shoirning ruboiy va hikmatli soʻzlari, hadislaridan namunalar yozilgan plakatlar osib qoʻyildi. Rang-barang gullar, sharlar sahnaga yanada fayz kiritdi.

Maktabning ona tili va adabiyot fani oʻqituvchilari Sadoqat Davletova, Dilnora Saparboyeva, tarix fani oʻqituvchisi Mahbuba Qoʻchqorovalar tomonidan tashkil etilgan ushbu tadbirni maktab direktorining maʼnaviy-maʼrifiy ishlar boʻyicha oʻrinbosari Jasur Sidabullayev ochib berdi.

Taʼkidlash joizki, 14-sonli maktabda oʻzbek, qoraqalpoq va qozoq millatiga mansub oʻqituvchi va oʻquvchilar ahil-inoqlikda faoliyat olib borishadi. Shu oʻrinda oʻquvchilari fan olimpiadalarida faol ishtirok etib, faxrli oʻrinlarni qoʻlga kiritib kelayotgan jonkuyar ustozlardan Mayra Umirbayeva hamda Rafael Sultonovlarni alohida eʼtirof etish joiz. Maktabning 11-sinf oʻquvchisi Sadoqat Bozorboyeva, 9-sinf oʻquvchisi Shahnoza Jiyanovalar “Oʻzbek tilim iftixorim” mavzusidagi insholar tanlovida faxrli 1-oʻrinni egalladilar.

Tadbirda sahnaga chiqqan boshlovchilar ulugʻ bobokalonlar hayoti va ijodi haqida batafsil maʼlumotlar berishdi. Alisher Navoiyning goʻdaklik chogʻida oʻtkazilgan ism qoʻyish marosimi maktabning 11-sinf oʻquvchilari tomonidan kichik sahna koʻrinishi orqali namoyish etildi. Sahnada oʻquvchilar saroy beklaridan Gʻiyosiddin Bahodir, mavlono Lutfiy, Jomiy, Dehlaviy va Ganjaviylar obrazlarini mahorat bilan ijro etib, tomoshabinlar koʻz oʻngida ulugʻ ajdodlarimiz siymolarini gavdalantirishga harakat qildilar.

Shundan soʻng, 8-sinf oʻquvchilari Alisher Navoiy hamda Zahiriddin Muhammad Boburning hayoti davomida amalga oshirgan ezgu ishlari, yaratgan bebaho asarlari haqida maʼlumotlar berishdi. Ulugʻ ajdodlarimiz ruboyilaridan namunalarni 9-sinf oʻquvchilari ifodali yod aytib berishdi. Tadbir davomida maktabning 6-sinf oʻquvchilari ijrosidagi oʻzbek milliy raqslari ham namoyish etildi.

Tadbir davomida yurtimizning bir qator ilm maskanlari, diqqatga sazovor joylari bobokalonlarimiz nomi bilan atalayotgani, Alisher Navoiy nomidagi Oʻzbekiston Davlat Adabiyot muzeyi, Alisher Navoiy nomli Respublika Milliy kutubxonasi, shoir nomi bilan ataluvchi Respublika Milliy bogʻi, Alisher Navoiy nomli Samarqand Davlat universiteti, Alisher Navoiy nomli Davlat akademik opera va balet teatri, Alisher Navoiy nomidagi metro bekati borligi, iqtidorli talabalar uchun Navoiy nomidagi davlat stipendiyasi taʼsis etilgani ham faxru-iftixor bilan tilga olib oʻtildi.

Buyuk allomalarga boʻlgan ehtiromning bir koʻrinishi sifatida tashkil etilgan adabiy kechada maktabning “Yosh tilshunos” va “Yosh tarixchi” toʻgaragi aʼzolari ham faol ishtirok etishdi.

Dilfuza Gaipova, 14-sonli maktabning ona tili va adabiyoti fani oʻqituvchisi.