БУЮК СИЙМОГА ЮКСАК ЭҲТИРОМ КЎРСАТИЛДИ

Улуғ шоир ва мутафаккир, атоқли давлат ва жамоат арбоби, бобокалонимиз Алишер Навоийнинг бебаҳо ижодий-илмий мероси нафақат халқимиз, балки жаҳон адабиёти тарихида, миллий маданиятимиз ва тафаккуримиз ривожида алоҳида ўрин тутади. Ўзидан бой маънавий мерос қолдирган ушбу буюк сиймо таваллуди муносабати билан юртимизнинг барча ҳудудларида турли тадбирлар ўтказилиб, хотирасига эҳтиром кўрсатилади.

7 февраль куни Алишер Навоий таваллудининг 582 йиллиги муносабати билан 36-сонли мактабда ҳам “Навоий ёди-ла яшаймиз мудом!” деб номланган катта адабий-мусиқий тадбир ўтказилди. Тадбирга мос равишда саҳна маҳорат билан безатилди, улуғ бобокалонимизнинг катта сурати деворга осиб қўйилди, слайд орқали унинг ҳаёти ва ижодига оид маълумотлар билан таништириб турилди. Ундан ташқари, ҳазрат Навоий асарлари, тўпламлари, достон ва ғазалларидан иборат китоблар кўргазмаси ҳам ташкил этилди.

Мактабнинг “Ёш журналистлар” тўгараги аъзолари ва 1-9-синф ўқувчилари иштирокида бўлиб ўтган тадбирни маънавий-маърифий ишлар бўйича директор ўринбосари Баҳром Хўжамуродов очиб берди ва Алишер Навоий асарларининг ўзбек адабиётида тутган ўрни, қадр-қиммати ҳақида сўзлади. Шунингдек, тадбирни ташкил қилишда жонбозлик кўрсатган мактабнинг она тили ва адабиёт фани ўқитувчилари Умида Жуманиёзова, Эътибор Бобожонова, Наргиза Ўталова, Дилноза Қурбониёзова, Гулнора Собирова, Насиба Каримовалар ҳамда мактабнинг ижодий-маданий масалалар бўйича тарғиботчиси Озода Худойбергановаларнинг ёш авлод таълим-тарбияси йўлидаги ишларида муваффақият тилади.

Шундан сўнг, саҳнага чиққан мактабнинг 1-“А”синф ўқувчилари синф раҳбари Насиба Бобожонова бошчилигида улуғ бобокалон ҳаёти ва ижоди ҳақида маълумотлар бериб, машҳур рубоийларини ифодали ёд айтишди. Бошланғич синф ўқитувчиси Сарагул Юсупова раҳбарлик қилаётган 1-“Б”синф ўқувчилари ҳам Алишер Навоийнинг рубоийлари, ғазалларини ёддан айтиб, шоҳ ва шоир Бобур ҳаёти ҳақидаги “Қовун иси” деб номланган саҳна кўринишини ижро этиб беришди. Ўқитувчи Иқбол Ражабова раҳбарлигидаги 1-“В”синф ўқувчилари эса дилрабо рақс намойиш этиб, томошабинларга завқ бағишлашди.

Тадбир давомида мактабнинг 7-, 9-синф ўқувчилари ижросидаги бухороча, хоразмча рақслар томошабинлар эътиборига ҳавола қилинди. “Ёш журналистлар” тўгараги аъзолари, 9-“А”синф ўқувчилари эса ҳазрат Навоий ҳаётидан парчаларни саҳна кўринишида намойиш этишди. Ўқувчилар Навоий ва Ҳусайн Бойқаро, сарой мулозимлари ролларини маҳорат билан ижро қилиб, ўз иқтидорларини, буюк аждодимизга бўлган юксак эҳтиромини кўрсатишди ва томошабинларнинг олқишларига сазовор бўлишди. Адабиёт ихлосмандлари томонидан улуғ бобокалонимизнинг ғазаллари, рубоийлари ва достонларидан парчаларнинг ифодали айтиб берилгани ҳам барчани хушнуд этди.

“Навоий ёди-ла яшаймиз мудом!” мавзусидаги тадбир якунида барча иштирокчиларга мактаб маъмурияти томонидан фахрий ёрлиқлар топширилди.

Жавлон Ўрозалаев, 36-сонли мактабнинг 9-синф ўқувчиси, “Ёш журналистлар” тўгараги аъзоси.