САЙЁР ҚАБУЛДА АҲОЛИ МУРОЖААТЛАРИ ИЖОБИЙ ҲАЛ ЭТИЛДИ

“Халқ давлат идораларига эмас, давлат идоралари халқимизга хизмат қилиши керак” деган чақириқ турмушимизнинг барча соҳаларида ҳам ўз ифодасини топмоқда, барча давлат идоралари халқимизнинг оғирини енгил қилишга баҳоли қудрат ҳисса қўшаётир.

Айниқса Президентнинг “Аҳоли муаммолари билан ишлаш тизимини янада такомиллаштириш чора-тадбирлари тўғрисида”ги Фармонига мувофиқ аҳоли ва давлат органлари ўртасида очиқ мулоқот йўлга қўйилиб, долзарб муаммолар тилга олинмоқда ва бу муаммолар ижобий ҳал этилмоқда.

12 январь куни Манғит шаҳрининг Фаровон маҳалласида 2-сектор масъуллари томонидан ўтказилган сайёр қабулда ҳам маҳалла аҳолиси турмушидаги кўпгина муаммолар жойида ечилди.

Сайёр қабулда туман прокурори катта ёрдамчиси Аббос Ниязимбетов, Ёшлар ишлари агентлиги туман бўлими ходимлари, Фаровон маҳалла фуқаролар йиғини масъуллари, фаоллари ва бир гуруҳ ёшлар иштирок этдилар.

Сайёр қабулда дастлаб иштирокчиларга ҳукуматимизнинг аҳоли турмуши фаровонлигини, сифатини ошириш борасида олиб бораётган ишлар, бу борада қабул қилинаётган қарорлар ҳақида қисқача тушунтириш берилди.

2-сектор ҳудудига кирувчи ушбу маҳаллада ижтимоий ҳимояга муҳтож кам таъминланган оилаларни қўллаб-қувватлаш, аҳолига муносиб турмуш шароити яратиш, ёшларнинг тадбиркорлик ташаббусларини қўллаб-қувватлаш сектор масъулларининг доимий эътиборида эканлиги таъкидланди.

Шундан сўнг аҳоли мурожаатлари тингланди. Фуқаролардан 1 нафари ҳарбий сафарбарлик чақируви резервида хизмат қилиш бадалини қоплаб бериш, 1 нафари замонавий касб эгаллаши учун ўқув курси харажатларини, 4 нафари олийгоҳ тўлов шартнома пулларини тўлаб бериш, 2 нафари даволаниши учун моддий ёрдам беришни сўраб мурожаат қилдилар.

Шунингдек сайёр қабулда иштирок этган бир фуқаро сартарошлик йўналишида тадбиркорлик фаолиятини йўлга қўйиш учун субсидия асосида асбоб-ускуна, жиҳозлар олиб беришда ёрдам сўради. Аҳолидан 3-Яккатут кўчасига оқар сув келишини яхшилашда, Ватанпарвар кўчасига янги трансформатор ўрнатишда ёрдам беришни ҳамда “Аёллар дафтари”га киритишни сўраган мурожаатлар ҳам бўлди.

Ушбу мурожаатларнинг айримлари сектор масъуллари томонидан ижобий ҳал этилди, айримларига аниқ ва батафсил тушунтиришлар берилди, айримлари юзасидан тегишли масъул ходимларга топшириқлар берилиб, ижроси учун муддат белгиланди.

Сайёр қабулга ташриф буюрган аҳолига маҳалладаги ҳоким ёрдамчиси Муқаддас Бекназарова ва ёшлар етакчиси Шоҳруҳ Рўзметовлар тадбиркорлик фаолиятини ташкил этиш, оилада ўз-ўзини банд қилиш учун кредит олиш тартибларини батафсил тушунтирди.

Ойгул РАЖАБОВА.