БУЮК АЖДОДЛАРИМИЗ ТАВАЛЛУДИГА БАҒИШЛАБ “ИККИ БУЮК СИЙМО” ДЕБ НОМЛАНГАН АДАБИЙ КЕЧА ЎТКАЗИЛДИ
Юртимиз бўйлаб Низомиддин Мир Алишер Навоийнинг таваллуд топган кунига 582 йил, Заҳириддин Муҳаммад Бобур таваллудига 540 йил тўлиши муносабати билан турли тадбирлар ўтказилди. Шу муносабат билан Амударё туманидаги 14-сонли мактабда ҳам “Икки буюк сиймо” деб номланган тадбир ташкил этилди.
14 февраль куни мактаб залида бўлиб ўтган мазкур тадбир муносабати билан саҳна байрамона безатилди. Буюк мутафаккир Мир Алишер Навоий ва Заҳириддин Муҳаммад Бобурнинг суратлари, шоирнинг рубоий ва ҳикматли сўзлари, ҳадисларидан намуналар ёзилган плакатлар осиб қўйилди. Ранг-баранг гуллар, шарлар саҳнага янада файз киритди.
Мактабнинг она тили ва адабиёт фани ўқитувчилари Садоқат Давлетова, Дилнора Сапарбоева, тарих фани ўқитувчиси Маҳбуба Қўчқоровалар томонидан ташкил этилган ушбу тадбирни мактаб директорининг маънавий-маърифий ишлар бўйича ўринбосари Жасур Сидабуллаев очиб берди.
Таъкидлаш жоизки, 14-сонли мактабда ўзбек, қорақалпоқ ва қозоқ миллатига мансуб ўқитувчи ва ўқувчилар аҳил-иноқликда фаолият олиб боришади. Шу ўринда ўқувчилари фан олимпиадаларида фаол иштирок этиб, фахрли ўринларни қўлга киритиб келаётган жонкуяр устозлардан Майра Умирбаева ҳамда Рафаэль Султоновларни алоҳида эътироф этиш жоиз. Мактабнинг 11-синф ўқувчиси Садоқат Бозорбоева, 9-синф ўқувчиси Шаҳноза Жияновалар “Ўзбек тилим ифтихорим” мавзусидаги иншолар танловида фахрли 1-ўринни эгалладилар.
Тадбирда саҳнага чиққан бошловчилар улуғ бобокалонлар ҳаёти ва ижоди ҳақида батафсил маълумотлар беришди. Алишер Навоийнинг гўдаклик чоғида ўтказилган исм қўйиш маросими мактабнинг 11-синф ўқувчилари томонидан кичик саҳна кўриниши орқали намойиш этилди. Саҳнада ўқувчилар сарой бекларидан Ғиёсиддин Баҳодир, мавлоно Лутфий, Жомий, Деҳлавий ва Ганжавийлар образларини маҳорат билан ижро этиб, томошабинлар кўз ўнгида улуғ аждодларимиз сиймоларини гавдалантиришга ҳаракат қилдилар.
Шундан сўнг, 8-синф ўқувчилари Алишер Навоий ҳамда Заҳириддин Муҳаммад Бобурнинг ҳаёти давомида амалга оширган эзгу ишлари, яратган бебаҳо асарлари ҳақида маълумотлар беришди. Улуғ аждодларимиз рубойиларидан намуналарни 9-синф ўқувчилари ифодали ёд айтиб беришди. Тадбир давомида мактабнинг 6-синф ўқувчилари ижросидаги ўзбек миллий рақслари ҳам намойиш этилди.
Тадбир давомида юртимизнинг бир қатор илм масканлари, диққатга сазовор жойлари бобокалонларимиз номи билан аталаётгани, Алишер Навоий номидаги Ўзбекистон Давлат Адабиёт музейи, Алишер Навоий номли Республика Миллий кутубхонаси, шоир номи билан аталувчи Республика Миллий боғи, Алишер Навоий номли Самарқанд Давлат университети, Алишер Навоий номли Давлат академик опера ва балет театри, Алишер Навоий номидаги метро бекати борлиги, иқтидорли талабалар учун Навоий номидаги давлат стипендияси таъсис этилгани ҳам фахру-ифтихор билан тилга олиб ўтилди.
Буюк алломаларга бўлган эҳтиромнинг бир кўриниши сифатида ташкил этилган адабий кечада мактабнинг “Ёш тилшунос” ва “Ёш тарихчи” тўгараги аъзолари ҳам фаол иштирок этишди.
Дилфуза Гаипова, 14-сонли мактабнинг она тили ва адабиёти фани ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
