10-SONLI MAKTABDA OʻTKAZILGAN SAVODXONLIK BAYRAMIDA OʻQUVChILAR OʻZ IQTIDORLARINI NAMOYoN ETDILAR

Shu kunlarda Amudaryo tuman Xalq taʼlimi boʻlimi tasarrufidagi umumtaʼlim maktablarining 1-sinf oʻquvchilari uchun Savodxonlik bayramlari boʻlib oʻtmoqda. Ushbu tadbirni oʻtkazishdan maqsad – 1-sinf oʻquvchilarining oʻquv yilining birinchi yarmida oʻrgangan bilim va koʻnikmalari, maktab mulkini koʻz qorachigʻidek asrash, maktab oʻquvchisining odob-axloq qoidalariga amal qilish, maktabda va oilada, jamoat orasida oʻzini tutishi boʻyicha qay darajada tushunchalarga ega boʻlganliklari, shu bilan birga “Alifbe”ni oʻzlashtirish darajasiga baho berishdan iborat.

Ana shunday bayram tadbiri 10-sonli umumtaʼlim maktabida ham oʻtkazildi. Savodxonlik bayrami boʻlib oʻtadigan xona oʻquvchilarning 4 oy davomida oʻrgangan bilim va koʻnikmalarini oʻzida mujassam etgan suratli-lavhalar, oʻquvchilarning rasm darsida chizgan suratlari, tabiat manzaralari, yilimizning toʻrt fasli haqida hikoya qiluvchi plakatlar, eng aʼlochi oʻquvchilarning xusnixat daftarlari, sharlar va gullar bilan bezatildi.

Tadbirda maktabning 1-“A” va 1-“B” sinf oʻquvchilari ustozlari Rayhon Tursunboyeva va Umida Oʻrozimbetovalar bilan birgalikda oʻquv yilining birinchi yarmida oʻzlari oʻrgangan bilim va koʻnikmalarini namoyish etishdi.

Xususan, har bir oʻquvchi “Alifbe” tartibidagi harf va tovushlar timsolida davraga chiqishib, harf va tovushlarni taʼriflab berdilar. Matematika fanidan olgan bilimlarini raqamlar vositasida koʻrsatishib, qiziqarli matematik amallarni – sonlarni yoddan qoʻshish, ayirish va koʻpaytirish, misol va masalalarni bajarishdi. Hatto karra jadvalini yodlashning uddasidan chiqqan eng aʼlochi oʻquvchilar oʻz qobiliyatlari bilan Savodxonlik bayramiga tashrif buyurgan ota-onalarini xursand qildilar.

Shundan soʻng, oʻqishni oʻrgangan, turli mavzularda sheʼrlar yodlagan oʻquvchilar “Yulduzcha”, “Tomchi”, “Tulpor”, “Eshmat oʻgʻli Mamajon” quvnoq qoʻshiqlarini birgalikda kuylashib, raqslar ijro etishdi. Oʻqishni oʻrgangan bolajonlar tadbir davomida “Alifbe” kitobi bilan xayrlashib, Ona tili va Oʻqish kitoblarini qabul qilib olishdi hamda bayramga tashrif buyurgan ota-onalari hamda ustozlariga yangi-yangi ilm sirlarini egallashga, yaxshi oʻqib, mustaqil Oʻzbekistonimizga munosib, vatanparvar farzandlar boʻlib voyaga yetishga soʻz berdilar.

Bolajonlarning biri-biridan quvnoq qoʻshiq va raqslari, ona, tinchlik, ustoz, Vatan, doʻstlik haqidagi jarangdor sheʼrlari tadbir ishtirokchilari boʻlgan ota-onalar va ustozlariga zavq-shavq bagʻishladi. Ayniqsa, ota-onalar oʻqishni oʻrgangan farzandlarining yutuqlaridan mamnun boʻlishib, ularni chin dildan tabrikladilar.

Savodxonlik bayrami yakunida 1-“A” va 1-“B” sinflar rahbarlari Umida Oʻrozimbetova va Rayhon Tursunboyevalar oʻquvchilarga oʻz sovgʻalarini berdilar.

Bilimdonlik, epchillik xislatlarini, oʻzlarining qobiliyat va iqtidorlarini namoyon etgan, oʻqishni oʻrgangan, bilimga chanqoq, intiluvchan oʻquvchilardan barcha mamnun boʻldi.

Robiya YOʻLDOShEVA.