KIYIM – INSON ZIYNATI
Kiyim – inson ziynati. U kishi maʼnaviyati, madaniyati, didi va dunyoqarashining yorqin koʻzgusidir. U insonni issiq-sovuqdan saqlaydi va kishiga ziynat boʻlib xizmat qiladi.
Oʻzbek xalqi oʻzining asrlar osha qadrlanib kelayotgan milliy liboslari bilan ham butun dunyoga dovruq taratgan. Turli ranglarda tovlanib, koʻzni qamashtiruvchi atlas-u adraslar nozik xilqat vakillarining koʻrkiga koʻrk qoʻshishda katta ahamiyat kasb etsa, beqasam toʻn, milliy doʻppi va belbogʻ alp oʻgʻlonlarni mard, jasur va dovyurak, salobatli qilib koʻrsatadi. Bugungi davrdagi globallashuv liboslarga ham maʼlum bir maʼnoda oʻz taʼsirini oʻtkazgani achinarlidir. Gʻarbdan kirib kelayotgan ajnabiy suratlar va turli yozuvlar aks etgan kiyimlarni koʻrib, yoqa ushlaysan kishi. Ayniqsa, ayrim oʻsmir yigitlar ustidagi liboslar har qanday insonni taajjubga solishi shubhasiz.
Tafakkuri toʻgʻri shakllanmagan yoshlar orasida turli xil chet mamlakatlarga taqlid qilishning avj olgani, oqibatda oʻz milliyligimizga putur yetayotgani achinarli hol, albatta. Ayrim yoshlarning kiyib yurgan kiyimlari hatto hech qanday madaniyatga toʻgʻri kelmaydi.
Kiyinish madaniyati borasida buyuk mutafakkirlar va allomalar ham oʻz asarlarida fikr-mulohazalarni bayon etishgan. Soʻz mulkining sultoni Alisher Navoiy “Mahbub ul-qulub” asarida: “Erkaklarning oʻzini koʻz-koʻz qilish uchun yasanishi xotinlarning oroyish uchun bezanishi kabidir. Ammo bu kabi bezanmoq har ikkalasi uchun ham nomunosib, xususan, erkaklar uchun koʻproq sharmandalikdir”, deya taʼkidlab oʻtgan. Shuning uchun farzand tarbiyalab, voyaga yetkazayotgan oilalarning oʻgʻil-qizlari tarbiyasi va kiyinishiga boʻlgan eʼtibori muhim ahamiyatga ega.
R.HABIBULLAYeV, "Hoji eshon bobo" jomeʼ
masjidi imom-xatibi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
