BUYuK SIYMOGA YuKSAK EHTIROM KOʻRSATILDI

Ulugʻ shoir va mutafakkir, atoqli davlat va jamoat arbobi, bobokalonimiz Alisher Navoiyning bebaho ijodiy-ilmiy merosi nafaqat xalqimiz, balki jahon adabiyoti tarixida, milliy madaniyatimiz va tafakkurimiz rivojida alohida oʻrin tutadi. Oʻzidan boy maʼnaviy meros qoldirgan ushbu buyuk siymo tavalludi munosabati bilan yurtimizning barcha hududlarida turli tadbirlar oʻtkazilib, xotirasiga ehtirom koʻrsatiladi.

7-fevral kuni Alisher Navoiy tavalludining 582 yilligi munosabati bilan 36-sonli maktabda ham “Navoiy yodi-la yashaymiz mudom!” deb nomlangan katta adabiy-musiqiy tadbir oʻtkazildi. Tadbirga mos ravishda sahna mahorat bilan bezatildi, ulugʻ bobokalonimizning katta surati devorga osib qoʻyildi, slayd orqali uning hayoti va ijodiga oid maʼlumotlar bilan tanishtirib turildi. Undan tashqari, hazrat Navoiy asarlari, toʻplamlari, doston va gʻazallaridan iborat kitoblar koʻrgazmasi ham tashkil etildi.

Maktabning “Yosh jurnalistlar” toʻgaragi aʼzolari va 1-9-sinf oʻquvchilari ishtirokida boʻlib oʻtgan tadbirni maʼnaviy-maʼrifiy ishlar boʻyicha direktor oʻrinbosari Bahrom Xoʻjamurodov ochib berdi va Alisher Navoiy asarlarining oʻzbek adabiyotida tutgan oʻrni, qadr-qimmati haqida soʻzladi. Shuningdek, tadbirni tashkil qilishda jonbozlik koʻrsatgan maktabning ona tili va adabiyot fani oʻqituvchilari Umida Jumaniyozova, Eʼtibor Bobojonova, Nargiza Oʻtalova, Dilnoza Qurboniyozova, Gulnora Sobirova, Nasiba Karimovalar hamda maktabning ijodiy-madaniy masalalar boʻyicha targʻibotchisi Ozoda Xudoyberganovalarning yosh avlod taʼlim-tarbiyasi yoʻlidagi ishlarida muvaffaqiyat tiladi.

Shundan soʻng, sahnaga chiqqan maktabning 1-“A”sinf oʻquvchilari sinf rahbari Nasiba Bobojonova boshchiligida ulugʻ bobokalon hayoti va ijodi haqida maʼlumotlar berib, mashhur ruboiylarini ifodali yod aytishdi. Boshlangʻich sinf oʻqituvchisi Saragul Yusupova rahbarlik qilayotgan 1-“B”sinf oʻquvchilari ham Alisher Navoiyning ruboiylari, gʻazallarini yoddan aytib, shoh va shoir Bobur hayoti haqidagi “Qovun isi” deb nomlangan sahna koʻrinishini ijro etib berishdi. Oʻqituvchi Iqbol Rajabova rahbarligidagi 1-“V”sinf oʻquvchilari esa dilrabo raqs namoyish etib, tomoshabinlarga zavq bagʻishlashdi.

Tadbir davomida maktabning 7-, 9-sinf oʻquvchilari ijrosidagi buxorocha, xorazmcha raqslar tomoshabinlar eʼtiboriga havola qilindi. “Yosh jurnalistlar” toʻgaragi aʼzolari, 9-“A”sinf oʻquvchilari esa hazrat Navoiy hayotidan parchalarni sahna koʻrinishida namoyish etishdi. Oʻquvchilar Navoiy va Husayn Boyqaro, saroy mulozimlari rollarini mahorat bilan ijro qilib, oʻz iqtidorlarini, buyuk ajdodimizga boʻlgan yuksak ehtiromini koʻrsatishdi va tomoshabinlarning olqishlariga sazovor boʻlishdi. Adabiyot ixlosmandlari tomonidan ulugʻ bobokalonimizning gʻazallari, ruboiylari va dostonlaridan parchalarning ifodali aytib berilgani ham barchani xushnud etdi.

“Navoiy yodi-la yashaymiz mudom!” mavzusidagi tadbir yakunida barcha ishtirokchilarga maktab maʼmuriyati tomonidan faxriy yorliqlar topshirildi.

Javlon Oʻrozalayev, 36-sonli maktabning 9-sinf oʻquvchisi, “Yosh jurnalistlar” toʻgaragi aʼzosi.