SAYYoR QABULDA AHOLI MUROJAATLARI IJOBIY HAL ETILDI

“Xalq davlat idoralariga emas, davlat idoralari xalqimizga xizmat qilishi kerak” degan chaqiriq turmushimizning barcha sohalarida ham oʻz ifodasini topmoqda, barcha davlat idoralari xalqimizning ogʻirini yengil qilishga baholi qudrat hissa qoʻshayotir.

Ayniqsa Prezidentning “Aholi muammolari bilan ishlash tizimini yanada takomillashtirish chora-tadbirlari toʻgʻrisida”gi Farmoniga muvofiq aholi va davlat organlari oʻrtasida ochiq muloqot yoʻlga qoʻyilib, dolzarb muammolar tilga olinmoqda va bu muammolar ijobiy hal etilmoqda.

12-yanvar kuni Mangʻit shahrining Farovon mahallasida 2-sektor masʼullari tomonidan oʻtkazilgan sayyor qabulda ham mahalla aholisi turmushidagi koʻpgina muammolar joyida yechildi.

Sayyor qabulda tuman prokurori katta yordamchisi Abbos Niyazimbetov, Yoshlar ishlari agentligi tuman boʻlimi xodimlari, Farovon mahalla fuqarolar yigʻini masʼullari, faollari va bir guruh yoshlar ishtirok etdilar.

Sayyor qabulda dastlab ishtirokchilarga hukumatimizning aholi turmushi farovonligini, sifatini oshirish borasida olib borayotgan ishlar, bu borada qabul qilinayotgan qarorlar haqida qisqacha tushuntirish berildi.

2-sektor hududiga kiruvchi ushbu mahallada ijtimoiy himoyaga muhtoj kam taʼminlangan oilalarni qoʻllab-quvvatlash, aholiga munosib turmush sharoiti yaratish, yoshlarning tadbirkorlik tashabbuslarini qoʻllab-quvvatlash sektor masʼullarining doimiy eʼtiborida ekanligi taʼkidlandi.

Shundan soʻng aholi murojaatlari tinglandi. Fuqarolardan 1 nafari harbiy safarbarlik chaqiruvi rezervida xizmat qilish badalini qoplab berish, 1 nafari zamonaviy kasb egallashi uchun oʻquv kursi xarajatlarini, 4 nafari oliygoh toʻlov shartnoma pullarini toʻlab berish, 2 nafari davolanishi uchun moddiy yordam berishni soʻrab murojaat qildilar.

Shuningdek sayyor qabulda ishtirok etgan bir fuqaro sartaroshlik yoʻnalishida tadbirkorlik faoliyatini yoʻlga qoʻyish uchun subsidiya asosida asbob-uskuna, jihozlar olib berishda yordam soʻradi. Aholidan 3-Yakkatut koʻchasiga oqar suv kelishini yaxshilashda, Vatanparvar koʻchasiga yangi transformator oʻrnatishda yordam berishni hamda “Ayollar daftari”ga kiritishni soʻragan murojaatlar ham boʻldi.

Ushbu murojaatlarning ayrimlari sektor masʼullari tomonidan ijobiy hal etildi, ayrimlariga aniq va batafsil tushuntirishlar berildi, ayrimlari yuzasidan tegishli masʼul xodimlarga topshiriqlar berilib, ijrosi uchun muddat belgilandi.

Sayyor qabulga tashrif buyurgan aholiga mahalladagi hokim yordamchisi Muqaddas Beknazarova va yoshlar yetakchisi Shohruh Roʻzmetovlar tadbirkorlik faoliyatini tashkil etish, oilada oʻz-oʻzini band qilish uchun kredit olish tartiblarini batafsil tushuntirdi.

Oygul RAJABOVA.