Bir guruh fermerlar va dehqonlar, tomorqa yer egalari koʻkrak nishonlari bilan taqdirlandi

Prezidentimiz tashabbusi bilan har yili dekabr oyining ikkinchi yakshanbasi mamlakatimizda qishloq xoʻjaligi xodimlari kuni sifatida keng tarzda nishonlanib kelinmoqda. Sohaga qaratilayotgan alohida eʼtibor dehqon va fermerlarimizga, qishloq aholisiga alohida kuch-gʻayrat bagʻishlamoqda. Ayniqsa, qishloq xoʻjaligi sohasi fidoyilarining mehnatlari butun xalqimiz, Prezidentimiz tomonidan doimo eʼtirof etilishi ularning oʻz kasbiga boʻlgan mehr-muhabbatini yanada oshirmoqda.

Amudaryolik qishloq xoʻjaligi xodimlari bu yilgi bayramni ham mehnatdagi yutuqlari bilan qarshi oldilar. Qishloq xoʻjaligi xodimlari kuni bayrami munosabati bilan 13-dekabr kuni Amudaryo tumani hokimligining majlislar zalida soha ilgʻorlarini taqdirlash boʻyicha yigʻilish oʻtkazildi.

Tadbirda tuman hokimi Sultonboy Yoʻldashev qishloq xoʻjaligi iqtisodiyotning eng qadimiy, hech qachon oʻz oʻrni va ahamiyatini yoʻqotmaydigan tayanch tarmoqlaridan biri ekanligini taʼkidlab, ana shunday muhim sohaning zalvorli yukini oʻz yelkasida koʻtarib kelayotgan mirishkor dehqon va fermerlar, zahmatkash chorvador va pillakorlarni bayram bilan tabrikladi. Tuman hokimi soha ilgʻorlarining bu yilgi mashaqqatli mehnatlari, erishgan natijalari va qoʻlga kiritgan yutuqlarini yuqori baholab, kelgusi yilda ham barcha qishloq xoʻjaligi ekinlaridan moʻl hosil olishlariga tilakdosh boʻldi.

Maʼlumki, 2018-yil 26-iyun kungi Prezident qarori bilan “Ilgʻor fermer”, “Mehnatkash dehqon” va “Namunali tomorqachi” koʻkrak nishonlari taʼsis etilgan edi. Amudaryolik 16 nafar fermerga “Ilgʻor fermer”, 5 nafar dehqonga “Mehnatkash dehqon”, 6 nafar tomorqa yer egasiga esa “Namunali tomorqachi” koʻkrak nishonlari tantanali ravishda topshirildi.

Mamlakatimiz qishloq xoʻjaligi sohasini rivojlantirish, uning iqtisodiy qudratini va eksport salohiyatini yuksaltirish, xalqimizning rizq-roʻzi va farovonligini, oziq-ovqat xavfsizligini taʼminlash, yerlarning meliorativ holatini yaxshilash ishlariga munosib hissa qoʻshib kelayotgan amudaryolik fermerlar chindan ham bu kabi hurmat va eʼtiborga loyiqdir.

Ajratilgan yer uchastkalaridan samarali va oqilona foydalanib, aholiga arzon va sifatli mahsulotlarni yetkazib berish ishlariga munosib hissa qoʻshib kelayotgan, ekin maydonlari unumdorligini oshirish borasida salmoqli ishlarni amalga oshirayotgan dehqon xoʻjaliklari rahbarlari ham xalqimiz dasturxoni toʻkinligining sababchilaridan biridirlar.

Shaxsiy tomorqa yer uchastkalaridan samarali va oqilona foydalanib, qishloq xoʻjaligi mahsulotlarini ishlab chiqarishda yuksak natijalarga erishayotgan, arzon va sifatli mahsulotlarni yetishtirish hamda ichki bozorni barqaror taʼminlash ishlariga munosib hissa qoʻshayotgan, dehqonchilik madaniyati va sir-asrorlarini puxta egallagan ilgʻor tomorqa yer egalari esa barcha tomorqachilarga oʻrnakdir.

Birgina fermer xoʻjaliklari ishchi-xizmatchilarining fidokorona mehnatlari bilan yakunlanayotgan yilda tumanimiz boʻyicha 6000 gektar maydonga ekilgan gʻalladan 12 ming 832 tonna don, 13 ming 900 gektar paxta maydonidan 44 ming 844 tonna “oq oltin” hosili olindi.

Dehqon va tomorqa xoʻjaliklarida yetishtirilgan minglab tonna gʻalla, sabzavot va poliz ekinlari, mevalar hamda boshqa qishloq xoʻjaligi mahsulotlari bozorlarimiz toʻkinligi va ularda narx-navoning barqarorligini taʼminlashda muhim ahamiyat kasb etadi.

Tadbirda tuman hokimi Sultonboy Yoʻldashev zimmalaridagi mana shunday yuksak masʼuliyatli vazifalarni bajarishda boshqalarga oʻrnak boʻlayotgan dehon-fermerlar va tomorqachilarga, qishloq xoʻjaligi sohasi fidoyilariga chuqur minnatdorlik bildirib, kelgusi ishlariga omad va zafarlar tiladi.

Tuman hokimligining Axborot xizmati