QAYTA TAʼMIRLANGAN 33-SONLI MAKTABGAChA TAʼLIM TAShKILOTI BINOSI FOYDALANIShGA TOPShIRILDI

Amudaryo tumanining Arnaboʻyi mahallasidagi 33-sonli maktabgacha taʼlim tashkiloti binosi qayta taʼmirlanib, foydalanishga topshirildi.

12-dekabr kuni shu munosabat bilan oʻtkazilgan tadbirda tuman prokurori yordamchisi Zoidjon Xudoyberganov, tuman hokimligining Bolalarni himoya qilish shoʻʼbasi rahbari Jahongir Xolmurodov, Maktabgacha taʼlim boʻlimi boshligʻi oʻrinbosari Abdurashid Nasrillayev hamda fuqarolar yigʻini masʼullari ishtirok etdilar.

Zamonaviy koʻrinishga keltirilgan tashkilot binosi ostonasida alvon rangli lentalar kesilgach, yigʻilganlar oʻyin maydonchalari va mashgʻulot xonalari, oshxona va yotoqxonalarda yaratilgan shart-sharoitlar bilan yaqindan tanishdilar.

Taʼkidlanganidek, Xalq deputatlari tuman Kengashining 2022-yil 21-apreldagi tegishli qarori hamda Amudaryo tumani hokimining 2022-yil 27-apreldagi “Mablagʻ ajratish toʻgʻrisida”gi farmoyishi ijrosini taʼminlash maqsadida “Openbudjet.uz” elektron dasturida koʻp ovoz toʻplagan Arna boʻyi mahallasi hududidagi 33-sonli maktabgacha taʼlim tashkiloti binosida joriy taʼmirlash ishlari olib borildi. Binodagi 299 mln. soʻmlik qurilish ishlari “Urganch Murodjon servis” masʼuliyati cheklangan jamiyati tomonidan bajarilib, qayta taʼmirlandi.

Ushbu maktabgacha taʼlim tashkilotiga 120 nafar bola qamrab olingan boʻlib, endilikda ularga zamonaviy koʻrinishdagi, barcha shart-sharoitlar yaratilgan, yangidan jihozlangan binoda taʼlim-tarbiya berish imkoniyati yaratildi. Tashkilotning chiroyli, keng va koʻrkam xonalari, musiqa zallarining devorlari kichkintoylarga mos chiroyli rasmlar bilan bezatildi.

Shu oʻrinda aytish joizki, joriy yilda investitsiya dasturi asosida Toʻlqin ovuli hududidagi 39-sonli maktabgacha taʼlim tashkiloti hamda Yuqori qishloq mahallasi hududidagi 28-sonli maktabgacha taʼlim tashkiloti filiali binolarida rekonstruktsiya qilish ishlari olib borilmoqda. Shuningdek, Obod qishloq dasturi asosida Toʻlqin ovuli hududidagi 24-sonli maktabgacha taʼlim tashkiloti binosida mukammal taʼmirlash ishlari olib borilib, foydalanishga topshirildi.

Bundan tashqari tumandagi 5 ta, yaʼni 8-, 18-, 33-, 44-, 47-sonli maktabgacha taʼlim tashkilotlarida joriy taʼmirlash ishlari amalga oshirildi. Yil davomida maktabgacha taʼlim tizimiga tadbirkorlarni jalb qilgan holda 11 ta oilaviy nodavlat maktabgacha taʼlim tashkilotlari tashkil qilindi. Yil yakuniga qadar investitsiya dasturi hisobidan Yuqori qishloq mahallasida rekonstruktsiya qilinayotgan 28-sonli maktabgacha taʼlim tashkiloti filialiga 120 nafar, Choykoʻl ovuli hududidagi 1 ta, Oybek nomli mahallasidagi 1 ta, jami 2 ta oilaviy nodavlat maktabgacha taʼlim tashkilotiga 75 nafar bolalarni qamrab olish rejalashtirilgan boʻlib, muassasalardagi bolalar sonini 12 ming 144 nafar, yaʼni maktabgacha taʼlim yoshidagi bolalarning 72,1 foizga yetkazish rejalashtirilgan.

Tadbirga tashrif buyurgan masʼullar qayta taʼmirlangan 33-sonli maktabgacha taʼlim tashkiloti binosida kichkintoylar uchun ularni maktab taʼlimiga tayyorlash, intellektual salohiyatini yuksaltirish, har jihatdan yetuk va barkamol voyaga yetishlari uchun zarur boʻlgan barcha sharoitlar yaratilganining guvohi boʻldilar.

Endilikda zamonaviy maxsus mebellar, yangi toʻshaklar bilan jihozlangan yotoqxonalar, xavfsiz qattiq va yumshoq oʻyinchoqlar, bino oldidagi yozgi oʻyin maydonchalari, koʻrkam va fayzli oshxona bolajonlarning doimiy xizmatida boʻladi.

Kelajak egalari uchun yaratilgan ushbu qulayliklar nafaqat kichkintoylarni, balki tadbirga tashrif buyurgan masʼullar, qolaversa, Arnaboʻyi mahallasining butun aholisini juda quvontirdi.

Ozoda Xudoyberganova.